پاک بحریہ وار کالج لاہور ءَ ’بحر ہند ءِ تہا اسٹریٹجک   رد بندی ‘ ءِ کانفرنس ءِ میزبانی کتگ

اسلام آباد۔27ستمبر  (اے پی پی):پاک بحریہ وار کالج لاہور ءَ ’بحر ہند ءِ تہ ءَ اسٹریٹجک الائنمنٹ‘ ءِ سر ءَ کانفرنس ءِ میزبانی کت۔ اے دیوان ءِ بندوبست میری ٹائم سینٹر آف ایکسیلنس ءِ نیمگ ءَ کنگ بوتگ۔ اے دیوان ءَ مزنیں کساسے ءَ دفاعی کارندہ، سفارتکار، زانتکار ءُ نودربراں بہر زرتگ۔ کانفرنس ءِ تہ ءَ راجی ایمنی ءُ دمگی امن ءِ وڑیں ھاسیں بنگپ آنی سر ءَ گپ ءُ تران کنگ بوت۔ کانفرنس ءَ بحر ہند ءِ مزنیں طاقت آنی نیام ءَ کش ءُ چیل، نوکیں ٹیکنالوجی ءِ اثر ءُ پاکستان ءِ حکمت عملی ءِ بابت ءَ گپ ءُ تران کنگ بوت۔ پیسریگیں چیئرمین جوائنٹ چیفس آف اسٹاف کمیٹی جنرل (ریٹائرڈ) زبیر محمود حیات ءَ بھارت ءَ را ھال داتگ کہ پاکستان ءِ سر ءَ دریا ءَ چہ ھرچ وڑیں زوراکی ءِ پسو زوت، نا متوقع ءُ موثر بیت۔ پیسریگیں وزیر ءِ درئی کار حنا ربانی خار ءَ بحر ہند ءِ چیلنج آنی گیواری ءِ واستہ دمگی کمک ءُ سفارتی کوشست ءُ کثیر نیمگی یکوئی ءِ ضلورت ءِ سر ءَ زور پر دات۔ کانفرنس ءِ بہر زوروکاں پاکستان ءِ موقف ءَ را مھکم ءُ کارآمد لیک اتگ۔