ملک ءُ راج ءِ ھزمت کنگ مئے اولی ترجی اِنت، زوت خیبر پختونخوا ءَ ھم بدلی کیت، وفاقی وزیر انجینئر امیر مقام ءِ گشگ اِنت

چارسدہ۔ 28 ستمبر (اے پی پی):وفاقی وزیر ءُ صدر پاکستان مسلم لیگ ءِ انجینئر امیر مقام ءَ گوشت کہ ملک ءُ راج ءِ ھزمت مئے اولی ترجی آنی تہ ءَ ھوار اِنت، زوت خیبر پختونخوا ءَ ھم بدلی کیت۔ آئی ءَ زوم ءِ وسیلگ ءَ چارسڈہ ءَ برجم داشتگیں مسلم لیگ یوتھ ونگ خیبر پختونخوا ءِ کنونشن ءَ گوں گشتانک دیگ ءَ ات۔ آئی ءَ یوتھ ونگ خیبر پختونخوا ءَ را سوبمندیں ورنا کنونشن آنی برجائی ءِ سر ءَ مبارک بات دات ءُ گوشت کہ ورنا آنی جوزگ ءُ جزبگ ءَ را وش اتک کنگ بیت، آئی ءَ گوشت کہ ما انسانیت ءِ واستہ مہر ءُ الس ءِ ھزمت ءِ جذبہ ءَ را دیم ءَ برگ ءِ کوشست ءَ کنگ ءَ ایں ۔ انجینئر امیر مقام ءَ لھتیں عناصر ءِ سر ءَ ایراد گپتگ ءُ گْوشتگ کہ لھتیں مردم بس پروپیگنڈا ءِ تہ ءَ ھوار اَنت وھدے کہ مسلم لیگ (ن) ءِ ایجنڈا ملک ءُ راج ءِ دیمروئی ءُ وشھالی اِنت۔ آئی ءَ گوشت کہ قائد نواز شریف ءِ سروکی ءَ ملک مدام دیمروئی ءِ کشک ءَ دیم ءَ شتگ، وھدیکہ مزن وزیر محمد شہباز شریف، پنجاب ءِ سر وزیر مریم نواز شریف ءُ مسلم لیگ (ن) ءِ سرجمیں سروکی ءِ اولی ترجی ملک ءَ وشھالی ءُ دیمروئی آرگ انت۔ انجینئر امیر مقام ءَ گوشت کہ زوت خیبر پختونخوا ءَ بدلی کیت ءُ دیمروئی ءِ نوکیں دور ءِ بندات بیت۔ آئی ءَ پارٹی ءِ کارکن ءُ ورنا آنی کوشست آناں ساڑاھگ ءَ گوشت کہ مسلم لیگ (ن) ءِ کلوہ ءَ ھمک گس ءَ سر کنگ ستا کرزیں گپ انت۔ آئی ءَ گوشت کہ مشکل ءِ اے ساھت ءَ سیلاب ءِ آماچیں مردم تہنا نہ اَنت، وفاقی حکومت آھانی ھمراہی ءَ اوشتاتگ، مزن وزیر شہباز شریف وت سیلاب ءِ جاور ھال ءُ گلگت بلتستان ءَ ھوار سرجمیں ملک ءَ ودی بوتگیں جاور ھال آنی سر ءَ چار ءُ تپاسی کنگ ءَ اِنت۔