بجلی نا بشخ انا 1225ارب روپئی گردشی وام تا ایسر بھلو پیش رفت اسے، بنجائی وزیر خزانہ محمد اورنگزیب

اسلام آباد۔ 25 ستمبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ بجلی نا بشخ انا 1225 ارب روپئی گردشتی وام تا ایسر مالی نظم و ضبط ءِ پک کننگ و زرکارآتا پت اٹی ودکی اتون اوار اوار پاکستان نا توانائی بشخ انا متکن انگا ویل آتیان اسٹ اسے نا ایسری ٹی اسہ بھلو پیش رفت اسے۔ پنچ شنبے نادے آ داڑے جاری بیان اٹی وزارت خزانہ 1225ارب روپئی نا گردشی وام تا سرسہب ایسر نا خیرمقدم ءِ کرساپارینے کہ وزیراعظم نا ٹاسک فورس پاور نا تاریخی اسیجائی کوشست آتا کمک اٹ و وزارت توانائی، اسٹیٹ بینک آف پاکستان، پاکستان بینکس ایسوسی ایشن و 18 شریداری بینک آتا کمک اٹ اودے ممکن کننگا۔ دا تاریخی ری سٹرکچرنگ آن پاکستان اٹی توانائی نا بشخ انا متکن انگا ویل آتیان اسٹ اسے نا ایسری ٹی اسہ بھلو پیش رفت اسے نا نمائندگی و عکاسی مننگ ءِ۔ بیان اٹی پاننگانے کہ دا سرسہبی آن توانائی نا بشخ انا متکن آ ویل آتا ایسری کن یکجا مروک آ ادارہ غاتا تین پہ تینی مربوط وڑاٹ کاریم کننگ وٹیم ورک انا واک انا عکاسی ہم مننگ ءِ ۔ داکوشست نا سرکڑدہ ئی بنجائی وزیر توانائی سردار اویس احمد خان لغاری نا کماشی ٹی وزیراعظم نا ٹاسک فورس کرے ہرادے وزیرخزانہ و محصولات سینیٹر محمد اورنگزیب، وزیراعظم نا سلاہکار نجکاری محمد علی، نیشنل کوآرڈینیٹر لیفٹیننٹ جنرل محمد ظفر اقبال، گورنر سٹیٹ بینک جمیل احمد، سیکرٹری خزانہ امداد اللہ بوسال و ٹاسک فورس انا غٹ مخلص باسک آتا پبی مخ تفی دوئی ئس وخت اس کہ پی بی اے و 18 بینک آک سوگو ومربوط کمک فراوان کریر۔ بیان اٹی پاننگانے کہ دا تاریخی ری سٹرکچرنگ گچین شریداری عمل نا کمک اٹ ممکن مس ہراڑے ٹاسک فورس و سرکاری ادارہ غاک پالیسی سرکڑدہ  و راہشونی و عملدرآمد فراوان کریر وخت اس کہ بینکاری نا بشخ پی بی اے نا کمک اٹ و اسٹیٹ بینک انا فعال کمکاری اتون، توانائی نا بشخ انا آخبت آ پت انا رداٹ مالی کمکاری ءِ منظم و متحرک کریر۔ بیان نا رداٹ بجلی ودی کروک آ ادارہ غاتے واجب الادا ادائیگی کننگ کن معاہدہ ٹی 660ارب روپئی نا ساڑی وام تا ری سٹرکچرنگ و 565 ارب روپئی نا پوسکن آ فنانسنگ اوار ءِ۔