نائب مزن وزیر سینیٹر محمد اسحاق ڈار ءَ او آئی سی ءِ رابطہ گروپ ءِ دیوان ءَ گوں تران کنان ءَ اوگانستان ءَ امن، مھکم ءُ وشھالی ءِ واستہ پاکستان ءِ جزم ءِ درشان

اسلام آباد۔24ستمبر  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ اوگانستان ءَ امن، ایمنی ءُ وشھالی ءِ واستہ پاکستان ءِ جزم ءِ یک رندے پدر کت۔ اے ھیالانی درشانی آئی ءَ نیویارک ءَ اوگانستان ءِ ھوالگ ءَ او آئی سی ءِ رابطہ گروپ ءِ اولی دیوان ءَ گوں تران کنان ءَ کت۔ آئی ءَ گوشت کہ اوگانستان ایوک ءَ نشت نہ کنت، او آئی سی ءِ باسکیں ملک آناں اوگانستان ءَ را انسانی کمک ءِ پھجاری ءَ را ایمنی بہ کن اَنت، بیپاری ءُ بینکنگ ءِ نظام ءَ را بحال بہ کن اَنت، دمگی رابطہ ءَ را گیش بہ کن اَنت ءُ میاں اوستمانی ذمہ واری آناں پیلو کنگ ءِ واستہ گپ ءُ تران ءَ را دیم ءَ برگ لوٹ اَنت۔ نائب مزن وزیر ءَ اوگان سرزمین ءَ چہ کار کنوکیں ناشرکاریں گل آنی سر ءَ سک باز جیڈھ ءِ درشان کت ءُ ھشدار دات کہ اے دمگی امن ءُ ایمنی ءِ واستہ ھترہ انت۔ آئی ءَ اوگان واکدار آناں سرحد ءِ سرا ناشرکاری ءِ ھلاپ ءَ ٹھوس ءُ تصدیق ءِ لائکیں گامگیج زورگ ءِ سر ءَ زور پر دات۔ نائب مزن وزیر ءَ اوگانستان ءِ برجائی ءِ واستہ روڈ میپ ءِ تیاری ءِ واستہ او آئی سی ءِ کارندہ آنی کارگس ءِ جوڑ کنگ ءِ تجویز پیش کتگ۔ آئی ءَ گوشت کہ دائمی امن ءِ واستہ مخلصی، یکے دومی ءِ شرپءُ سیاسی جزم ءِ ضلورت اِنت۔