مزن وزیر محمد شہباز شریف ءِ گشگ انت کہ زانتکاری ءِ رسگ نہ ایوک ءَ جمہوری حق انت بلکیں شفافیت، احتساب ءُ الس ءِ بااختیار کنگ ءِ ھاتر ءَ یک طاقتوریں وسیلہ یے انت، مارا زانتکاری ءِ جہانی رسائی ءِ رکھینگ ءِ ھاتر ءَ یکجاہ کار کنگی انت

اسلام آباد۔28ستمبر  (اے پی پی):مزن وزیر محمد شہباز شریف ءَ گوشت کہ زانتکاری ءِ رسگ ایوک ءَ جمہوری ھک نہ اِنت بلکیں شفافیت، احتساب ءُ الس ءِ بااختیار کنگ ءِ واستہ یک زوراکیں وسیلہ یے ھم اِنت، مارا یکجائی ءَ زانتکاری ءِ سرجمیں رسائی ءِ رکھینگ ءُ دیمروئی ءِ واستہ کار کنگی اِنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ زانتکاری ءِ رسائی ءِ جھان ءِ روچ ءِ موہ ءَ وتی کلوہ ءِ تہ ءَ گوشت کہ پاکستان ءِ حکومت ھمک شہری ءِ زانتکاری ءِ شوھازگ، رسگ ءُ پجارینگ ءِ بنیاتی ھک ءَ را بے دروریں رنگ ءَ منگ ءَ انت۔ اھوالکاری ءِ دسترس نہ ایوک ءَ جمہوری حق اِنت بلکیں شفافیت، احتساب ءُ راجمانی حاکمیت ءِ ھاتر ءَ یک طاقتوریں وسیلہ یے ھم اِنت۔ مرچیگیں یکے دومی ءَ گوں بندوکیں دنیا ءَ زانتکاری ءِ آزاتیں روانی نہ ایوک ءَ نیکیں حکومت داری ءَ را مھکم کنت بلکیں چاگردی شمولیت ءَ را ھم دیم ءَ برگ ءَ اِنت ءُ ریاست ءُ آئی ءِ راج ءِ نیام ءَ اعتماد ءِ جوڑ کنگ ءَ اِنت۔ آئی ءَ گوشت کہ ایوک ءَ سرپدیں چاگرد آنی وسیلگ ءَ راج امن، انصاف ءُ برجمیں دیمروئی ءِ نیمگ ءَ شت کن اَنت۔ آئی ءَ گوشت کہ پاکستان ءَ کانودی ءُ ادارگی اصلاحات ءِ وسیلگ ءَ شہری آنی ھال ءُ اھوال ءِ ھک ءِ ضمانت ءِ واستہ ٹھوس گامگیج چست کتگ۔ ما اے گپ ءِ سر ءَ دل یکیمی کنگ ءِ ھاترا جزم ایں کہ ڈیجیٹل دور ءَ زالبول، ورنا ءُ نزوریں گلاں ھوار چاگرد ءِ درستیں تک ءُ پھناتاں زانتکاری ءِ یک پیمیں رسائی ءِ ھاترا وشھالی رس ایت۔ آئی ءَ گوشت کہ پاکستان انفارمیشن کمیشن رائٹ ٹو ایکسیس ایکٹ 2017 ءِ چیر دستی ءَ یک نیم عدالت ءِ فورم اِنت، ایشی ءِ تہ ءَ زانتکاری ءِ رسائی ءِ پجارینگ ءُ شہری آنی شکایت آناں گیواری کنگ بیت۔ مزن وزیر ءَ گوشت کہ ڈیجیٹلائزیشن ءِ عمل ھم بنگیج کنگ بوتگ تانکہ سرکاری ریکارڈ ءِ رکھینگ ءُ ایشی ءِ دسترس ءَ را آسان جوڑ کنگ بہ بیت۔ آئی ءَ سرکاری ادارگ، سول سوسائٹی، میڈیا ءُ ٹیکنالوجی پلیٹ فارم ءَ ھوار درستیں سٹیک ہولڈراں چہ اپیل کت کہ آ یکجاھیں رنگ ءَ گیش پچیں، شفاف ءُ زانت ءِ سر ءَ بنیات ءِ چاگرد ءِ جوڑ کنگ ءِ ھاترا کار بہ کن اَنت۔ اے کار ءَ چہ ما وتی راج ءَ را توانمند کن ایں، وتی جمہوریت ءَ را مھکم کن ایں ءُ پاکستان ءِ دیمروئی ءُ وشھالی ءِ نیمگ ءَ سفر ءَ را ترند کن ایں ۔ آئی ءَ گوشت کہ مارا اے روچ ءَ وتی عزم ءِ نوک کنگ لوٹ ایت تانکہ درست آنی آسراتی ءِ واستہ جھان ءِ رسائی ءَ را رکھینگ ءُ دیمروئی کنگ بہ بیت۔