اسپیکر قومی اسمبلی نا اخبار بینی نا جہانی دے آ آل پاکستان نیوز پیپرز سوسائٹی و صحافی برادری ءِ مبارکباد ، اخبارآک پارلیمان و الس نا نیام اٹ پول انا کڑد اس ادا کیرہ ، سردار ایاز صادق

اسلام آباد۔ 25 ستمبر (اے پی پی) اسپیکر قومی اسمبلی سردار ایاز صادق اخبار بینی نا جہانی دے آ آل پاکستان نیوز پیپرز سوسائٹی و صحافی برادری ءِ مبارکبادی ترسا پارینے کہ اخبارآک نئے بیرہ  پت انا قابل خبر آتا متبر ذریعہ ءُ بلکن دا قومی شعور و فکری آبیاری نا ڈٹ انگا تمبہ غاک ءُ، اخبار آک پارلیمان و الس نا نیام اٹ پول انا کڑد اس ادا کیرہ۔ قومی اسمبلی سیکرٹریٹ آن پنچ شنبے نادے آ جاری کلہو اٹی اوپارے کہ اخبار آتا قارئین نا دے صحافی، ایڈیٹرز ومیڈیا ادارہ غاتا خذمت آتے خراج تحسین پیش کننگ نادے ءِ، پارلیمانی رپورٹرز ایسوسی ایشن پارلیمنٹ اٹی مروک آ کانود سازی ءِ الس اسکان سرکننگ اٹ گچین کڑد ادا کننگءُ۔ سردار ایاز صادق پارے کہ باشعور و باخبر شاری ہی جمہوریت نا اصل بنداو ءُ، اخبارآک مدام الس ءِ راستی تیان روشناس کرفیر و ناانصافی تے بے نقاب کریر، سوشل میڈیا نا ساڑی آ دور اٹی زموارانہ صحافت نا قدر پین اہمیت اختیار کرینے۔ اوپارے کہ اخبار آک بیرہ خبر آخا بلکن پٹ وپول، جاچ و گہرا تناظرہم فراوان کیرہ، اخبار آک چیلنج آتیان پد ہم السی پت انا سیبو شون ہلکر۔ اونا پاننگ ئس کہ اخبار آک الس نا پت و کمکاری اتون شونداری نا مزل آتے طے کننگ کیرہ، فکری و علمی بصیرت کن ورناچین ءِ اخبار بینی نا عادت ءِ تینا بایدے کے، تعلیمی ادارہ غاتیٹی خوانوک آ مارو مسن تیٹی ہم دا عادت ءِ مون آ دننگ نا گرج ءِ۔ اسپیکر قومی اسمبلی پارے کہ پرنٹ میڈیا غا بے کنڈ ہلنگ، اخلاقیات و زمواری نا بڑزکو آب ءِ برقرار تخنگ نا بھلو زمواری اس بیٹ ءِ، صحافتی آجوئی جمہوری راج انا اساس ءِ۔ اوپارے کہ اخبار آتا ودوک آ مطالعہ اسہ باشعور، سوگو و جمہوری پاکستان نا ضمانت ءِ۔ اسپیکر اخباری صنعت نا شونداری و مون آ دننگ کن نیک است خواہی نا درشانی ءِ ہم کرے۔