بھارت ءِ گوما درستیں بقایا جیڈھ آنی سر ءَ سرجمیں ءُ پائدگ مندیں گپ ءُ تران ءِ واستہ تیار انت، جنگ ءَ سوبمند بوتگ آں، نوں ایمنی ءِ کٹگ لوٹاں ، غزہ ءَ جنگ بندی ءَ چہ درآہگ ءِ راہ المی انت، مزن وزیر شہباز شریف جنرل اسمبلی ءِ دیوان ءَ گوں تران کنان

نیویارک۔26ستمبر  (اے پی پی): مزن وزیر محمد شہباز شریف ءَ گوں بھارت ءَ سرجمیں بقایا جیڈھ آنی سر ءَ سرجمیں ءُ پائدگ مندیں گپ ءُ تران ءِ واستہ وتی تیاری ءِ درشان کنان ءَ گوشت کہ پاکستان ءَ رودراتکی کشاں چیل  ءِ نیمگ ءَ چہ بے سوبیں زوراکی ءِ سر ءَ فیصلہ کنوکیں پسو داتگ، دژمن ءَ ھچ وڑیں زوراکی نہ کتگ، پاکستان ءَ ھچ وڑیں زوراکی نہ کتگ۔ ما ایمنی ءِ کٹگ لوٹیں، صدر ٹرمپ ایمنی ءِ چیمپئن اِنت، اگاں آئی ءَ وھد ءُ پاس ءِ سر ءَ ءُ فیصلہ کنوکیں رنگ ءَ مداخلت نہ کتگ اَت گڑا سرجمیں جنگ ءِ آسر ھراب بوتگ اَنت، سندھ ءِ آپانی منوگری ءِ ھلاپ ورزی جنگ ءِ جار ءِ برابر اِنت، ھندوستان ءِ زلم ءُ زوراکی مقبوضہ کشمیر  ءُ اسرائیل ءِ فلسطین  ءَ   غزہ ءِ تہا ناشرکاری ءِ سبب ءَ  بنی آدم سک باز لگت مال بوھگ ءَ اِنت ،  اے ڈکال ءَ چہ  درآہگ ءِ راہ زوت شوہاز کنگ بہ بیت، فلسطین نوں آجو بہ بیت، پاکستان ءَ را درملکی چیردستی ءَ کنگ بوؤکیں ناشرکاری ءِ دیمپانی کنگی اِنت ما ناشرکاری ءِ دیم ءَ اوشتاتگیں، ناشرکاریں گل اوگان سرزمین ءَ چہ کار کن اَنت، اوگانستان ءِ ادارُکی حکومت ءَ ناشرکاریں گلانی ھلاپ ءَ موثریں گامگیج چست کنگی اِنت  ، اے ڈکال  پہ معیشت ءَ تباہ کنوک اَنت، ما مزنیں محنت کنیں، ملک ءَ را وتی پاد آنی سر ءَ اوشتاریناں  ءُ پاکستان ءَ را مزنیں ملکے جوڑ کنیں۔ اے ھیالانی درشانی آئی ءَ اقوام متحدہ ءِ جنرل اسمبلی ءِ 80می دیوان ءِ جنرل ڈیبیٹ ءَ گوں تران کنان ءَ کت۔ مزن وزیر ءَ جنرل اسمبلی ءِ نوک گچین بوتگیں صدر ءَ را جنرل اسمبلی ءِ 80می دیوان ءِ صدارت ءِ ذمہ واری ءِ سر ءَ مبارک بات دات ءُ مشکلیں جاور آنی تہ ءَ دلیری ءِ سروکی ءَ اقوام متحدہ ءِ سیکرٹری جنرل انتونیو گوتریس ءَ را ھم شگر ءُ منت دات۔ مزن وزیر ءَ گوشت کہ مرچیگیں دگنیا پیسر ءَ چہ گیش پیچیدہ اِنت، جیڈھ گیش بوھگ ءَ اَنت، میاں اوستمانی کانود ءِ سر ءَ پدریں رنگ ءَ ھلاپ ورزی کنگ بوھگ ءَ اِنت، انسانی بحران گیش بوھگ ءَ اَنت، ناشرکاری انگت ءَ یک زوراکیں ھترہ یے، ردیں ھال ءُ اھوال ءُ جعلی ھال دل یکیمی ءَ را ھلاس کن اَنت،  وتاس آنی  بے لگامیں سلاہ بندیں دوڑ ءُ نوکیں ٹیکنالوجی ءِ رسک ءِ تہ ءَ ھوار اِنت۔ دراھیں، موسمیاتی بدلی مئے زندگ بوھگ ءِ ھاترا ھترہ جوڑ بوتگ۔ مزن وزیر ءَ گوشت کہ کثیر نیمگی نظام مرچی آپشن نہ انت بلکینگ ءَ المی جوڑ بوتگ۔ پاکستان ءِ دری پالیشی ءِ سر ءَ چمشانک دیان ءَ آئی ءَ گوشت کہ مئے دری پالیشی پاکستان ءِ بن ھشت ایر کنوک قائداعظم محمد علی جناح ءِ وژن ءِ سر ءَ بندوک اِنت ایشی ءِ بنیات ایمنی، وت مہ وتی شرپ ءُ کمک ءُ کمک ءِ سر ءَ اِنت۔ ما گپ ءُ تران ءُ سفارتکاری ءِ وسیلگ ءَ جیڑھانی پرایمنی گیواری ءِ سر ءَ باور کن ایں ۔ مزن وزیر ءَ گوشت کہ گوستگیں سال ءَ ھمے فورم ءَ من بیھار داتگ ات کہ پاکستان ھرچ ​​وڑیں درائیں زوراکی ءِ سر ءَ ٹہینوکیں پسو ءَ دنت۔ اے گپ اے سال ءِ مئی ءَ راست ثابت بوت اَنت کہ مئے سرا چہ رودراتکی دیم ءَ بے سوبیں اُرش کنگ بوت، دژمن چہ شان ءَ لپٹگ ءَ اتک ءُ بے شرپی ءَ پدا واتر بوت۔ مزن وزیر ءَ گوشت کہ بھارت ءَ پہلگام ءِ وئیل ءِ غیر جانبداریں پٹ ءُ پول ءِ مئے پیشکش رد کنگ ءَ یک انسانی سانحہ ءِ سیاسی مول ءُ مراد ءِ واستہ کارمرد کتگ ءُ مئے شہر ءُ بے گناھیں شہری آناں نشانگ جوڑ کتگ۔ وھدے کہ مئے سرزمین ءِ یکوئی ءُ راجی ایمنی ءِ ھلاپ ورزی بوت گڑا ما اقوام متحدہ ءِ منشور ءِ آرٹیکل 51 ءِ رد ءَ وتی دفاع ءِ بنیاتی حق ءَ کارمرز کت۔ مئے بہادریں سلاہ بندیں اُرد ءَ فیلڈ مارشل سید عاصم منیر ءِ سروکی ءَ بے دروریں پیشہ وارانہ ، بہادری ءُ زانت ءِ درشانی کت۔ ایئر چیف مارشل زہیر بابر سدھو ءِ سروکی ءَ مئے شاہیناں دژمن ءِ اُرش ءَ را ہوا ءَ پُشت ءَ کش اِت ءُ ہفت ہندوستانی بالی گراب چہ مٹی ءَ کم کت اَنت۔ اُرش کنوک مئے فیصلہ کنوکیں پسو راجدپتر ءَ مدام یات کنگ بیت۔ اے سوبمندی ءِ کریڈٹ ہر افسر ءُ سرباز ءُ شہیدانی وارثاں رسیت۔ ایشانی مزنی حکم اِنت۔ مئے شہیدانی ماتانی ہمت مارا راھشونی کنت۔ ایشانی قربانی کدی بے سوب نہ بیت۔ ہر پاکستانی اے جاور ءِ تہا یک مھکمیں دیوالے ءِ رنگ ءَ اوشتاتگ ات۔ مزن وزیر ءَ گوشت کہ اقتدار ءِ سر ءَ بوھگ ءِ باوجود ما جنگ بندی ءِ سر ءَ تپاک کنگ ءَ تیار آں، ایش صدر ڈونلڈ ٹرمپ ءِ دلیری ءُ رھشونی ءِ سروکی ءَ چہ ممکن بوتگ۔ ما صدر ٹرمپ ءُ آئی ءِ ٹیم ءِ ستا ءَ کنیں کہ آہاں جنگ بندی ءِ تہا فعالیں کرد پیلو کتگ۔ ایشانی جہداں مزنیں خطرناکیں جنجالے ءِ دیم ءَ دارگ بوت۔ اگاں آیاں وھد ءُ پاس ءِ سر ءَ ءُ فیصلہ کنوکیں رنگے ءَ مداخلت نہ کتگ ات گڑا سرجمیں جنگ ءِ آسر ھراب بوتگ اتنت۔ صدر ٹرمپ ایمنی ءِ چیمپئن اِنت ءُ پاکستان ءَ آئی ءَ را ایمنی ءِ جہد ءِ پد ءَ نوبل ایمنی داد ءِ واستا نامزد کتگ۔ مزن وزیر ءَ چین، ترکی، سعودی عرب، قطر، آذربائیجان، ایران، متحدہ عرب امارات ءُ اقوام متحدہ ءِ سیکرٹری جنرل ءَ ھوار پاکستان ءِ دوست ءُ شراکت دار آنی شگر ءُ منت گپت، ایشاں نازرکیں وھد ءَ پاکستان ءَ را سفارتی کمک کت۔ پاکستان ءَ جنگ سوبمند بوت۔ نوں ما سرجمیں دگنیا ءَ ایمنی ءِ کٹگ لوٹیں ۔ پاکستان ءِ گوما بھارت ءِ گوما توامیں دیم ءَ اتکگیں جیڈھ آنی سر ءَ سرجمیں ءُ پائدگ مندیں گپ ءُ تران ءِ واستہ تیار اِنت۔ جنوبی ایشیا ءَ "فعال” قیادت ءِ ضلورت اِنت، نہ کہ "اشتعال انگیز”۔ ہندوستان ءِ یک نیمگی ءُ ناجائزیں گامگیج ءِ سندھ ءِ آپانی منوگری ءِ معطل کنگ نہ ایوک ءَ اے منوگری ءِ شقانی بلکیں میان استمانی کانود ءِ ہم خلاف ورزی انت۔ پاکستان ءَ اے گپ سک پدر کتگ ءُ کس ءَ شک مہ بیت کہ ما وتی 240 ملین آبادی ءِ آپانی ناگزیریں حق ءِ زبردستی ءَ دفاع کنیں۔ اے منوگری ءِ خلاف ورزی پہ ما جنگ ءِ جار جنگ ءِ برابر اِنت۔ مزن وزیر ءَ گوشت کہ اے ایوان ءِ وسیلگ ءَ کشمیری اُلس ءَ دل یکیمی کناں کہ آ ایشانی گوما اوشتاتگ آں، پاکستان ایش ءِ گوما اوشتاتگ ءُ انشاءاللہ مقبوضہ جموں کشمیر ءَ بھارت ءِ زلم ءُ ظلم زوت ہلاس بیت۔ کشمیری اُلس اقوام متحدہ ءِ نگرانی ءَ بے رھبندیں ریفرنڈم ءِ وسیلگ ءَ وت واجئی ءِ ھک ءَ حاصل کنت ۔ مزن وزیر ءَ فلسطین ءِ ھوالگ ءَ گپ ءُ تران کنان ءَ گوشت کہ فلسطین ءِ اُلس ءِ نگیگیں جاور مئے وھد ءِ دل سوبیں وئیل آنی تہ ءَ یکے ۔ اے دیریں ناانصافی ءِ سرا جھان ءِ ضمیر ءُ مئے اجتماعی اخلاقی ناکامی ءِ سرا داغ اِنت۔ ہشت دہائیاں چہ فلسطینی راج وتی وطن ءِ سرا اسرائیل ءِ زالمیں قبضہ ءَ گوں دلیری ءَ برداشت کنگ ءَ اِنت۔ غزہ ءِ سرا اسرائیل ءِ زوراکی ءَ زالبول ءُ زھگانی سر ءَ انچیں زلم ءُ زوراکی کتگ کہ ما بوت کنت کہ پیسر ءَ نہ دیستگ۔ مغربی کنارہ ءِ ہر گوزوکیں روچ نوکیں بربریت ءِ آرگ ءَ اِنت۔ غیر قانونی آبادکار بے جرم ءَ روب  ءُ دبدبہ ءِ شنگ ءُ تالان کن اَنت ءُ مردم کُش اَنت۔ غزہ ءِ تہا اسرائیل ءِ نسل کشی ءِ اُرشاں زالبول ءُ زھگانی تہا ناقابل بیانیں رعب ءُ دباؤ ءِ شنگ ءُ تالان کتگ کہ ما دنیا ءِ راجدپتر ءَ ہچبر نہ دیستگ۔ وتی ناپاکی ءِ مول ءُ مراد ءِ کوریں رندگیری ءَ اسرائیلی سروکی ءَ بے گناہیں فلسطینیانی ھلاپ ءَ شرمندگیں مہمے بندات کت کہ راجدپتر ءَ مدام وتی سیاہ تریں باب ءِ بستار ءَ یات کنت۔ مزن وزیر ءَ یات دات کہ ما درستاں کسانیں ہند رجب ءِ لرزوکیں توار اشکتگ کہ آ ملبہ ءِ چیر ءَ دفن بوتگیں زند ءِ گُد گُد کنگ ءَ ات، تو اے گمان ءَ کن ئے کہ آ تئی جنک اِنت؟ تو ھیال کن ئے کہ آئی ءِ سرا رحم نہ بیت؟ منی ءُ سرجمیں مسلمانیں امت ءِ بلے سرجمیں انسانیت ءِ غم ایش انت کہ ما ہند رجب ءَ رکّینت نہ کت کہ ایشی ءِ ھاترا آ مارا نہ ایوک ءَ اے دنیا ءَ بلکیں آؤکیں دنیا ءَ ھم مارا معاف نہ کنت۔ انچوش کہ گْوش اَنت کہ ”کسان تریں تابوت سنگین تر اَنت“ من زاناں پرچا کہ من ھم ھپت سالی ارتازا عباس ءِ کسانیں تابوت انوگیں ھندی زوراکی ءِ وھد ءَ چست کُتگ اَت۔ مزن وزیر ءَ گوشت کہ ما اے زھگاں ناکام کنگ ءَ مہ دئیں، نہ غزہ ءَ ءُ نہ دگنیا ءِ دگہ کنڈ ءَ مارا زوتیں جنگ بندی ءِ راہ شوھازگی اِنت۔ مزن وزیر ءَ گوشت کہ پاکستان 1967 ءَ چہ پیسر ءِ سیم سر آنی بنیات ءَ القدس الشریف ءَ را بنجاھی شھر جوڑ کنگ ءِ واستہ فلسطینی الس ءِ لوٹ ءِ سرجمی ءَ کمک کنت ۔ فلسطین دگہ اسرائیل ءِ زنجیراں مانیت نہ کنت، آ آجو بہ بیت۔ مزن وزیر ءَ گوشت کہ پاکستان 1988ءَ اولی ملک آنی تہ ءَ ھوار بوتگ کہ آئی ءَ فلسطین ءِ ریاست من اِتگ، ما ھما ملک آناں وش اتک کن ایں کہ ایشاں انوگیں وھد ءَ فلسطین من اِتگ۔ ما دگہ ملکاں ھم دزبندی کنیں کہ آ ھم فلسطین ءَ بہ من اَنت پرچا کہ وھد کس ءِ ودار ءَ نہ اِنت۔ مزن وزیر ءَ گوشت کہ صدر ٹرمپ ءِ شگر ءُ منت وار آں کہ آئی ءَ وھد ءِ سر ءَ عرب ءُ اسلامی ملک آناں اقوام متحدہ ءَ مشاورتی دیوان ءِ واستہ دعوت دات ایشی ءَ چہ جنگ بندی ءِ نوکیں امیت رست۔ اے ایمنی ءِ گامگیج ءِ کریڈٹ صدر ٹرمپ ءَ ھم دیگ بہ بیت۔ آئی ءَ گوشت کہ اسرائیل ءِ دوحہ ءِ سر ءَ گوستگیں اُرش ءُ دگہ ملک آنی حاکمیت ءِ ھلاپ ورزی آئی ءِ سرکشیں رویہ ءِ درشان اِنت۔ پاکستان براتیں ملک قطر ءِ الس ءِ گوما اوشتاتگ انت۔ ما یوکرین ءِ جیڈھ ءِ پرایمنییں رنگ ءَ گیش ءُ گیوار ءِ ھم حمایت کن ایں دانکہ انسانی رنج ءُ گم ءُ جھان ءِ جیڑھ ھلاس بہ بیت۔ مزن وزیر ءَ گوشت کہ پاکستان ھمک رنگ ءِ ناشرکاری ءِ مذمت ءَ کنت۔ پاکستان دو دہائی ءَ چہ گیش انت کہ انسداد ناشرکاری ءِ ھلاپ ءَ یک دیم ءِ ملکے ءِ بستار ءَ کرد پیلو کنگ ءَ انت ءُ اے درگت ءَ 90 ہزار مردمانی جان قربان کتگ انت ایشی ءِ تہا مئے زالبول، زھگ، پیر، ڈاکٹر، انجینئر ءُ دگہ ھوار انت۔ نیویارک، لندن، لاہور ءُ دنیا ءِ ہر جاہ ءَ کسے ءِ جان ءِ گرگ یک اِنت۔ پاکستان ءَ ناشرکاری ءِ ھلاپ ءَ جنگ ءُ دگنیا ءَ ایمنی ءِ برجائی ءِ واستہ ابدمانیں قربانی داتگ انت۔ مئے اے قربانیانی منّگ بہ بیت۔ ناشرکاری ءِ سبب ءَ پاکستان ءَ را 150ارب ڈالر ءَ چہ گیش اقتصادی تاوان رستگ۔ مرچی مارا درملکی اسپانسر شپ ءِ چیر دستی ءَ ناشرکاری ءِ دیمپانی کنگی اِنت۔ مارا ٹی ٹی پی، فتنہ الخریج، فتنہ ہندوستان، بی ایل اے ءُ آئی ءِ مجید بریگیڈ ءِ نیمگ ءَ چہ ناشرکاری ءِ دیمپان اِنت۔ اے گل چہ اوگان سرزمین ءَ کار کن اَنت ءُ جعفر ایکسپریس ءِ وڑیں ھرابیں اُرشانی ذمہ وار اَنت کہ یرغمال کنگ بوتگ بلے مئے سلاہ بندیں اُرد ءُ کانود ءِ نفاذ ءِ ادارہاں کارروائی کتگ ءُ یرغمال یلہ داتگ اَنت ءُ ناشرکار وتی آسر ءَ سر کتگ اَنت۔ مزن وزیر ءَ گوشت کہ مئے سیکورٹی ادارگ اے ناشرکار آنی گوما جنگ ءَ کنگ ءَ اَنت، ما اے جنگ ءَ داں گڈی ناشرکار ءِ ھلاس کنگ ءَ برجاہ دار آں۔ آئی ءَ گوشت کہ یک نزیکیں ھمساھگ ءِ بستار ءَ پاکستان ءِ یک ایمن ءِ اوگانستان ءِ گوما براہ راست سیادی است انت۔ ما باور کنیں کہ دیمروئی ءُ وشھالی ءِ کلید دمگی استحکام ءُ رابطہ ءِ تہا اِنت۔ پاکستان انسانی کمک، اقتصادی ریکوری ءُ اوگانستان ءَ یک سرجمیں سیاسی فریم ورک ءِ دلبڈی ءِ واستہ توامیں شریک آنی گوما کار کنگ ءِ واستہ جزم انت۔ ادارُکی اوگان حکومت ءَ را زالبول آنی گوما بااختیار جوڑ کنگ بہ بیت۔ انسانی حقاں چہ ھوار زھگ ءِ ھکاں ھم برجاہ دارگ بہ بیت ءُ ما چہ آئی ءَ امیت کنیں کہ آ ناشرکاریں گلانی ھلاپ ءَ جوانیں گامگیج بہ زوریت ءُ اے گپ ءَ دل یکیمی بہ کنت کہ اوگان سرزمین ءَ را ھچ وڑیں ملک ءِ ھلاپ ءَ ناشرکاری ءِ ھاترا کارمرد کنگ مہ بیت۔ مزن وزیر ءَ گوشت کہ کجام ھم مردم یا مذھب ءِ ھلاپ ءَ نفرت انگیزیں گپ، تبعیض ءُ زوراکی ءِ گنجائش مہ بیت، ھندوتوا ءِ سر ءَ بنیات ءِ سر ءَ انتہا پسندی نہ ایوک ءَ دمگ ءِ واستہ بلکینگ ءَ سرجمیں دگنیا ءِ واستہ ھترہ اِنت، اسلاموفوبیا ءِ ھترہ ءَ را جھان ءِ تک ءَ منگ بوھگ ءَ اِنت، پاکستان اقوام متحدہ ءِ اے ھاسیں جیڈھ ءِ تہ ءَ یک اقوام متحدہ ءِ ھاسیں نمائندہ ءِ گچین کنگ ءَ را وش اتک کنت۔ آئی ءَ گوشت کہ چاگردی بحران زوتیں جھان ءِ چیلنج اِنت، 2022 ءَ پاکستان ءَ را 34 ارب ڈالر ءَ چہ گیش تاوان ءِ گوما شدیدیں سیلاب ءِ آماچ بوتگ، ایشی ءَ ابید گران بھائیں جانی تاوان بوتگ، اے سال ءَ پدا مزنیں سیلاب ءَ ھزاراں میتگ ءُ ھزاراں مردم بے لوگ بوتگ اَنت ءُ ھزاراں چہ گیش مردم بے لوگ بوتگ اَنت۔ ارباں ڈالر ءِ فصل، مال ءُ مڈی گار بوتگ انت۔ آئی ءَ گوشت کہ پاکستان وتی غیر معمولی تابکاری ءَ گوں اے آفت ءَ گوں جنگ ءَ انت، حکومت ءَ موسمیاتی ایمرجنسی ءِ جار جتگ، 2022 ءُ 2025 ءِ تباہ کنوکیں سیلاب موسمی مٹ ءُ بدلی ءِ سبب ءَ بوتگ انت۔ آئی ءَ یات دات کہ جھان ءِ گیس ءِ کشگ ءِ تہ ءَ پاکستان ءِ بھر یک درسد ءَ چہ کم اِنت بلے پاکستان موسمیاتی بدلی ءَ چہ سک باز آماچیں ملک آنی تہ ءَ ھوار اِنت، موسمی بدلی ءِ سبب ءَ بوتگیں تاوان آنی سبب ءَ مارا وام زورگ لوٹ ایت، اے انصاف نہ اِنت، وام معیشت ءِ واستہ تباہ کنوک اَنت، ما مزنیں محنت کن ایں، پاکستان ءَ را مزنیں ملکے جوڑ کن ایں ۔ مزن وزیر ءَ گوشت کہ ما معیشت ءَ را گہتر کنگ ءِ واستہ ڈھانچہ ءِ اصلاحات کتگ، ٹیکس ءِ نظام ءَ را نوک کنگ، سرمایہ کاری ءَ را گیش کتگ ءُ ڈیجیٹل ٹیکنالوجی آناں وتی کتگ، آرٹیفیشل انٹیلی جنس ءُ کریپٹو، انفراسٹرکچر، توانائی، صنعت، کشت ءُ کشاری، کان کنی ءُ ٹیکنالوجی مئے اولی ترجی انت۔ مزن وزیر ءَ گوشت کہ صدر شی جن پنگ ءِ راجدپتری بیلٹ اینڈ روڈ ءِ گامگیج ءِ چیر دستی ءَ چین ءُ پاکستان اقتصادی راہداری ءِ وسیلگ ءَ اسٹریٹجک شریکداری مئے دیمروئی ءَ کمک کنگ ءَ انت۔ آئی ءَ گیش منصفانہ ءُ ھواریں دیمروئی ءِ واستہ یک موثر فریم ورک ءِ وسیلگ ءَ گلوبل گورننس انیشیٹیو ءَ ھوار صدر شی جن پنگ ءِ وژن ءُ دور اندیشی ءِ توسیپ کت۔ مزن وزیر ءَ گوشت کہ پاکستان اقوام متحدہ ءِ سلامتی کونسل ءِ غیر دائمی باسک ءِ بستار ءَ جیڈھ آنی گر ءُ دار ءَ وتی جوڑیشت ءِ کرد ءَ پیلو کنگ ءَ انت۔ آئی ءَ گوشت کہ قرارداد 2788 ءِ یکوئی ءِ منظوری کثیر نیمگی ءُ اقوام متحدہ ءِ منشور ءِ ھوالگ ءَ مئے یکجائی عزم ءِ نوک کنگ اِنت۔ مزن وزیر ءَ دل یکیمی دات کہ پاکستان یک کار کنوکیں اقوام متحدہ ءُ یک کوآپریٹو کثیر جہتی نظام ءِ واستہ مدام ایمنی، انصاف ءُ دیمروئی ءِ چیمپئن بیت کہ منصفانہ، پائدگ مند ءُ درست آنی واستہ گہتر انت۔ جنرل اسمبلی ءِ ہشتادمی دیوان ءِ موہ ءَ مزن وزیر ءَ گوشت کہ ہشتادمی دیوان ایوک ءَ راجدپتر ءِ یاتگار مہ بیت، بیا اِت آؤکیں ہشتاد سال ءِ واستہ راجدپتر جوڑ بہ کن ایں، بیا اِت ما درست یکجائی ءَ گہتری ءِ واستہ کار بہ کن ایں ۔