اسلامی کمکار تنظیم نا جموں و کشمیر نا بارواٹی رابطہ گروپ نا نیویارک اٹی دیوان

اسلام آباد۔ 24 ستمبر (اے پی پی) اسلامی کمکار تنظیم (او آئی سی) نا جموں  وکشمیر نا بارواٹی رابطہ گروپ نا دیوان نیویارک اٹی اقوام متحدہ نا جنرل اسمبلی نا 80 می دیوان نا وخت آ مس۔ دفترخارجہ نا رداٹ دیوان اٹی بھارت نا غیرکانودی کوزہ ٹی جموں وکشمیر اٹی سیاسی و سیکورٹی حالیت آتون اوار اوار مقبوضہ علاقہ ٹی انسانی حق انا بگڑینگوک آ حالیت آتا جاچ ءِ ہلنگا۔ اوآئی سی نا اسسٹنٹ سیکرٹری جنرل سیاسی امور یوسف ایم الدوبے نا کماشی ٹی مروک آ دیوان اٹی رابطہ گروپ نا باسک ملک پاکستان، سعودی عرب، ترکیہ، نائجر و آذربائیجان بشخ ہلکر۔ کشمیری الس نا حقی نمائندہ غاتا اسہ ڈل اس ہم داوخت آ ساڑی ئس۔ وزیراعظم نا خصوصی کمکار سید طارق فاطمی کشمیری الس نا حق خودارادیت نا آخبتی مخ تفی آ اوآئی سی و اونا باسک ملک آتا منت واری ءِ ہرفے۔ اومقبوضہ جموں وکشمیر اٹی سخت کانود، جور و آبادیاتی بدلی تا کمک اٹ تینا غیرکانودی کوزہ ءِ سوگو کننگ نا بھارت نا کوشست آتا مذمت ءِ کرسا اگست 2019 آن پد آن انسانی حق انا خلاف ورزی و من مانی حراست آتا ذکر ءِ کرے اوامن کن پاکستان نا عزم انا درشانی ءِ کرسا داہیت آ زور شاغا کہ سویلی ایشیاٹی پائیدار سوگوی نا سیبو جموں وکشمیر نا جھیڑہ نا ایسری آ ٹی ءِ۔ وزیراعظم نا خصوصی کمکار اوآئی سی آ زور شاغا کہ او بھارت آ جور انا چٹفنگ، سیاسی بندی تا رہائی، مون انگا کانود ءِ منسوخ کننگ وکشمیری تے اقوام متحدہ نا سلامتی کونسل نا قرارداد آتا رداٹ حق خودارادیت نا کاریم اٹ اتنگ نا موکل تننگ کن زور شاغے۔ شریک ڈل و اوآئی سی رابطہ گروپ نا باسک آک پاریر کہ جموں وکشمیر نا جھیڑہ اوآئی سی نا ایجنڈا نا اسہ اہم ءُ اولیت اسے۔ اواقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ اونا ناقابل تنسیخ حق خودارادیت نا دوئی کننگ کن کشمیری الس نا روا جہد کن تینا آخبتی مخ تفی نا درشانی ءِ کرے۔ اوجھیڑہ نا زوت و پرامن ایسری کن پوسکن آ کوشست آتا گرج آ زور شاغا۔