وزیراعظم شہباز شریف نا پاکستان اسٹاک ایکسچینج نا اسہ لکھ 60 ہزار پوائنٹ نا تاریخی کچ ءِ عبور کننگ آ خوشی نا درشان

واشنگٹن۔ 26 ستمبر (اے پی پی) وزیراعظم محمد شہباز شریف پاکستان اسٹاک ایکسچینج نا اسہ لکھ 60 ہزار پوائنٹ نا تاریخی کچ ءِ عبور کننگ آ خوشی نا درشانی ءِ کرساپارینے کہ ملک زرگزرانی سوگوی آن پد زرگزرانی شونداری نا کنڈآ ہِننگ ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ اللہ تعالیٰ نا فضل و کرم ، کاروباری برادری و حکومت نا سخت خواری آن اسٹاک ایکسچینج اٹی ہردے بڑزی تا اسہ پوسکن ءُ تاریخ اس نوشتہ مننگ ءِ، پاکستان اسٹاک ایکسچینج نا اسہ لکھ 60 ہزار پوائنٹ نا کچ ءِ عبور کننگ کاروباری برادری نا حکومتی پالیسی تیا پت انا درشانی ءِ۔ وزیراعظم پارے کہ ملک زرگزرانی سوگوی آن پد زرگزرانی شونداری نا کنڈآ ہِننگ ءِ، انشاء اللہ داسہ زرگزرانی شونداری نا سفر ترندی اٹ برجاسلک۔