صدر آصف علی زرداری نا السی جمہوریہ چین نا 76 می قومی دے انا وخت آ چینی حکومت و الس ءِ مبارکباد

اسلام آباد۔ 01اکتوبر (اے پی پی) صدر مملکت آصف علی زرداری السی جمہوریہ چین نا حکومت و الس ءِ اوفتا 76 می قومی دے انا وخت آ مبارکبادی ترساپارینے کہ پاکستان وچین نا آزموندہ سنگتی پین سوگو مننگ ءِ۔ چارشنبے نادے آ ایوان صدر نا پریس ونگ آن جاری بیان نا رداٹ صدر مملکت چین انا 76 می قومی دے انا وخت آ جاری کلہو اٹی پارے کہ پاکستان نا الس تینا چینی ایلم و ایڑھ تتون دادے انا خوشی تے اڈ ایتک ہرا چین انا شونداری نا شاندار سفر و سیوت نا نشانی ءِ۔ صدر مملکت پارے کہ صدر شی جن پنگ نا بصیرت افروز سرکڑدہ ئی چین ءِ شونداری نا پوسکن آ بڑزی تسکان درینے۔ چین نا اسیجا شونہالی و جہانی کمکاری نا وژن ءِ پاکستان نا مخ تفی دوئی ءِ۔ چین نا شونداری، سیوت و اختراع نا شاندار سفر گمرنا قابل ءِ۔ صدر مملکت پارے کہ کنا چین انا ساڑی آ دورہ غاتیان ہڑتوم آ ہمسایہ و سنگت ملک آتا نیام اٹ واپار و بنداوی پنجر نا رابطہ غاتا مون آ دننگ تون اوار اوار سٹریٹجک و سیکورٹی کمکاری نا عزم ءِ پین سوگوی ملانے۔ صدر مملکت پارے کہ سائنس، تعلیم، ٹیکنالوجی و دودوربیدہ ٹی کمکاری نا کمک اٹ سوگو السی تعلقداری ننا دیرپاشریداری نا بنداو ءِ۔ صدر مملکت چین نا الس نا شونہالی و صدر شی جن پنگ نا سرسہبی تیکن نیک است خواہی نا درشانی ءِ کرساپارے کہ ننا سنگتی بروک آ سال آتیٹی پین شون ہلیک۔