مزن وزیر شہباز شریف ءُ ورلڈ بینک گروپ ءِ صدر اجے بنگا ءَ گوں گند ءُ نند ءَ کنٹری پارٹنر شپ فریم ورک ءِ چیر دستی ءَ پاکستان ءِ گوما کمک ءَ را گیش مھکم کنگ ءِ جزم ءِ  درشان

نیویارک۔24ستمبر  (اے پی پی): مزن وزیر محمد شہباز شریف ءُ ورلڈ بینک گروپ ءِ صدر اجے بنگا ءَ پاکستان ءِ دیمروئی ءِ اولویت آناں دیم ءَ برگ ءِ واستہ ملکی شریکداری فریم ورک ءِ چیر دستی ءَ کمک ءَ را گیش مھکم کنگ ءِ وتی جزم ءِ پدا پدر کتگ۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اقوام متحدہ ءِ جنرل اسمبلی ءِ 80می دیوان ءِ ساھت ءَ مزن وزیر محمد شہباز شریف ءُ ورلڈ بینک گروپ ءِ صدر ءَ گند ءُ نند کتگ۔ مزن وزیر ءَ اجے بنگا ءِ سروکی ءِ توسیپ کت کہ آئی ءَ ورلڈ بینک ءَ را کاروائی آناں آسان کنگ ءُ نجی شوبگ ءَ وسیلگ آناں گیش ساڑی ءُ تیار   کنگ ءِ سر ءَ دلگوشی دیان ءَ ترند ءُجوانیں  دیمروئی شریک جوڑ کتگ۔ آئی ءَ ھاسیں رنگ ءَ کوویڈ 19 ءِ وبا ءُ 2022ءِ تباہ کنوکیں سیلاب ءِ وھد ءَ پاکستان ءَ را بینک ءِ دیریں کمک ءِ توسیپ کت۔مزن وزیر ءَ ورلڈ بینک ءِ صدر ءَ را حکومت ءِ جامع اصلاحاتی ایجنڈا ءِ بابت ءَ سرپدی دات، ایشی ءِ تہ ءَ وسیلگ آناں یکجا کنگ، توانائی ءِ شوبگ ءَ را اصلاحات کنگ، موسمیاتی بدلی ءَ را کم کنگ ءُ نجی کنگ ءِ گامگیج ھوار اَنت۔ مزن وزیر ءَ یک رندے پدا گوشت کہ اصلاحات ءِ ایجنڈا ءَ پاکستان ءَ را میکرو اکنامک استحکام ءِ نیمگ ءَ رھادگ کتگ، سرمایہ کار آنی دل یکیمی ءَ را بحال کتگ، پائیدار ءُ ھواریں اقتصادی دیمروئی ءَ را دیم ءَ برتگ۔ مزن وزیر ءَ ورلڈ بینک ءِ نوکیں کنٹری پارٹنر شپ فریم ورک (2026-2035) ءِ ھم ساڑات، ایشی ءِ چیر دستی ءَ ورلڈ بینک ءَ پاکستان ءِ گوما 40ارب ڈالر ءِ راجدپتری ءُ بے دروریں جزم کتگ۔ مزن وزیر ءَ ایشی ءِ جوانیں رنگ ءَ عمل درآمد ءَ را دل یکیمی کنگ ءِ واستہ صوبائی حکومت آنی گوما نزیکی ءَ کار کنگ ءِ وفاقی حکومت ءِ جزم ءِ سر ءَ زور پر دات۔ ورلڈ بینک ءِ صدر ءَ پاکستان ءِ اصلاحات ءِ گامگیج آناں ساڑات ءُ پاکستان ءِ دیمروئی ایجنڈا ءِ کمک ءِ واستہ بینک ءِ جزم ءِ پدا زور دات۔ آئی ءَ بینک ءِ مھکمیں جزم ءِ درشان کت کہ آ سی پی ایف ءِ چیر دستی ءَ اقتصادی اصلاحات ءُ موسمیاتی بدلی ءِ دراجیں مدتی ءُ پائیدار گامگیج آناں دیمروئی ءِ واستہ کمک ءَ را برجاہ دار ایت۔ مزن وزیر محمد شہباز شریف ءُ ورلڈ بینک گروپ ءِ صدر اجے بنگا ءَ پاکستان ءِ دیمروئی ءِ اولویت آناں دیم ءَ برگ ءِ واستہ ملکی شریکداری ءِ فریم ورک ءِ چیر دستی ءَ کمک ءَ را گیش مھکم کنگ ءِ وتی جزم ءِ پدا زور دات۔