پاکستان ءَ اقوام متحدہ ءِ جنرل اسمبلی ءَ بھارت ءِ الزام رد کتگ، بھارت ءِ منافقت بے درور کتگ، بھارت جموں ءُ کشمیر ءَ ناشرکاری ءِ مالی کمک، رازداریں نیٹ ورک ءُ ناشرکاری ءِ کاراں چہ دیم ءَ شُت نہ کنت، پاکستانی سفارتکار

نیو یارک۔27ستمبر  (اے پی پی):پاکستان ءَ اقوام متحدہ ءِ جنرل اسمبلی ءَ ناشرکاری ءِ ھوالگ ءَ بھارت ءِ جتگیں بھتام سک رد کتگ ءُ گوشتگ کہ بھارت وت ملک ءُ درملک ءَ ریاستی ناشرکاری ءَ را یک پالیسی یے ءِ رنگ ءَ کارمرد کنت۔ بھارتی نمائندہ پٹیل گہلوت ءِ الزام آنی پسو ءَ پاکستانی مشن ءِ کونسلر سیمہ سلیم ءَ گوشت کہ بھارت ءِ منافقت پدر بوتگ، آ دگہ پاکستان ءَ ناشرکاری ءِ مالی کمک، وتی رازداریں نیٹ ورک ءُ جموں کشمیر ءَ ناشرکاری کاروائی آناں پُشدر کت نہ کنت۔ پاکستانی سفارتکار ءَ گوشت کہ بھارت ءَ ٹی ٹی پی، بی ایل اے ءُ مجید بریگیڈ ءِ وڑیں وتی پراکسی آنی وسیلگ ءَ نہ ایوک ءَ ناشرکاری ءِ وسیلگ ءَ ھزاراں بے گناھیں پاکستانی شھید کتگ اَنت بلکیں عبادت جاہ، وانگ ءُ زانگ ءِ ادارگ ءُ روزگار ءِ مراگش ھم ھون ریچی ءِ آماچ کتگ اَنت۔ سائیمہ سلیم ءَ گوشت کہ پاکستان ءَ نہ ایوک ءَ پہلگام ءِ وئیل ءِ مذمت کتگ بلکینگ ءَ ایشی ءِ آزات، بے رھبند ءُ شُھازگیں پٹ ءُ پول ءِ لوٹ ھم کتگ۔ آئی ءَ گوشت کہ بھارت ءَ اگاں چیر کنگ ءِ ھچ چیز مہ بوتیں گڈا آ اے رنگیں پٹ ءُ پول ءَ رازیگ بوتگ ات۔ آئی ءَ گیش گوشت کہ بھارت ءَ یک نیمگی سندھ ءِ آپانی معاہدے ءِ مھتل کنگ ءَ اے گپ پدر کتگ کہ آ یک انچیں ملکے کہ آ میاں اوستمانی کانود آنی ھلاپ ورزی ءَ کنت، آ آپ ءَ را سلاہ ءِ رنگ ءَ کارمرد کنان ءَ دمگی امن ءَ را ھترناک کنگ ءَ اِنت ءُ لاکھوں مردم آناں آپ ءِ ھک ءَ چہ زبھر کنگ ءَ اِنت۔ سائمہ سلیم ءَ گشتگ کہ آر ایس ایس ءُ بی جے پی ءِ اثر ءِ چیر ءَ ہندوستان ءَ مسلمان وتی ایمان ءِ سبب ءَ کُشگ بنت، عیسائی وتی عبادت ءِ ھاتر ءَ نشانگ جوڑ کنگ بنت، سکھ پجار ءِ بنیاد ءَ بے شرپ کنگ بنت ءُ دلت ذات پات ءِ بنیاد ءَ بے شرپ کنگ بنت۔ آئی ءَ گوشت کہ دگنیا ءَ گجرات شموشت نہ کتگ کہ اودا ریاستی سرپرستی ءَ ھزاراں مسلمان کشگ بوتگ اَنت، دہلی کہ اودا پولیس تماشائی بوتگ ءُ منی پور کہ اودا سداں مردم کشگ بوتگ ءُ ھزاراں بے لوگ بوتگ اَنت۔ ہندوستان ءِ ریکارڈ چہ ھون ءُ نفرت انگیزیں بیانیہ ءَ پُر اِنت کہ ایشی ءِ تہا نسل کشی ءُ اسلاموفوبیا ءَ را قانونی ءُ سیاسی رکھینگ دیگ بیت۔ پاکستانی نمائندہ ءَ گیش گوشت کہ بھارت وتی ھمساھگاں ترسینت کنت، دمگ ءَ کمک ءِ دیم ءَ دار ایت، درملک ءَ غیر عدالت کشتار کنت ءُ دمگ ءِ بے رھبند کنگ ءِ ھاترا پراکسی آناں مالی کمک دنت۔ اے نوکیں ہندوستان اِنت، ملک ءَ اسلاموفوبیا ءُ درملک ءَ جارحیت، ہندوتوا ءِ نظریہ ءِ بُن ھشت اِنت۔ جموں ءُ کشمیر ءِ حوالہ ءَ آئی ءَ گوشت کہ اے کدی بھارت ءِ بھر نہ بوتگ ءُ بھارت ءَ اودا 9لکھ سپاھیگ ایر کتگ ءُ ایشی ءَ را دگنیا ءِ مزنیں فوجی کیمپ جوڑ کتگ۔ اودا ظلم ءُ زوراکی ءِ رہبند اِنت کہ ایشی ءِ تہا سختیں قانون، جعلی مقابلہ، زبردستی بیگواہ کنگ، مزنیں کساسے ءَ قبر، غیر عدالت ءِ کشتار، منظم جنسی زوراکی ءُ میڈیا ءِ بلیک آؤٹ ھوار اَنت۔ آئی ءَ گوشت کہ پاکستان بھارت ءِ منافقت، جموں ءُ کشمیر ءِ سر ءَ قبضہ، انسانی ھک آنی لگتمالی ءُ آئی ءِ دروگیں پروپیگنڈا مہم ءِ پدر کنگ ءَ برجاہ دار ایت۔ کشمیری راج ءَ را انصاف، شرپ ءُ آجوئی رس ایت ءُ آ یک روچے وتی وت واجہی ءِ حق ءِ وسیلگ ءَ آجوئی ءَ را المی ءَ رس ایت۔