اقوام متحدہ ءِ جنرل اسمبلی ءِ دیوان بندات بیت، جھان ءِ سروک فلسطین ءِ ریاست ءِ جوڑ کنگ، سرجمیں کمک، موسمیاتی بدلی ءُ چاگردی ءُ اقتصادی جیڈھ آنی گہتریں گیواری ءِ ضلورت ءِ سر ءَ زور پر داتگ

اقوام متحدہ ۔24ستمبر  (اے پی پی): اقوام متحدہ ءِ جنرل اسمبلی ءِ 80می دیوان ءِ اولی روچ ءَ 30 ءَ چہ گیش ملک آنی سروک آنی نیمگ ءَ فلسطین ءِ ریاست ءِ جوڑ کنگ ءُ موسمی بدلی ءِ وڑیں ھاسیں جیڈھ آنی سر ءَ دلگوشی دیگ بوتگ ءُ ھمے رنگ ءَ کثیر جہتی نظام ءُ سلامتی کونسل ءِ اصلاحات ءِ سر ءَ دلگوشی دیگ بوتگ۔ سین ہوا ءِ رد ءَ برازیل ءِ صدر لولا دا سلوا ءَ سیشن ءَ وتی گشتانک ءَ گوشت کہ دگنیا ءِ کثیر جہتی نظام نوکیں موڑ ءِ سر ءَ انت ءُ اقوام متحدہ ءَ را بازیں چیلنج آنی دیم ءَ انت۔ آئی ءَ حاکمیت ءِ سر ءَ اُرش ، یک نیمگی پابندیاں ءُ جھان ءِ سیاست ءِ تہ ءَ مداخلت ءِ سر ءَ ایراد گپتگ ءُ اے کار ءَ را یک نارملیں کارے لیک اِتگ۔ فلسطینی راج ءِ نگیگیں جاور ھال ءِ سر ءَ گپ جنان ءَ آئی ءَ ھشدار داتگ کہ فلسطینی راج ءِ وتی ھست بوھگ ھترہ ءِ آماچ اِنت ءُ ایشی ءِ گیواری ایوک ءَ یک آجوئیں ریاست ءِ جوڑ کنگ ءَ اِنت کہ آ میاں اوستمانی براتی ءِ بھر بہ بیت۔ پیرو ءِ صدر دینا بولوارٹ ءَ ھم اے جامع نظام ءِ حمایت کتگ ءُ اقوام متحدہ ءِ تہ ءَ جوانیں اصلاحات ءِ لوٹ کتگ تانکہ جمہوریت، کانود ءِ حاکمیت، موسمی بدلی ءُ چاگردی ءُ اقتصادی جیڈھ آنی جوانیں گیواری ءِ شوھازگ بہ بیت۔ قازقستان ءِ صدر قاسم جومارت توقایف  ءَ چہ میاں اوستمانی براتی ءَ لوٹ کتگ کہ آ وتی نظام ءِ تہ ءَ ھاسیں رنگ ءَ سلامتی کونسل ءِ تہ ءَ سرجمیں رنگ ءَ اصلاحات کنان ءَ اقوام متحدہ ءَ را کارآمد بہ کنت تانکہ گیش بوھوکیں جھان ءِ بے باوری ءِ ھلاسی ءِ ھاترا۔ انڈونیشیا ءِ صدر پرابو سوبیانتو ءَ موسمی بدلی ءِ سنگینیں اثرات آنی سر ءَ زور پر دات۔ آئی ءَ گوشت کہ دگنیا ءِ مزنیں جزیرہ نما ملک انڈونیشیا ءَ را پیسر ءَ چہ دریا ءِ تہ ءَ گیشی ءِ وڑیں ھترہ آنی دیم ءَ انت۔ آئی ءَ درائینتگ کہ انڈونیشیا فوسل ایندھن ءَ چہ دور ءُ قابل تجدید توانائی ءِ نیمگ ءَ روگ ءَ اِنت ءُ 2060 ءَ تاں زہری گیس آنی صفر کشگ ءِ ٹارگٹ ءَ را سر کنگ لوٹ ایت۔ایشی ءِ مٹوئی ءَ  امریکی صدر ڈونلڈ ٹرمپ ءَ چاگردی پالیشی آنی سر ءَ ایراد گپتگ ءُ کاربن فٹ پرنٹ ءَ را یک ھبرے لیک اِتگ وھدے کہ چلی ءِ صدر گیبریل بوریچ  ءِ سر ءَ جنگی گپ جتگ رائے نہ اِنت بلکیں دروگ اِنت۔ تاجکستان ءِ صدر امام علی رحمان  ءَ وتی ملک ءَ چاگردی چیلنج آنی بابت ءَ گپ جنان ءَ گوشت کہ مئے 14ہزار گلیشیر آنی تہ ءَ 1300 سرجمی ءَ پُھل بوتگ اَنت ءُ اے عمل گوں ترندی ءَ برجاہ اِنت۔ دومی نیمگ ءَ جنوبی افریقہ ءِ صدر سیرل رامافوسا  ءَ پائیدار دیمروئی ءُ دگنیا ءِ امن ءِ واستہ ترندیں گامگیج آنی ضلورت ءِ سر ءَ زور پر دات۔ آئی ءَ گوشت کہ افریقہ یک نوکیں براعظمے بلے دیمروئی کنوکیں ملک آناں مالی وسیلگ آنی کمی ءِ آماچ انت، ھما جاہ ءَ کہ آ جان سلامتی ءُ وانگ ءُ زانگ ءَ چہ گیش قرض ءِ پچ گرگ ءِ سر ءَ ھرچ ءُ درچ کنگ ءَ انت۔ ایشی ءَ چہ پیسر اقوام متحدہ ءِ سیکرٹری جنرل انتونیو گوتریس  ءَ دیوان ءِ بنداتی گشتانک ءَ گوشت کہ دگنیا یک انچیں دور ءِ تہ ءَ داخل بوتگ کہ ایشی ءِ تہ ءَ بے رھبندیں آشوب ءُ مدامی انسانی رنج ءُ گم ءِ آماچ بوتگ۔ میاں اوستمانی کانود ءِ بنیاد ءَ امن انسانیت ءِ اولی ذمہ واری اِنت۔ حقوق انسانی امن ءِ زیب ءُ زیبائی نہ انت بلکیں آئی ءِ بُن ھشت انت۔ اقوام متحدہ ءِ جنرل اسمبلی ءِ دیوان تاں 29ستمبر ءَ برجاہ بیت، ایشی ءِ تہ ءَ دگنیا ءِ 150 ءَ چہ گیش ملک ءُ حکومت ءِ سروک ھاسیں جھان ءِ جیڈھ آنی سر ءَ وتی ھیال ءُ لیکہ پیش کن اَنت۔