پاک چین سنگتی بے مٹ و ناقابل شکست رشتہ ءِ، وزیراعظم شہباز شریف نا چین نا 76 می قومی دے انا وخت آ چینی سرکڑدہ و الس ءِ مبارکباد

اسلام آباد۔ 01 اکتوبر (اے پی پی) وزیراعظم محمد شہباز شریف چین نا الس نا شونداری، شونہالی و سرسہبی کن نیک است خواہی نا درشانی ءِ کرسا پارینے کہ پاکستان ءِ چین اتون تینا برادرانہ تعلقداری آ گمر ءِ، ہڑتوم آملک آک سنگتی و شریداری ٹی پوسکن آ مزل نا نشان ءِ عبور کیرہ۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم حکومت پاکستان و پاکستانی الس نا کنڈآن السی جمہوریہ چین نا 76 می قومی دے انا وخت آ چین نا سرکڑدہ و ایلم الس ءِ مبارکبادی ترسا دامبارک دے آ چین نا الس نا شونداری، شونہالی و سرسہبی کن نیک است خواہی نا درشانی ءِ کرے۔ وزیراعظم پارے کہ دا دے نئے بیرہ چین نا شاندار قومی سفر نا یات دہانی بلکن اسہ عظیم قوم اسے نا شونداری، سوگوی و جہانی کہول آ امن اٹی چین نا کڑد انا ہم اعتراف ارے، صدر شی جن پنگ نا دوراندیش و بے مٹ سرکڑدہ ئی ٹی چین شونداری و شونہالی نا ہندن ءُ مزل عبور کرے ہرادنیا نا روشنا درور ءُ۔ وزیراعظم پارے کہ پاکستان و چین نا سنگتی اسہ لازوال و ناقابل شکست رشتہ ءِ ہرا وخت تدینگ انگ تون پین سوگو مسنے۔ وزیراعظم پارے کہ دا رشتہ تین پہ تینی پت ، قربانی و اخلاص آ تالان و بروک آ چین تیکن امن، شونداری و شونہالی نا ضمانت ءِ۔ اوتینا چین نا ساڑی آ دورہ ءِ بھاز فائدہ ئی و بھرمی گوندساپارینے کہ دورہ چین اٹی شنگھائی کمکار تنظیم نا دیوان و بی ٹو بی کانفرنس اٹی ارب آڈالر نا زرکاری نامعاہدہ کون آ تاریخی سنگ میل عبور مسنے۔ اوپارے کہ چین پاکستان اقتصادی راہداری ننا چین اتون بے کچ اہم اسیجائی زرگزرانی ڈٹ ءِ ہرا ارٹ میکو ریسہ ٹی پترینگانے۔ اوچین اتون پاکستان نا برادرانہ تعلقداری آ گمر نا درشانی ءِ کرسا پارے کہ او پراومیت ءِ کہ ہڑتوم آملک آک سنگتی و شریداری نا پوسکن نا مزل نا نشان آتے عبور کیرہ۔