مزن وزیر ءَ امریکی صدر ءَ گوں پاک اُرد ءِ سروک ءَ گند ءُ نند کتگ ، ٹرمپ امن ءِ چیمپئن اِنت ، آئی ءِ برکت ءَ پاکستان ءُ ھندوستان ءِ نیام ءَ جنگ بندی ممکن بوتگ ، پاک ءُ امریکہ ءِ سیادی گیش مھکم بنت ، شہباز شریف

واشنگٹن۔26ستمبر  (اے پی پی): مزن وزیر محمد شہباز شریف ءَ امریکی صدر ڈونلڈ ٹرمپ ءَ را امن ءِ چیمپئن لیک اتگ ءُ گشتگ آئی ءِ برکت ءَ پاکستان ءُ ہندوستان ءِ نیام ءَ جنگ بندی ممکن بوتگ، آئی ءِ سروکی ءَ پاک ءُ امریکہ ءِ سیادی گیش مھکم بنت۔ مزن وزیر ءَ امریکی کمپنی آناں پاکستان ءِ کشت ءُ کشاری، انفارمیشن ٹیکنالوجی، معدنیات ءُ توان ءِ شوبگ آنی تہ ءَ سرمایہ کاری ءِ دعوت دات ءُ دوئیں ملک آنی نیام ءَ سیکورٹی ءُ انٹیلی جنس کمک ءَ را گیش ودینگ ءِ سر ءَ زور پر دات۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ وائٹ ہاؤس ءَ امریکی صدر ڈونلڈ جے ٹرمپ ءَ گوں گند ءُ نند کتگ، ایشی ءِ تہ ءَ پاک فوج ءِ سروک فیلڈ مارشل سید عاصم منیر، نشان امتیاز (ملٹری)، ہلال جرات ھم ھوار بوتگ۔ بیان ءِ رد ءَ اے گند ءُ نند سک گرم ءُ وشیں چاگرد ءَ بوت۔ مزن وزیر ءَ صدر ڈونلڈ ٹرمپ ءَ را ’’امن ءِ بردار‘‘ لیک اِتگ ءُ سرجمیں دگنیا ءَ جیڈھ آناں ھلاسی ءِ واستہ آئی ءِ مخلصانہ کوشست آناں ساڑاتگ۔ آئی ءَ صدر ٹرمپ ءِ دلیری ءُ فیصلہ کنوکیں سروکی ءِ توسیپ کت کہ آئی ءَ پاکستان ءُ بھارت ءِ نیام ءَ جنگ بندی ممکن کتگ ءُ دمگ ءَ را مزنیں بحران ءَ چہ رکینتگ۔ میاں اوستمانی جاور ھال آنی سر ءَ تران کنان ءَ مزن وزیر ءَ غزہ ءَ ترندیں جنگ بندی ءُ امن ءِ واستہ صدر ڈونلڈ ٹرمپ ءِ کوشست آناں ساڑات ، ھاسیں رنگ ءَ آئی ءَ اے ھپتگ ءَ نیویارک ءَ مسلمانیں دگنیا ءِ سروک آناں غزہ ءُ مغربی کنارہ ءَ ھوار میاں اوستمانی تہ ءَ امن ءِ بحالی ءِ واستہ سرجمیں شور ءُ سلاھ ءِ دعوت داتگ۔ مزن وزیر ءَ اے سال ءِ بندات ءَ پاکستان ءُ امریکہ ءِ نیام ءَ بوتگیں ٹیرف ءِ بندوبست ءِ سر ءَ صدر ٹرمپ ءِ ھم شگر ءُ منت گپت۔ آئی ءَ پاکستان ءُ امریکا ءِ نیام ءَ دیریں وھد ءِ شریکداری ءِ بابت ءَ گپ گوشت ءُ اے امیت سہرا کت کہ صدر ٹرمپ ءِ سروکی ءَ دوئیں ملک آنی وت مہ وتی نپ ءِ تہ ءَ پاکستان ءُ امریکا ءِ سیادی گیش مھکم بنت۔ اے موہ ءِ سر ءَ آئی ءَ امریکی کمپنی آناں پاکستان ءِ کشت ءُ کشاری، انفارمیشن ٹیکنالوجی، معدنیات ءُ توان ءِ شوبگ آنی تہ ءَ سرمایہ کاری ءِ دعوت دات۔ دوئیں بامرد آنی نیام ءَ دمگی ایمنی ءُ ناشرکاری ءِ ھلاپ ءَ جنگ ءِ ھوالگ ءَ کمک ءَ را گیش کنگ ءِ سر ءَ ھم ھیال ریچی کنگ بوت۔ مزن وزیر ءَ ناشرکاری ءِ ھلاپ ءَ پاکستان ءِ کرد ءِ واستہ پچیں کمک ءِ سر ءَ صدر ٹرمپ ءِ شگر ءُ منت گپت ءُ سیکورٹی ءُ انٹیلی جنس کمک ءَ را گیش ودینگ ءِ ضلورت ءِ سر ءَ زور پر دات۔ بیان ءِ رد ءَ مزن وزیر ءَ صدر ڈونلڈ ٹرمپ ءَ را ھم جوانیں وھد ءَ پاکستان ءِ سرکاری تر ءُ تاب ءِ دعوت داتگ۔