ورنائیں ڈاکٹر راج ءِ ارزشتی ایں اثاثہ ءُ وشیں آیوکیں وھد انت، وفاقی کانود ءِ وزیر اعظم نظیر تارڑ ءَ پاکستان ءِ کالج آف فزیشنز اینڈ سرجنز ءِ کانووکیشن ءَ گوں تران کنان ءَ

لاہور۔27ستمبر  (اے پی پی):کانود ءُ انصاف ءِ وفاقی وزیر سینیٹر اعظم نظیر تارڑ ءَ گوشت کہ ورنا ڈاکٹر ملک ءِ ارزشتی ایں اثاثہ ءُ مئے رژنائیں آیوکیں باندات انت۔ طبی پڑ ءَ گوں ھمگرنچیں مردم ھر روچ نوکیں چکاس ءُ چیلنج ءِ آماچ بنت بلے وتی محنت، جزم ءُ لگن ءِ وسیلگ ءَ آ نہ ایوک ءَ انسانی جاناں رکّین اَنت بلکیں ملک ءُ راج ءِ ھزمت ءِ مقدسیں فرض ءَ ھم پیلو کنگ ءَ اَنت۔ آئی ءَ اے ھیالانی درشانی شمبے ءِ روچ ءَ پاکستان ءِ کالج آف فزیشنز اینڈ سرجن ءِ 58می کانووکیشن مراگش ءَ یک دمگی ھوٹلے ءَ گشتانک دیان ءَ کت۔ مراگش ءَ گریجویشن کنوکیں ڈاکٹر، آہانی مات ءُ پت، فیکلٹی ءِ باسک، طبی ماہرین ءُ دگہ شرپداریں مہماناں مزنیں کساسے ءَ بہر زرتگ ات۔ اے موہ ءِ سرءَ صوبائی جان سلامتی ءِ وزیر پنجاب خواجہ سلمان رفیق، خواجہ عمران نظیر، سی پی ایس پی ءِ صدر پروفیسر خالد مسعود گونڈل، پروفیسر ڈاکٹر راشد لطیف، پروفیسر فرید ظفر ءُ اے دگہ نامداریں مردم ہم ساڑی اتنت۔ وفاقی وزیر سینیٹر اعظم نظیر تارڑ ءَ وتی گشتانک ءِ تہ سی پی ایس پی ءِ ازمت ساڑاتگ ءُ گوشت کہ پاکستان ءِ کالج آف فزیشنز اینڈ سرجن آنی کوالٹی کجام ھم میاں اوستمانی ادارگ ءَ چہ کم نہ اِنت۔ اے ادارہ ءِ گریجویٹ سرجمیں دگنیا ءَ پاکستان ءَ نامدار کنگ ءَ انت ءُ آہانی ازمت طب ءِ دنیا ءَ فراموش نہ بنت کہ اے ادارہ ءِ سوبمندی ءِ پدریں ثبوت انت ۔ اعظم نظیر تارڑ ءَ وتی کلوہ ءِ تہ ءَ پاکستان ءِ راجدپتری سومانی آنی بابت ءَ ھم گپ جتگ ۔ آئی ءَ گوشت کہ 10مئی ءِ روچ پاکستان ءِ راجدپتر ءَ یک رژنائیں روچ ءِ رنگ ءَ مدام یات کنگ بیت۔ پاکستان ءَ چہ وت مستریں ملکے ءَ انچیں سبقے دات کہ آئی ءَ داں دیراں یات بیت۔ پاکستان ءَ را سرجمیں دگنیا ءَ بے دروریں عزت ءُ شرپ رستگ ءُ سرجمیں راج ءَ دژمن ءِ ھلاپ ءَ یک سیسہ ءِ دیوال ءِ بستار ءَ ثابت کتگ۔ آئی ءَ گیش تران کت کہ اللہ تعالیٰ پاکستان ءَ را دو حاکم مسجد ءِ ازمت ءِ ہما مزنیں شرپ ءَ داتگ ایشی ءَ چہ سرجمیں پاکستانی راج ءَ را فخر کتگ۔ وفاقی وزیر ءَ گوشت کہ دفاع ءِ تہ ءَ اے وڑیں مزنیں سوبمندی ءَ چہ پد ملک ءِ دیمروئی ءُ وشھالی ءِ واستہ نوں ھرکس وتی کرد ءَ پیلو کنگ المی اِنت۔ مارا درستاں یکجائی ءَ پاکستان ءَ را دیمروئی ءِ بالاد ءَ سر کنگ ءِ واستہ کار کنگی اِنت ءُ ایشی ءِ تہ ءَ میڈیکل سیکٹر کلیدی کرد پیلو کت کنت۔ اعظم نظیر تارڑ ءَ گوشت کہ حکومت طبی شوبگ ءِ دیمروئی ءِ واستہ مزنیں کوشست کنگ ءَ انت ۔ مزن وزیر محمد شہباز شریف ءِ ہدایت ءِ سرا اسلام آباد ءَ جناح میڈیکل انسٹیٹیوٹ جوڑ کنگ بوہگ ءَ انت کہ اے ملک ءِ میڈیکل شوبگ ءَ یک ھاسیں سنگ میل ءِ ثابت بیت۔ اے گپ ءِ ھمراھی ءَ وفاقی حکومت صوبہ آں گوں شور ءُ سلاھ ءَ پد یک سد ارب کلدار ءِ ھرچ ءُ درچ ءَ ھپاتائٹس ءِ ھلاسی ءِ ھاترا یک جامع منصوبگ ءِ بندات کنگ ءَ اِنت۔ اے منصوبگاں چہ نا ایوک ءَ جان سلامتی ءِ آسراتی گہتر بنت بلکینگ ءَ لکاں مردم آنی جان ءِ رکھینگ ھم بیت۔ آئی ءَ گوشت کہ جان سلامتی ءِ شوبگ انسانی ازمت ءِ مستریں شوبگ انت۔ ایشی ءِ تہا کار کنوکیں ہر مردم ءَ نہ ایوک ءَ دعا رسیت بلکیں وتی پیشہ وارانہ سوبمندی ءِ ہمراہی ءَ ملک ءُ قوم ءِ دیمروئی ءِ تہا ہم مزنیں کردے پیلو کنت۔ کانووکیشن ءِ تہا ایندگہ گشتانک دیوکاں ہم وتی حیالات درشان کتگ انت۔ صوبائی جان سلامتی ءِ وزیر خواجہ سلمان رفیق ءَ گوشت کہ پنجاب حکومت طبی وانگ ءُ زانگ ءُ جان سلامتی ءِ آسراتی آناں گیش گہتر کنگ ءِ واستہ جزمیگ انت۔ ما ورنائیں ڈاکٹر آناں نوکیں ٹیکنالوجی ءُ تربیت ءِ پھجارینگ ءَ چہ ملک ءَ را جان سلامت کنگ لوٹ ایں ۔ خواجہ عمران نظیر ءَ وتی گشتانک ءِ تہ ءَ گوشت کہ سی پی ایس پی ءِ وڑیں ادارگ مئے واستہ فخر ءِ وسیلگ اَنت، ءُ ما صوبائی تک ءَ اے وڑیں ادارگ آناں کمک ءَ برجاہ دار ایں ۔ پروفیسر ڈاکٹر راشد لطیف ءَ ورنائیں ڈاکٹر آناں پنت ءُ شون کت کہ طب یک مدامیں وانگ ءِ عمل اِنت، مدام نوکیں پٹ ءُ پول ءُ نادراہ ءِ ھزمت ءَ را اولیت بہ دئے اِت۔ مراگش ءِ گڈسرا گریجویشن کنوکیں ڈاکٹراں کہ آہاں جوانیں کارکردگی پیش داشتگ ات آہاں میڈل، سرٹیفکیٹ ءُ ھاسیں داد دیگ بوتگ ات۔ گریجویشن کنوکیں ڈاکٹراں اے پی پی ءَ گوں گپ ءُ تران کنان ءَ گوشت کہ اے روچ آھانی زند ءِ یک یاتگاریں ساھتے، ءُ آ ملک ءِ ھزمت ءَ تیار اَنت۔