اے پی پی میگا کرپشن کیس: دزگیر کنگ ءَ پد 6 نام گپتگیں ملزم ءِ ضمانت ءِ درخواست رد کنگ بیتگ

اسلام آباد۔1اکتوبر  (اے پی پی): سپیشل جج سنٹرل ہمایوں دلاور  ءَ اے پی پی ءِ میگا کرپشن کیس ءَ دزگیر بوتگیں 6 نام گپتگیں ملزم آنی دزگیری ءَ پد ضمانت ءِ درخواست رد کتگ۔ چار شمبے ءِ روچ ءَ آمید گس ءَ ملزم محمد غواث  ، ملزم ادریس چوہدری، ملزم ساجد علی وڑائچ، ملزم عمران منیر، ملزم خرم شہزاد اور ملزم طاہر گھمن  ءِ دزگیر کنگ ءَ پد ضمانت ءِ درخواست گوشدارگ بوتگ۔ اے موہ ءِ سر ءَ اے پی پی ءِ نیمگ ءَ نامداریں وکیل خرم بیگ ایڈووکیٹ ، روحیل اصغر ایڈووکیٹ   ءُ  حسنین حیدر تھہیم  آمید گس ءَ پیش بوتگ اَنت۔ گوشدارگ ءِ ساھت ءَ جج ءَ جست ءُ پرس کتگ کہ ملزم ءِ کجام اکاؤنٹ ءَ زر دیم دیگ بوتگ اَنت کہ ایشی ءِ تہ ءَ ایف آئی اے ءِ کارندہ آں گْوشتگ کہ ایوک ءَ سئے سال ءِ وھد ءِ تہ ءَ پیسریگیں اکاؤنٹ منیجر ارشد مجید چوہدری ءِ اکاؤنٹ ءَ 80 ملین کلدار دیم دیگ بوتگ کہ ایشی ءِ تہ ءَ 60 ملین کلدار پگار ءِ اکاؤنٹ ءَ دیم دیگ بوتگ ۔ پیسریگیں کیشئر اظہر فاروق  ءِ اکاونٹ ءَ 9 کروڑ کلدار  کلدار ءِ کساس ءَ دیم دیگ بوتگ۔ گوشدارگ ءِ وھد ءَ اے پی پی ءِ وکیل روحیل  اصغر ءَ آمید گس ءَ گْوشتگ کہ ما بینک ءِ سرٹیفائیڈ ریکارڈ ایف آئی اے ءَ پیش کتگ کہ ایشی ءَ چہ اے گپ پدر بیت کہ ملزم اے پی پی ءِ کرنٹ اکاؤنٹس، پی ایف اکاؤنٹس ءُ دگہ اکاؤنٹس ءَ چہ زرّ ءِ ٹرانسفر کنگ ءَ اِت اَنت ءُ اے پی پی ءِ مجازیں اتھارٹی ءِ منظوری ءَ ابید زرّ ءِ ٹرانسفر کنگ ءَ اِت اَنت۔ آئی ءَ آمید گس ءَ گْوشتگ کہ بُرز ءِ ایف آئی آر ءِ تہ ءَ درستیں 16 ملزم یکے دومی ءِ گوں دست ءُ دپ ءَ اَنت، زر لھتیں ملزم ءِ اکاؤنٹ ءَ شتگ اَنت کہ آیاں کش اِتگ ءُ یکجاہ شیئر کتگ۔ اے پی پی ءِ وکیل خرم بیگ ءَ اے موقف زرتگ کہ اے پی پی ءِ پگار ءِ اکاؤنٹ ءَ اے ایچ ایس ءِ نام کہ جعلی اِنت آئی ءِ سی این آئی سی نمبر ءَ چہ اے گپ پدر اِنت کہ اے ارشد مجید چوہدری ءِ شناختی کارڈ اِنت کہ آئی ءِ اکاؤنٹ ءَ ناجائزیں وڑے ءَ زر دیم دیگ بوتگ اَنت۔ آئی ءَ اے موقف زرتگ کہ آڈٹ کنوکیں ملزم ھم برابریں شریک اَنت پرچا کہ سئے سالانی تہ ءَ کروڑاں کلدار ناجائزیں رنگ ءَ دیم دیگ بوتگ کہ آھاں نہ آڈٹ کتگ ءُ نہ مجازیں اتھارٹی ءَ نبشتہ کتگ کہ ایشانی بد نیتی ءِ درشان اِنت۔ اے پی پی ءِ وکیل حسنین حیدر ثہیم ءَ اے موقف زرتگ کہ محمد غواس کہ پیسریگیں ایگزیکٹو ڈائریکٹر بوتگ ءُ آئی ءِ دستخط ءِ چیر دستی ءَ کروڑاں کلدار ناجائزیں وڑے ءَ دیم دیگ بوتگ انت آئی ءَ ہم اے جی پی آر ءَ نمدی نبشتہ کتگ کہ زرّ ءِ یلہ کنگ بہ بیت، آ ہم اے کار ءِ تہا برابریں شریک انت۔ آئی ءَ آمید گس ءَ گْوشتگ کہ ادارگ ءَ ایف ایف سی ءِ رپورٹ ءَ ھم ملزم گناہ گار لیک اِتگ۔ گوشدارگ ءِ وھد ءَ وھدے ملزم ادریس چوہدری ءِ وکیل ءَ اے پی پی ءِ منیجر لیگل ءَ گوں گپ جنگ بندات کت گڑا جج ءَ آئی ءِ گپ ءِ تہ ءَ ھوار کت ءُ گْوشت ءِے کہ منی گور ءَ وھد نیست، وتی موکل ءِ بابت ءَ بہ گْوش۔ ادریس چوہدری ءُ طاہر غومان ءِ وکیل ءَ آمید گس ءَ گْوشتگ کہ ارشد مجید چوہدری ءُ محمد غواث  ءَ پگار ءِ واؤچر ءِ سر ءَ دستخط کتگ کہ ایشی ءِ سر ءَ اے پی پی ءِ وکیل روحیل اصغر ءَ گْوشتگ کہ اے دوئیں آڈٹ افسر اَنت ءُ گیشتریں ذمہ واری آھانی سر ءَ اِنت۔ اے دوئیں گوں یکے دومی ءَ بندوک اَنت۔ ایشانی دستخط کریڈٹ شیٹ ءُ واؤچر ءِ سرا ھست انت۔ آڈٹ ءِ کارمند اتنت۔ ہر ماہ کجام آڈٹ کتگ ات؟ کریڈٹ شیٹ ءِ وسیلہ ءَ بینک ءِ آڈٹ کنگ آہانی ذمہ واری ات۔ آ غیر ضمانت ءِ دفعہ 409 ءِ تابع انت پمیشکا آہانی ضمانت ءِ درخواست رد کنگ بہ بیت۔ ایگزیکٹو ڈائریکٹر ءَ ھوار درستیں ملزم ھمگرنچ بوتگ اَنت۔ منیجنگ ڈائریکٹر ءِ منظوری ءَ ابید زرّ کشّگ ءَ اتنت۔ روحیل اصغر ایڈووکیٹ ءَ گشتگ کہ ملزم ادریس احمد ءَ 35 ملین کلدار ءِ واؤچر ءِ سرا دستخط کتگ۔ اے پی پی ءِ وکیل حسنین حیدر تھیم  ءَ گشتگ کہ درستیں ملزماں اے زر وت ماں وت ءَ بہر کتگ انت کہ ایشی ءِ سرا زانتکاریں جج ءَ گشتگ کہ اے زر لہتیں مردمانی تہا بہر کنگ بوتگ انت کہ ایشی ءِ سرا حسنین حیدر تھیم  ءَ پدا گشتگ کہ اے زر درستانی تہا بہر کنگ بوتگ انت۔ آئی ءَ گوشت کہ پروویڈنٹ فنڈ ءَ چہ کہ کارمند آنی پنشن ءِ واستہ ایر کنگ بیت، چہ مجازیں ادارہ ءِ منظوری ءَ ابید ناجائزیں رنگ ءَ دگہ اکاؤنٹ آنی تہ ءَ زرّ دیم دیگ بوتگ۔ آئی ءَ گوشت کہ اے السی سیت ءُ تاوان   ءِ جیڈھ انت ایشی ءِ سر ءَ پیسر ءَ پبلک اکاؤنٹس کمیٹی ءَ ھم گپ ءُ تران بوتگ۔ اے پی پی ءِ کارمنداں چہ لاکھوں کلدار لٹ ءُ پُل کنگ بوتگ کہ ایشی ءِ تہا درستیں ملزم یک پیم ءَ ھوار انت، لھتیں ملزمانی منظوری ءُ بے تواری ءَ چہ اے گپ ثابت بیت کہ آہاں زر رستگ انت۔ اے پی پی ءِ وکیل ءَ گشتگ کہ ملزم خرم شہزاد پروویڈنٹ فنڈ ءِ انچارج بوتگ، آئی ءِ دستخط ءِ گوما 95 ملین کلدار ءِ چیک جاری کنگ بوتگ انت۔ اے پی پی ءِ وکیل ءَ گشتگ کہ ساجد علی ورائچ ءَ را اکاؤنٹ منیجر ءِ بستار ءَ گچین کنگ بوتگ ءُ ایشی ءَ چہ پیسر اسسٹنٹ منیجر سیلری ءُ انچارج پی ایف ءِ بستار ءَ آئی ءِ مدت ءِ تہا مالیاتی کرپشن ہم ثابت بوتگ۔ گوشدارگ ءِ وھد ءَ ملزم عمران منیر ءُ ساجد علی ورائیچ ءِ نیمگ ءَ فرحت  چوہدری ایڈووکیٹ ، ادریس احمد ءُ طاہر غومن ءِ نیمگ ءَ ارشد علی گورسی ءُ دگہ ملزم ءِ وکیل آمید گس ءَ پیش بوتگ اَنت۔ آمید گس ءَ فریقین ءِ وتی دلیل سرجم کنگ ءَ پد فیصلہ ریزرو کتگ۔ پد ءَ آمید گس ءَ فیصلہ ءِ جار جنگ ءِ وھد ءَ 6 ملزم آنی ضمانت ءِ درخواست رد کتگ۔ زانگ بہ بیت کہ اے پی پی میگا کرپشن کیس ءِ تہ ءَ 7ملزم اڈیالہ جیل ءَ اَنت کہ ایشی ءِ تہ ءَ گْوشگ بیتگیں 6ملزماں دزگیر کنگ ءَ پد ضمانت ءِ درخواست داتگ اَت۔ زانگ بہ بیت کہ فیڈرل انوسٹی گیشن ایجنسی ءَ 16ملزم آنی ھلاپ ءَ کروڑاں کلدار ءِ کرپشن ءِ الزام ءَ کیس درج کتگ ات ءُ کارروائی بندات کتگ ات۔