وزیراعظم نا پاک فوج انا سروک تون امریکی صدر تون اوڑدہی، ٹرمپ امن نا علمبردار، اونا سوب پاکستان وبھارت اٹی جنگ بندی ممکن مس، پاک امریکہ تعلقداری پین سوگو مریک، شہباز شریف

واشنگٹن۔ 26 ستمبر (اے پی پی) وزیراعظم محمد شہباز شریف امریکی صدر ڈونلڈ ٹرمپ ءِ امن نا علمبردار گوندسا پارینے کہ اونا سوب پاکستان وبھارت نا نیام اٹ جنگ بندی ممکن مس، اونا کماشی ٹی پاک امریکہ تعلقداری پین سوگومریک، وزیراعظم امریکی کمپنی تے پاکستان نا کشت وکشار ، انفارمیشن ٹیکنالوجی، معدنیات و توانائی نا بشخ آتیٹی زرکاری نا سلہ خلک و ہڑتوم آملک آتا نیام اٹ سیکورٹی و انٹیلی جنس کمکاری ءِ پین ودفنگ آ زور شاغا۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف وائٹ ہاؤس اٹی امریکی صدر ڈونلڈ جے ٹرمپ اتون اوڑدہی کرے ہراٹی پاک فوج انا سروک فیلڈ مارشل سیدعاصم منیر نشانِ امتیاز (ملٹری) ، ہلالِ جرات ہم ساڑی ئس۔ بیان نا رداٹ اوڑدہی بھاز پرتپاک و خوشگوار چاگڑد اٹی مس۔ وزیراعظم صدر ڈونلڈ ٹرمپ ءِ ’’امن نا علمبردار‘‘ گوندسا مچ آ ملک اٹی جھیڑہ غاتا چٹفنگ کن اونا مخلصانہ کوشست آتا ستاءِ کرے۔ اوصدر ٹرمپ انا جیرت مندانہ و فیصلہ کن سرکڑدہ ئی نا ستاءِ کرے ہرانا سوب پاکستان وبھارت نا نیام اٹ جنگ بندی ممکن مس و ڈیہہ اسہ بھلو تنکی سے آن بچا۔ وزیراعظم دے ٹک نیامی نا حالیت آتیا گپ وتران کرسا غزہ ٹی دمدستی جنگ بندی و امن نا قیام کن صدر ڈونلڈ ٹرمپ انا کوشست خاص کر برجاہفتہ نیویارک اٹی مسلم دنیا نا راہشون تے غزہ و دیکی کنارہ تون اوار دے ٹک نیامی ٹی امن نا بحالی کن جوان سلابت کن بٹنگ انگ نا ستاءِ کرے۔ وزیراعظم برجاسال انا اول آتیٹی پاکستان وامریکہ نا نیام اٹ طے مروک آ ٹیرف ارینجمنٹ آہم صدر ٹرمپ انا منت واری ءِ ہرفے۔اوپاکستان و امریکہ نا نیام اٹ مریس مد شریداری نا ذکر ءِ کرسا دااومیت نا درشانی ءِ کرے کہ صدر ٹرمپ انا کماشی ٹی ہڑتوم آملک آتا تین پہ تینی فائدہ ٹی پاک امریکہ تعلقداری پین سوگو مریک ۔ داوخت آ اوامریکی کمپنی تے پاکستان نا کشت وکشار، انفارمیشن ٹیکنالوجی، معدنیات و توانائی نا بشخ آتیٹی زرکاری نا سلہ خلک۔ ہڑتوم آ راہشونک علاقائی سلامتی و انسدادِ دہشت گردی آ کمکاری ءِ ودفنگ آ ہم گپ وتران کرے۔ وزیراعظم انسدادِ دہشت گردی ٹی پاکستان نا کڑد ءِ صدر ٹرمپ انا کنڈآن ملوک آ آجومخ تفی آ منت واری ءِ ہرفے و سیکورٹی و انٹیلی جنس کمکاری ءِ پین ودفنگ آ زور شاغا۔ بیان نا رداٹ وزیراعظم صدر ڈونلڈ ٹرمپ ءِ گرم جوشی اتون جوان وخت آ پاکستان نا سرکاری دورہ نا سلہ ہم خلک۔