پاکستان ءُ ترکمانستان ءِ پارلیمانی دوستی گروپ ءِ اولی دیوان

اسلام آباد۔30ستمبر  (اے پی پی): پاکستان ءُ ترکمانستان ءِ پارلیمانی دوستی گروپ ءِ اولی دیوان پارلیمانی گس ءَ برجم دارگ بوت ایشی ءِ سروکی ءَ باسک راجی اسمبلی سنجے پروانی ءَ کت۔ گند ءُ نند ءَ وزارت ءِ درئی کار ءُ وزارت ءِ تجارت ءِ کارندہ آں پاکستان ءُ ترکمانستان ءِ نیام ءَ سیاسی، اقتصادی ءُ دود ءُ ربیدگی سیادی ءِ بابت ءَ سرجمیں بریفنگ داتگ۔ اے دیوان ءَ گروپ ءِ باسک رانا محمد قاسم نون، فتح اللہ خان، ارشد عبداللہ واہورا، خواجہ اظہار الحسن، عثمان علی، صبا تالپور ءُ نوما کنول ءَ بہر زرتگ ات۔ مسئولین ءَ آھاں دمگی رابطہ ءِ جاری منصوبگ ءُ کثیر جہتی کمک ءِ سر ءَ پیشرفت ءِ بابت ءَ سرپد کت۔ گروپ ءِ باسک آں توانائی ءِ سلامتی، تجارت ءُ ٹرانزٹ کمک، دمگی رابطہ ءُ دود ءُ ربیدگی تبادلہ ءِ شوبگ آنی تہ ءَ پاکستان ءُ ترکمانستان ءِ یکجائی مفاد آنی سر ءَ زور پر دات۔ وتی گشتانک ءِ تہ کنوینر سنجے پروانی ءَ پاکستان ءُ ترکمانستان ءِ نیام ءَ دیریں سیادی ءِ ذکر کنان ءَ گوشت کہ پاکستان اولی ملک اِنت کہ آئی ءَ ترکمانستان ءِ آجوئی من اِتگ ءُ دوئیں ملک آنی نیام ءَ مدام جوانیں سیادی دیمروئی کنگ ءَ اِنت۔ آئی ءَ مزن تک ءِ تبادلہ، پارلیمانی رابطہ آنی دیمروئی، مردم آنی نیام ءَ رابطہ ءُ تجارت ءُ رابطہ آنی واستہ سازگاریں فریم ورک ءِ جوڑ کنگ ءِ ضلورت ءِ سر ءَ زور پر دات۔ کنوینر ءَ وزارت ءِ درئی کار ءُ ترکمانستان ءَ پاکستان ءِ سفارتی مشن ءَ را ہدایت کتگ کہ آ ترکمانستان ءِ پارلیمنٹ ءِ گوما ہم منصب پارلیمانی دوستی گروپ ءِ جوڑ کنگ ءِ باقاعدہ درخواست ءَ پیش بہ کن انت۔ باسک آں اے گپ ءِ سر ءَ تپاک کت کہ دوئیں ملک آنی نیام ءَ وت مہ وتی ءِ دیمروئی ءُ کاروباری، وانگ ءُ زانگ ءُ دود ءُ ربیدگی سیادی ءِ دیمروئی ءِ تہ ءَ پارلیمانی پلیٹ فارم کلیدی کرد پیلو کن اَنت۔