ناشرکاراں ہچ وڑیں جاوراں وتی ناشریں پندلاں سوبمند بوہگ ءِ موہ دیگ نہ بیت، بلوچستان ءِ سر وزیر ءَ کوئٹہ تراک ءِ مذمت کتگ

کوئٹہ۔ 30 ستمبر (اے پی پی): بلوچستان ءِ سر وزیر میر سرفراز بگٹی ءَ کوئٹہ ءِ تراک ءَ را سک مذمت کتگ ءُ گشتگ کہ ناشرکارانی بزدلیں کار ہچ رنگ ءَ مہلوک ءُ ملک ءِ حوصلہ ءَ جہل کت نہ کنت۔ ادا جاڑی بوتگیں بیان ءِ تہ ءَ آئی ءَ گوشت کہ ریاست دژمنیں عناصر آنی ایجنڈا ایوک ءَ بے گناھیں شہری آنی جان ءُ مال ءَ را تاوان دیگ ءُ ترس ءُ بیم ءِ شنگ کنگ اِنت بلے راج ءِ جزم ءُ یکوئی ءَ چہ ناشرکار آنی بدیں منصوبگ مدام ناکام بنت۔ بنجاھی وزیر ءَ گوشت کہ وئیل ءِ تچک ءَ چہ پد سیکورٹی فورسز ءَ وھد ءِ سر ءَ جوانیں کارروائی کتگ ءُ ناشرکار آناں جہنم ءَ سر کتگ، ایشی ءِ واستہ سرجمیں راج وتی بہادریں سپاھیگ آناں خراج تحسین پیش کنت۔ آئی ءَ گوشت کہ ناشرکاری ءِ ھلاپ ءَ جنگ ءِ تہ ءَ قوت آنی قربانی ءُ الس ءِ کمک ءُ مدت ءِ مستریں مھکم انت۔ میر سرفراز بگٹی ءَ گوشت کہ بلوچستان ءَ را امن ءُ ایمنی ءِ صوبہ جوڑ کنگ ءِ واستہ ما درست یک مشت انت ۔ الس ءُ سیکورٹی ادارگ آنی دائمی قربانی کدی ھم بے سوب نہ بنت ءُ ما شہید آنی مشن ءَ سرجم کناں۔ بلوچستان ءِ سر وزیر ءَ تراک ءَ شہید بوتگیں مردمانی کھول ءِ گوما دل ءِ جہلانکی ءَ ہمدردی ءُ یکوئی ءِ درشانی کتگ ءُ شہیدانی اڑ برز کنگ ءِ دعا کتگ۔ آئی ءَ ٹپیگ آنی زوت جان سلامتی ءِ واستہ نیکیں واھگ آنی درشانی کت ءُ انتظامیہ ءَ را ہدایت کت کہ ٹپیگ آناں جوانیں دوا ءُ درمان ءِ آسراتی پجاری کنگ بہ بیت۔ بنجاھی وزیر میر سرفراز بگٹی ءَ اے گپ پدر کت کہ صوبگ ءَ امن ءِ برجائی ءِ واستہ حکومت، الس ءُ ادارگ یکجا اَنت ءُ ناشرکار آناں ھچ وڑیں جاور ھال ءَ وتی نا شریں ارادہ آنی تہ ءَ سوبمند بوھگ ءِ موہ نہ دیگ بیت۔