اقوام متحدہ ءِ تہا پاکستان ءِ تچکیں پسو ءَ ہندوستان ءَ "ناشرکاری ءِ پکوئیں  مجرم”   نامینتگ

اقوام متحدہ ۔28ستمبر  (اے پی پی):پاکستان ءَ اقوام متحدہ ءِ تہا بھارت ءِ نیمگ ءَ اے ملک ءِ ”ناشرکاری“ ءِ نام ءِ سرا سک باز مذمت کتگ ءُ اے گپ ءَ را سک شرمندگی ءُ کسانیں گپ لیک اتگ۔ اقوام متحدہ ءِ تہا پاکستان ءِ دومی سیکرٹری محمد راشد ءَ جنرل اسمبلی ءَ وتی پسو ءِ حق ءَ کارمرز کنان ءَ وتی ہندوستانی ہم منصب رینٹلا سرینواس ءِ بیان ءَ را ’’انتہائی شرمندگی‘‘ ءُ ’’بچّی‘‘ لیک اتگ۔ آئی ءَ وتی بیان ءَ گوشت کہ اے بے دروریں شرمندگی ءِ گپ اِنت کہ بھارت ءَ یک ملکے ءِ نام ءَ را ھراب کنگ ءِ واستہ انچیں کمیں تک ءَ جھک اِتگ کہ آ اقوام متحدہ ءِ باسک اِنت۔ یک حاکمیں ریاست ءِ نام ءِ سرا مسخرہ کنگ نہ ایوک ءَ بے شرپ اِنت بلکیں اے یک سرجمیں راجے ءِ توہین ءُ بدنام کنگ ءِ زانتگیں جہد اِنت۔ آئی ءَ گیش کرتگ کہ اے یک دمگی سیاسی مچی یے نہ اِنت، اے وڑیں بیانیہ ءِ تہ ءَ ھوار بوھگ ءَ بھارت وتی نام ءَ تاوان دیگ ءَ اِنت ءُ دگنیا ءَ را پیش دارگ ءَ اِنت کہ آئی ءِ گور ءَ ھچ وڑیں مھکمیں ثبوت نیست، ایوک ءَ ارزانیں چیز ھست کہ آ سنگینیں گپ ءُ تران ءِ لائق نہ اَنت۔ پاکستانی سفیر ءِ اے تُرندیں پسو ءِ سر ءَ بھارتی سیکرٹری ءَ گیشیں پسو نہ داتگ۔ محمد راشد ءَ گوشت کہ بھارت سرحد ءِ سر ءَ ناشرکاری ءِ کمک ءُ سرپرستی کنگ ءَ اِنت، آئی ءَ ایشی ءَ را بھارتی انٹیلی جنس ایجنسی آنی نیٹ ورک ءِ نام ءَ داتگ کہ ھمساھگیں ملک آناں بے رھبند کنگ ءِ تہ ءَ ھوار اَنت۔ آئی ءَ گوشت کہ اے رنگیں کارروائی بھارت ءِ انسداد ناشرکاری ءِ دعویٰ آنی تہ ءَ دو سٹینڈرڈ ءِ درشان ءَ کن اَنت۔ ایشی ءَ چہ پیسر پاکستانی سفارتکار ءَ بھارتی درئی کارانی وزیر ایس جے شنکر ءِ بیان ءِ سر ءَ ھم اعتراض کتگ کہ آئی ءَ پاکستان ءَ را ’’عالمی ناشرکاری ءِ مرکز‘‘ گْوشتگ۔ محمد راشد ءَ اے الزام ءَ را راستی ءَ چہ زبھر لیکگ ءَ گوشت کہ بھارت نہ ایوک ءَ ناشرکاری ءِ یک مدامیں مرتکبے بلکیں دمگی بدمعاش ھم اِنت کہ آ جنوبی ایشیا ءَ را وتی اجارہ داری ءِ عزائم ءُ انتہا پسندی ءِ نظریات ءِ یرغمال جوڑ کنگ ءَ اِنت۔ آئی ءَ گوشت کہ پاکستان ءَ ناشرکاری ءِ ھلاپ ءَ جنگ ءَ 90 ہزار ءَ چہ گیش مردم آنی جان قربان کتگ ایشی ءَ را میاں اوستمانی تک ءَ منگ بیت۔ آئی ءَ گیش گوشت کہ بھارت وت ناجائزیں رنگ ءَ مقبوضہ دمگ آنی سر ءَ قبضہ کنگ ءَ اِنت ءُ جموں ءُ کشمیر ءَ آئی ءَ بھارتی نیول افسر کلبھوشن جادھو ءِ نام ھم گپتگ کہ آ پاکستان ءَ جاسوسی ءِ تہ ءَ لال دست ءَ گپتگ۔ محمد راشد ءَ ھندوستان ءِ سر ءَ ھم ایراد گپتگ کہ آئی ءَ بے ثبوت ءَ پہلگام ءِ وئیل ءِ ذمہ واری پاکستان ءِ سر ءَ ایر کتگ ءُ گْوشتگ کہ ھر وھد ءَ کہ وئیلے بیت گڑا ھما دمان ءَ پاکستان ءِ سر ءَ بے ثبوت ءِ ذمہ واری ایر کنگ بیت۔ آئی ءَ مئی 2024 ءِ واقعہ ءِ ھم ھال داتگ کہ بھارت ءَ اے وئیل ءِ آڑ ءَ پاکستان ءِ سر ءَ زوراکی کتگ کہ ایشی ءِ آسر ءَ 54 بے گناھیں مردم بیران بوتگ اَنت کہ آھانی تہ ءَ زھگ ءُ جنین ھم ھوار اَنت۔ گڈسرا محمد راشد ءَ پاکستان ءِ امن ءِ ھاترا وتی عزم ءِ پدا زور دات ءُ گوشت کہ جنوبی ایشیا ءِ 1.9 ارب مردم وشھالی ءُ استحکام ءِ مستحق انت بلے اے مول ءُ مراد دھمکی ءُ ارش ءِ وسیلگ ءَ سرجم کنگ نہ بنت۔ آئی ءَ گوشت کہ راستیں دیمروئی ءِ واستہ مخلصی، یکے دومی ءِ احترام، گپ ءُ تران ءُ سفارتکاری ءِ ضلورت انت، ھما اصول کہ پاکستان ءَ مدام برجم داشتگ انت ءُ بھارت ءَ را ھم وتی کنگ لوٹ ایت۔