وزیراعظم شہباز شریف و ورلڈ بینک گروپ نا صدر اجے بنگا نا اوڑدہی، کنٹری پارٹنر شپ فریم ورک نا رداٹ پاکستان تون کمکاری ءِ پین سوگو کننگ نا عزم انا درشان

نیویارک۔ 24 ستمبر (اے پی پی) وزیراعظم محمد شہباز شریف و ورلڈ بینک گروپ نا صدر اجے بنگا پاکستان نا شونداری اولیت آتے مون آ دننگ کن کنٹری پارٹنر شپ فریم ورک نا رداٹ کمکاری ءِ پین سوگو کننگ نا عزم انا درشانی ءِ کرینو۔ چارشنبے نادے آوزیراعظم آفس نا میڈیا ونگ آن جاری بیان نا رداٹ اقوام متحدہ نا جنرل اسمبلی نا 80 می دیوان نا وخت آ وزیراعظم محمد شہباز شریف و ورلڈ بینک گروپ نا صدر نا اوڑدہی مس۔ وزیراعظم آپریشن تے آسان کننگ و نجی بشخ اٹی وسیلہ غاتے پین متحرک کننگ آ چکار کرسا ورلڈ بینک ءِ ترند تر و زیات گچین شونداری شریدار جوڑ کننگ آ اجے بنگا نا کماشی نا ستاءِ کرے۔ اوخاص وڑاٹ کوویڈ۔ 19 نا جہانی دین و 2022ء نا بھسکار نوکاپ اٹی پاکستان کن بینک انا متکن آکمکاری نا ستاءِ کرے۔ وزیراعظم جہانی بینک انا صدر ءِ حکومت نا جوان اصلاحاتی ایجنڈاآن معلومدار کرے ہراٹی وسیلہ غاتے متحرک کننگ، توانائی نا بشخ اٹی اصلاحات، نجکاری و موسمیاتی بدلی تیان بچنگ نا بابت گام گیج آک اوار ءُ۔ وزیراعظم داہیت انا درشانی ءِ کرے کہ اصلاحاتی ایجنڈا پاکستان ءِ میکرو اکنامک سوگوی نا کنڈآ درینے، زرکارآتا پت بحال مسنے و پائیدار و جوان اقتصادی شونداری ءِ مون آ دننگانے۔ وزیراعظم ورلڈ بینک انا پوسکن آ کنٹری پارٹنر شپ فریم ورک (2026-2035)ناہم ستاءِ کرے ہرانا رداٹ جہانی بینک پاکستان کن 40 ارب ڈالر نا تاریخی و بے مثل قول کرینے۔ وزیراعظم اونا گچین نفاذ ءِ پک کننگ کن صوبائی حکومت آتون خڑکی رابطہ نا بابت بنجائی حکومت نا عزم انا درشانی ءِ کرے۔ اواقتصادی اصلاحات نا مون آ دننگ و سی پی ایف نا رداٹ موسمیاتی بدلی نا بابت مریس مدی و پائیدار گام گیج آتیکن پدریسہ کمکاری ءِ ودفنگ نا بابت بینک انا پبی عزم انا درشانی ءِ کرے۔ وزیراعظم محمد شہباز شریف و ورلڈ بینک گروپ نا صدر اجے بنگا پاکستان نا شونداری اولیت آتیٹی پیش رفت کن کنٹری پارٹنر شپ فریم ورک انا رداٹ کمکاری ءِ پین سوگو کننگ نا عزم انا درشانی ءِ کرے۔