راجی اسمبلی ءِ اسپیکر سردار ایاز صادق ءَ ازبکستان ءِ پارلیمانی ڈل ءَ گوں گند ءُ نند کتگ، دو نیمگی پارلیمانی سیادی، تجارت، سرمایہ کاری ءُ دمگی کمک ءِ بابت ءَ گپ ءُ تران کتگ، ایشی ءِ تہ ءَ ھاسیں جھان ءِ جیڈھ ھوار اَنت

اسلام آباد۔29ستمبر  (اے پی پی): ازبک پارلیمانی ڈل ءَ کہ پاکستان ءِ تر ءُ تاب ءَ انت آئی ءَ اسپیکر نورالدین اسماعیلوف  ءِ سروکی ءَ پارلیمنٹ ہاؤس ءَ اسپیکر راجی اسمبلی سردار ایاز صادق ءَ گوں گند ءُ نند کتگ ات، ایشی ءِ تہ ءَ دو نیمگی پارلیمانی سیادی، تجارت، سرمایہ کاری ءُ دمگی کمک ءِ سر ءَ ھاسیں جیڈھ ءِ سر ءَ گپ ءُ تران کنگ بوتگ ات۔ پارلیمنٹ گس ءَ سر بوھگ ءِ وھد ءَ اسپیکر راجی اسمبلی ءَ تروکیں ڈل ءَ را گہتری ءَ گوں وش اتک کت۔ گند ءُ نند ءِ تہ ءَ وت مہ وتی پارلیمانی کمک ءُ مردم آں گوں رابطہ آنی تہ ءَ گیشی ءِ سر ءَ تپاک کنگ بوت۔ ڈل ءَ گوں تران کنان ءَ اسپیکر سردار ایاز صادق ءَ گوشت کہ پاکستان ءُ ازبکستان یکجاھیں مذھب، راجدپتر ءُ دود ءُ ربیدگ ءِ سیادی ءَ گوں یکوئی انت۔ آئی ءَ گوشت کہ پڑ  ءِ امن ءُ ایمنی ءُ دیمروئی ءِ واستہ پارلیمانی سفارتکاری ناگزیر انت ۔ پارلیمانی سفارتکاری ملک آنی نیام ءَ سیادی ءَ را گیش کنگ ءِ یک ھاسیں وسیلہ یے ۔ سعودی عرب، ترکی، آذربائیجان ءُ ایران ءِ پارلیمانی ڈل ھم اکتوبر ءَ پاکستان ءِ پارلیمنٹ ءِ تر ءُ تاب ءَ انت۔ راجی اسمبلی ءِ اسپیکر سردار ایاز صادق ءَ آئی پی یو ءِ دیوان ءِ سوبمندیں برجم دارگ ءِ پد ءَ ازبکستان ءَ را مبارک بات دات ءُ گوشت کہ گوادر ءُ کراچی بندر ھاسیں بندر اَنت کہ ازبکستان ءَ را دگنیا ءَ گوں ہمگرنچ کت کن اَنت، ازبکستان پاکستان ءِ اسٹریٹجک پوزیشن ءَ چہ سیت چست کت کنت۔ کشمیر ءُ فلسطین ءِ جیڈھ آنی گیواری ءَ ابید پڑ  ءَ دائمی امن ممکن نہ بیت۔ میاں اوستمانی براتی مظلوم کشمیری ءُ فلسطینی اُلس ءِ حق ءَ زوت ءُ منصفانہ کرد پیلو بہ کنت۔ مسلم امت کشمیر ءِ الس ءِ حق ءَ یک مشترکہ حکمت عملی ءِ زیرگ بہ بیت۔ پاکستان ھمک پڑ ءَ کشمیری راج ءِ آجوئی ءِ جنز ءِ کمک ءَ برجاہ دار ایت۔ آئی ءَ گیش گوشت کہ ناشرکاری ءِ ھلاپ ءَ جنگ ءَ پاکستانی راج ءُ اُرد ءَ بے دروریں قربانی داتگ۔ پاکستان ءَ انوگیں بھارتی زوراکی ءِ سرا لائکیں پسو داتگ۔ بے جاہیں بھارتی زوراکی ءِ سرا پاکستان ءِ پسو متوازن ءُ پیمائش ءِ سرا بوتگ۔ بھارت ءِ ھلاپ ءَ پاکستانی انجینئر ءُ سائنسداناں مزنیں کارکردگی پیش داشتگ۔ ھندی زوراکی ءِ ھلاپ ءَ پاکستان ءِ سوب مندی سرجمیں راج ءِ یکوئی ءُ تاگتانی قربانی ءِ آسر اِنت۔ اسرائیل ءِ نیمگ ءَ چہ قطر ءِ سر ءَ بمبتراک ءُ ایندگہ مسلمانیں ملکانی سیمسر لگتمالی مذمت ءِ لائک انت ۔ پاکستان ءَ ایران ءُ قطر ءِ سرا اسرائیل ءِ ارش سک مذمت کتگ انت۔ آئی ءَ گوشت کہ پاکستان ءَ ھاسیں رنگ ءَ اوگانستان ءَ را زور پر داتگ کہ آ وتی مٹی ءَ را ناشرکاری ءِ واستہ کارمرد کنگ ءَ را موہ مہ دنت۔ راجی اسمبلی ءِ صدر ءَ گوشت کہ پاکستان ءَ سرمایہ کاری ءُ تجارت ءِ واستہ سک باز موہ است انت، دوئیں ملک آنی تہ ءَ پارلیمانی کمک ءَ را دیمروئی دیگ ءَ پاک ازبک پارلیمانی دوستی گروپ ھاسیں کرد پیلو کنگ ءَ انت، دو نیمگی پارلیمانی ءُ السی سیادی ءَ چہ دوئیں ملک آنی نیام ءَ سیادی گیش مھکم بنت۔ ازبکستان ءِ اسپیکر نور الدین اسماعیلوف ءَ گوشت کہ آئی ءِ سر بوھگ ءِ سر ءَ جوانیں وش اتک ءُ گرمیں مہمان داری ءِ پد ءَ پاکستان ءِ شگر ءُ منت گپت۔ پاکستان ءِ وشیں دود ءُ ربیدگی ءُ تہذیبی روایات ستا کرز انت۔ آئی ءَ پاکستان ءِ اقتصادی ءُ چاگردی دیمروئی ءِ واستہ دعا کتگ ۔ پاکستان ءِ پارلیمنٹ وتی مہلوک ءِ ھاتر ءَ جوانیں ازمت کنگ ءَ انت ۔ پاکستان ءِ وڑ ءَ ازبکستان ھم ناشرکاری ءِ آماچ بوتگ۔ پاکستان ءُ ازبکستان ناشرکاری ءِ ھلاپ ءَ جنگ ءَ یکے دومی ءِ تجربتاں چہ سیکھ زورگ ءَ انت۔ بھارت ءُ پاکستان ءِ جنگ ءَ سفارتی جنگ ءِ سرا پاکستان ءِ پسو ستا کرز انت۔ موسمیاتی بدلی ءَ گوں گر ءُ چیل بوھگ ءِ ھاتر ءَ یکجائی حکمت عملی ءِ ضلورت اِنت۔ پاکستان ءُ ازبکستان ءِ سیادی براتی، بھروسہ ءُ وت مہ وتی نپ ءِ سرا انت۔ پارلیمانی تک ءَ نزیکیں رابطہ آں چہ السی تک ءَ سیادی گیش مھکم بنت۔ آئی ءَ گوشت کہ گوستگیں وھد ءَ پاکستان ءِ مزن وزیر ءِ ازبکستان ءِ تر ءُ تاب دو نیمگی سیادی آنی واستہ سنگ میل ءِ ثابت بوت۔