بلوچستان ءِ سی ایم ءَ دیوان ءَ  را گوشتگ  کہ محکمہ جنوری ءَ تاں منظور بوتگیں اسکیماں سرجم بہ کن اَنت

کوئٹہ۔ 29 ستمبر (اے پی پی): سرکاری شوبگ ءِ دیمروئی پروگرام ءِ سرجمی ءِ ھوالگ ءَ بلوچستان ءِ سر وزیر میر سرفراز بگٹی ءِ سروکی ءَ ادا بنجاہی وزیر سیکرٹریٹ ءَ مزن تک ءِ دیوان ءِ برجم دارگ بوت۔ صوبائی وزیر ترقی ءُ منصوبہ بندی میر ظہور احمد بلدی، وزیر رابطہ ءُ شہری دیمروئی میر سلیم خان کھوسہ، وزیر وانگ ءُ زانگ  راحیلہ  حمید خان درانی، چیف سیکرٹری بلوچستان شکیل قادر خان  ءُ توامیں محکمہ انتظامی سیکرٹری آں گند ءُ نند ءَ بہر زرتگ ات۔ ایڈیشنل چیف سیکرٹری منصوبہ بندی ءُ دیمروئی زاہد سلیم  ءَ دیوان ءَ جاری منصوبگ آنی جاور ھال آنی بابت ءَ سرپد کت۔ بنجاھی وزیر ءَ ھما محکمہ آناں ساڑات کہ آھاں دیمروئی منصوبگ وھد ءِ سر ءَ سرجم کتگ اَنت وھدیکہ ھما ادارگ آنی سر ءَ زھر ءِ درشانی کت کہ آھاں سست ءُ سستی ءِ درشان کتگ۔ آئی ءَ ھاسیں ھدایت کت کہ توامیں محکمہ جنوری ءَ تاں منظور بوتگیں اسکیم آناں سرجم بہ کن اَنت تانکہ السی گہبود منصوبگ آنی پائدگ وھد ءِ سر ءَ آھانی گور ءَ سر بہ بنت۔ دیوان ءَ را سرپدی دنت کہ گرین بس منصوبگ ءِ مزن کنگ ءِ سر ءَ کار زوال ءَ انت ءُ نوکیں گرین بس آنی گرگ ءِ کار سرجم بوتگ، اے اکتوبر ءِ دومی ہفتگ ءَ کراچی بندر ءَ سر بنت۔ بنجاھی وزیر ءَ ہدایت کت کہ گرین ءُ گلابی بس منصوبگ اکتوبر ءَ تاں سرجم کنگ بہ بنت۔ شہری آناں نوکیں سفری آسراتی پجاری ءِ واستہ گرین بس آنی کساس ءَ را گیش کنگ بیت، وھدیکہ زالبول آنی واستہ ھاسیں گلابی بس سروس ھم زوت بندات کنگ بیت۔ بلوچستان ءِ سر وزیر ءَ زالبول آناں معاشی رنگ ءَ بااختیار جوڑ کنگ ءِ جزم ءِ درشان کنان ءَ کار کنوکیں زالبول آناں آسانیں قسط آنی سر ءَ الیکٹرک بائیک پجارینگ ءِ پیسلہ ھم کتگ۔ آئی ءَ گوشت کہ صوبائی حکومت ءِ واھشت اِنت کہ زالبول آزات بہ بنت ءُ چاگردی ءُ اقتصادی پڑ ءَ سرگرمیں کرد ءَ پیلو بہ کن اَنت۔ آیوکیں بجٹ ءِ ھوالگ ءَ بنجاھی وزیر ءَ ہدایت کت کہ توامیں پیش کرتگیں اسکیم آنی منظوری مئی ءَ تاں سرجم کنگ بہ بیت تانکہ بجٹ ءِ جوڑ کنگ ءَ دیر مہ بیت ءُ منظور بوتگیں آناں بجٹ ءِ بھر جوڑ کنگ بہ بیت۔ آئی ءَ گوشت کہ دیمروئی منصوبگ آنی وھد ءِ سر ءَ سرجم کنگ ءُ دیمروئی ءِ سر ءَ سکیں نگرانی ءَ را بنجاھی وزیر انسپکشن ٹیم ءِ وسیلگ ءَ دل یکیمی کنگ بیت۔ بلوچستان ءِ سر وزیر سرفراز بگٹی ءَ گوشت کہ بلوچستان ءِ عام مردم ءِ جیڈھ آناں کم کنگ حکومت ءِ اولی کار انت ءُ توامیں محکمہ پبلک سروس ءَ را وتی کشک  جوڑ کنان ءَ بے دروریں  ءُ ذمہ واریں کرد پیلو کنگی انت۔