پاکستان آئی ایم ایف پروگرام نا رداٹ چندی ہدف و قول آتے پورو کننگ کن پدریسہ پیش رفت کننگ ءِ، وزیراعظم شہباز شریف نا منیجنگ ڈائریکٹر کرسٹالینار جارجیوا تون اوڑدہی ٹی گپ وتران

نیویارک۔ 24 ستمبر (اے پی پی) وزیراعظم محمد شہباز شریف پاکستان تون جہانی مالیاتی فنڈ (آئی ایم ایف) نا متکن آ تعمیری شریداری نا ستاءِ کرسا پارینے کہ پاکستان آئی ایم ایف پروگرام نا رداٹ چندی ہدف و قول آتے پورو کننگ کن پدریسہ پیش رفت کننگ ءِ، ساڑی آ نوکاپ نا ملکی زرگزران آ اثرآتے آئی ایم ایف نا جاچ اٹی بایدے اوار کننگے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ او داخیال آتا درشانی ءِ اقوام متحدہ نا جنرل اسمبلی نا 80 می دیوان نا وخت آ جہانی مالیاتی فنڈ (آئی ایم ایف) نا منیجنگ ڈائریکٹر کرسٹالینا جارجیوا تون اوڑدہی ٹی کرے۔ وزیراعظم پاکستان تون آئی ایم ایف نا متکن آ تعمیری شریداری نا ستاءِ کرے ہرا منیجنگ ڈائریکٹر کرسٹا لینا جارجیوا نا کماشی ٹی پین سوگو مسنے۔ وزیراعظم چندی گام گیج آتا کمک اٹ آئی ایم ایف نا کنڈآن پاکستان نا وخٹ آ مخ تفی نا اعتراف ءِ کرے ہراٹی مالی سال 2024اٹی 3 ارب ڈالر نا سٹینڈ بائی ارینجمنٹ، اوکان پد 7 ارب ڈالر نا ودکی فنڈ آسراتی و 1.4 ارب ڈالر نا ریزلینس اینڈ سسٹین ایبلٹی (آرایس ایف) اوار ءِ۔ پکا عزم اتون کروک آ پائیدار اصلاحات نا سوب پاکستان نا زرگزران اٹی سوگوی نا مثبت آثار ءِ و داسہ زرگزران بحالی نا کنڈآترندی اٹ ہِننگ ءِ۔ وزیراعظم دا چرجوئی ٹی آئی ایم ایف نا کمکاری نا ستاءِ کرے ہرا حکومت نا زرگزرانی اصلاحات نا کوشست آتیٹی راہشونی کننگ اٹ اہم کڑد ادا کننگ ءِ۔ پاکستان نا کنڈآن آئی ایم ایف پروگرام نا رداٹ چندی ہدف و قول آتے پورو کننگ نا کنڈآ پدریسہ پیش رفت نا ذکر ءِ کرسا وزیراعظم پارے کہ پاکستان نا زرگزران آ ساڑی آ نوکاپ نا اثرآتے آئی ایم ایف نا جاچ اٹی بایدے اوار کننگے۔ آئی ایم ایف نا منیجنگ ڈائریکٹر پاکستان اٹی نوکاپ آن زہمی مخلوق تون ہمدردی نا درشانی ءِ کرے۔ اوبحالی نا گچین گام گیج آتیکن نسخان تا کساس نا اہمیت ءِ تالان کرے۔ آئی ایم ایف نا منیجنگ ڈائریکٹر سوگو میکرواکنامک پالیسی تیا عمل کننگ کن وزیراعظم نا عزم انا ستاءِ کرے و آئی ایم ایف نا پدریسہ مخ تفی نا درشانی ءِ کرے انتئے کہ پاکستان پائیدار مریس مدی اقتصادی شونداری ءِ پک کننگ کن المی اقتصادی اصلاحات آتیا عمل کننگ ءِ۔