چین نا زرگزرانی، راجی و عسکری پڑاٹ بھلا سرسہبی مچ آ ڈیہہ انا سوگوی و شونہالی نا سوب ءِ، بنجائی وزیر داخلہ محسن نقوی نا السی جمہوریہ چین نا 76 می قومی دےآ کلہو

اسلام آباد۔ 01اکتوبر (اے پی پی) بنجائی وزیر داخلہ محسن نقوی السی جمہوریہ چین نا 76 می قومی دے آ چینی سرکڑدہ، کمیونسٹ پارٹی و الس ءِ مبارکبادی ترساپارینے کہ چین چنکو مد اسے ٹی زرگزرانی سوگوی و پائیدار شونداری نا تغ ءِ عملی تعبیر اس تسنے و استقامت ، اصول آتا پاسداری و اجتماعی آسودہی نا جوزہ غان دنیا ٹی بڑزکو ہنداس دوئی کرینے۔ محسن نقوی تینا کلہو اٹی پارے کہ چین نا زرگزرانی ، راجی و عسکری پڑاٹ بھلا سرسہبیک نئے بیرہ اونا تینا شونداری بلکن مچ آ ڈیہہ انا سوگوی و شونہالی نا سوب ءُ۔ اوچین نا شاندار تاریخ، دودوربیدہ ئی میرات و حیرت انگیز شونداری ءِ خراج تحسین پیش کرساپارے کہ پاک چین تعلقداری تاریخی، اسٹریٹجک و سوگو شریداری آ تالان ءُ۔ اوپارے کہ سی پیک کون آ عظیم ڈٹ آک داشریداری نا  روشنا درور ءُ وخت اس کہ ہمالیہ نا فلک بوس ٹُل، سمندر نا کڑمبی و قراقرم نا سنگلاخ کسرآک پاک چین بے مٹ سنگتی نا گواہ ءُ۔ وزیرداخلہ پارے کہ چین ہر تنکی، علاقائی تناؤ یاداخلی چیلنج اٹی پاکستان  تون پبی تفینے و ہندا سوب ءِ کہ چین اتون تعلقداری پاکستان نا خارجہ پالیسی نا آخبتی و مرکزی تمبہ ءِ۔ اوپارے کہ گوادر آن خنجراب اسکان و توانائی آن مواصلات اسکان، چین پاکستان نا زرگزرانی بنداو تے سوگو کننگ اٹ اہم کڑد اداکرینے۔ اوپارے کہ پاک چین اسٹریٹجک شریداری ڈیہہ اٹی توازن و شونداری نا بنداو ءِ۔ بنجائی وزیر داخلہ قومی دے آ چینی قوم انا لگن، خواری و جدت پسندی ءِ سلام پیش کرسا اونا پین شونداری ، کامرانی و عروج کن نیک است خواہی تا درشانی ءِ کرے۔