جرمن سفیر ءَ بنجاھی وزیر مریم نواز ءَ گوں گند ءُ نند کتگ، گوستگیں سیلاب ءِ ھوالگ ءَ جرمنی ءِ وھد ءِ سر ءَ یکوئی ءُ جنگل   آنی گیش کنگ ءَ را   ساڑاتگ

لاہور۔28ستمبر  (اے پی پی):جرمنی ءِ سفیر انا لپل ءَ سر وزیر پنجاب مریم نواز ءَ گوں یک شمبے ءِ روچ ءَ گند ءُ نند کت۔ بنجاھی وزیر ءَ جرمنی ءِ سفیر انا لپل ءَ را وش اتک کت ءُ گوستگیں سیلاب ءَ پد جرمنی ءِ وھد ءُ پاس ءِ یکوئی، نوکیں کشت ءُ کشاری ٹیکنالوجی، سبز ٹیکنالوجی ءُ جنگل کاری ءِ تہ ءَ کمک ءِ ساڑات۔ آئی ءَ ہنرمندیں مردمی قوت ءِ تبادلہ ءُ جرمنی ءِ دوئیں پیشہ وارانہ تربیت ءِ ماڈل ءِ سرا گیشیں کمک ءِ وش آتک کت۔ گند ءُ نند ءِ ساھت ءَ بنجاھی وزیر مریم نواز ءَ گوشت کہ جرمنی موسمی مٹ ءُ بدلی، زالبول آنی باوقات کنگ، چاگردی رکھینگ ءُ انسانی دیمروئی ءَ گوں گر ءُ چیل بوھگ ءَ پاکستان ءِ مزنیں وھد ءِ شریک انت۔ نومبر ءَ پاکستان ءُ جرمنی ءِ نیام ءَ جی ٹو جی ءِ گپ ءُ تران شریکی ءَ را گیش مھکم کنت۔ آئی ءَ گوشت کہ منی وژن وشھال ءُ نوکیں پنجاب اِنت کہ اودا ھمک شہری بااختیار کنگ بہ بیت۔ جرمنی اے واب ءِ پیلو کنگ ءَ یک ھاسیں شریک بوت کنت۔ 2024 ءَ پاکستان ءُ جرمنی ءِ نیام ءَ دو نیمگی تجارت 3.63ارب امریکی ڈالر بوتگ وھدیکہ پاکستان ءِ تجارتی توازن جوان بوتگ۔ 40 جرمن کمپنی پیسر ءَ چہ پاکستان ءَ کار کنگ ءَ انت ءُ گیش روزگار ءِ موہ پیداک کنگ ءَ انت۔ بنجاھی وزیر ءَ گوشت کہ صوبگ ءَ چاگرد ءِ رکھینگ منی اولی ترجی انت۔ حالی تباہ کنوکیں سیلاب ءُ سرحد ءِ سرا بوتگیں دھند مئے واستہ مزنیں چیلنج انت۔ گند ءُ نند ءَ وانگ ءُ زانگ ءِ دیمروئی، جرمنی ءَ وانگ ءَ پاکستانی نودربرانی تہ ءَ گیشی ءُ نصاب ءِ تہ ءَ نوآبادیاتی ءِ سر ءَ ھم گپ ءُ تران کنگ بوت۔ بنجاھی وزیر ءَ لاہور ءَ انا میری شمل ہاؤس ءِ ازمت آناں ساڑات۔ آئی ءَ گوشت کہ پاکستان ءَ لیب ءُ گوازی ءِ دیمروئی ءِ واستہ جرمنی ءِ کمک ستا کرز انت۔ حالی ءَ جرمن جونیئر ہاکی ٹیم ءَ لاہور ءِ تر ءُ تاب کتگ۔ ما گیشتریں اسپورٹس ایکسچینج ءُ کوچنگ ءِ موہ ءِ منت وار ایں ۔ پنجاب جرمنی ءِ گوما وتی سیادی ءَ را ارزشت دنت۔ آئی ءَ گوشت کہ واسا ءَ را 4 ضلع ءَ چہ 23 ضلع آنی تہ ءَ مزن کنگ بوھگ ءَ انت۔ صفائی ءِ ھاتر ءَ واسا ءُ کلین پنجاب ءِ وڑیں ادارگاں الس ءِ زندمان شرتر کتگ۔ آئی ءَ گوشت کہ سئے دریا آنی تہ ءَ یکیں وھد ءَ مزنیں کچے ءَ سیلاب ءُ سئے ماہ ءَ مُدام ھور ءِ سبب ءَ پنجاب ءَ مستریں سیلاب بوتگ۔ پنجاب حکومت ءِ وھد ءِ سر ءَ یلہ کنگ ءُ ریسکیو ریلیف آپریشن ءَ چہ لاکھوں مردم آنی جان ءِ رکّینگ ممکن بوتگ۔ انسان ءِ ہمراہی ءَ جناورانی جان ہم رکّینگ بوت۔ 2.2 ملین گاو چہ سیلاب ءِ آماچیں دمگاں امنیں جاھاں شنگ کنگ بوتگ اَنت۔ سیلاب ءِ وھد ءَ پنجاب سرکار ءَ کجام محنت ءَ گوں کار کتگ آ پنجاب سرکار ءِ نشان اِنت۔ مریم نواز ءَ گوشت کہ سیلاب ءَ آماچیں دمگ آنی تہ ءَ ھمک مردم ءَ را دل یکیمی بوتگ کہ حکومت مئے ھمراہ انت ءُ مئے کمک ءَ کنت۔ سیلاب ءِ آماچیں مردماں جاہ ءُ جاہ، ورگ، ھشکیں راشن، نادراھجاہ، جانور ءِ ڈسپینسری ءُ چارہ ءِ آسراتی دیگ بوتگ۔ فیلڈ ہسپتال، سائٹ ءِ کلینک ءُ سیلاب ریلیف کیمپانی تہا ہیلتھ کاؤنٹراں بازیں نادراہیانی دیم ءَ دارگ ممکن کتگ۔ دومی نیمگ ءَ جرمن سفیر ءَ واسا ایکسپو ءِ تر ءُ تاب کتگ ءُ ایکسپو ءَ را ستا کرزیں لیک اتگ۔ جرمن سفیر ءَ گشتگ کہ پنجاب ءِ جتا جتائیں میتگانی دمگاں سیلاب سک باز بوتگ بلے سرکار ءَ سک باز جوانیں کار کتگ۔