وفاقی وزیر تجارت جام کمال خان ءَ آسیان ءِ رہشوناں گوں گند ءُ نند کتگ، تجارت ءُ اقتصادی سیادی ءَ را گیش کنگ ءِ سرا تپاک

اسلام آباد۔23ستمبر  (اے پی پی): وفاقی وزیر برائے تجارت جام کمال خان ءَ گوں آسیان ءِ 7باسک ملک آنی سروک آنی کارگس ءَ گند ءُ نند کت۔ سئے شمبے ءِ روچ ءَ جاڑی بوتگیں پریس ریلیز ءِ رد ءَ آھاں پاکستان ءُ جنوب مشرقی ایشیائی ملک آنی نیام ءَ بیپاری، سرمایہ کاری ءُ مردم آناں رابطہ آناں گیش دیمروئی دیگ ءِ واستہ وتی جزم ءِ یکوئی ءِ پدا پدر کتگ۔ گند ءُ نند ءَ انڈونیشیا، ملائیشیا، فلپائن، تھائی لینڈ، برونائی دارالسلام، ویتنام ءُ میانمار ءِ تر ءُ تاب کنوکیں ءُ مزنیں سفارتکاراں بہر زرتگ ات کہ ایشی ءَ چہ اسلام آباد ءَ آسیان ءِ نمائندگی ءِ گیشیں دائرہ کار ءِ درشانی کنگ بوتگ۔ وزیر تجارت جام کمال خان ءَ گوشت کہ پاکستان نہ ایوک ءَ دو نیمگی تجارت ءَ را گیش کنگ لوٹ ایت بلکینگ ءَ ٹیکنالوجی، ہنر ءُ انفراسٹرکچر ءِ تہ ءَ دراجیں مدت ءِ شریکی ءَ را جوڑ کنگ لوٹ ایت۔ آئی ءَ گوشت کہ آسیان ءِ توامیں ملک آنی گوما پاکستان ءِ سیادی دوستی انت ءُ نوں وھد انت کہ آھاں گیش دیم ءَ برگ بہ بیت۔ جام کمال خان ءَ سفیر آناں پاکستان ءِ نوکیں تجارتی پالیشی، گاڑی درآمد ءِ پالیشی، مزن وزیر شہباز شریف ءِ حکومت ءِ چیر دستی ءَ ٹیرف اصلاحات ءُ خلیج کوآپریشن کونسل ءِ گوما ایف ٹی اے ءِ ھوالگ ءَ پیشرفت ءِ بابت ءَ ھم سرپد کت۔ آئی ءَ گوشت کہ پاکستان میاں اوستمانی ایشیا ءِ گیٹ وے انت ءُ نوکیں ٹرانزٹ ٹریڈ معاہدہ دمگی شریک آنی واستہ ھرچ ءُ درچ ءَ را کم کنگ ءَ انت۔ آئی ءَ سی پیک ءِ چیر دستی ءَ ھاسیں اقتصادی زون آنی تہ ءَ سرمایہ کاری ءِ واستہ آسیان کمپنی آناں دعوت دات ءُ گوشت کہ پاکستان ءَ افراط زر یک ہندسہ ءَ سر بوتگ ءُ درملکی سرمایہ کار آنی واستہ کاروباری چاگرد ءَ را گہتر کنگ بوھگ ءَ اِنت۔ جام کمال خان ءَ گوشت کہ پاکستان ءَ بیا، پروڈکٹ جوڑ کن، ویژول ایڈیشن بکن ءُ پدا دوبر برآمد بہ کن۔ آئی ءَ گوشت کہ پاکستان ءِ راجدپتر ءَ اولی رند ءَ تجارتی جیڈھ آنی گیواری کمیشن جوڑ کنگ بوتگ تانکہ میاں اوستمانی کمپنی آنی نیام ءَ جیڈھ آناں ترندیں رنگ ءَ گیش ءُ گیوار کنگ بہ بیت۔ آسیان ءِ ڈل آں پاکستان ءِ کوشست آنی ستا کرتگ ءُ تجارتی سیادی آناں ’’مزنیں توانائی‘‘ لیک اتگ۔ ملائیشیا ءِ تر ءُ تاب ءَ پاکستانی کمپنی آناں ملائیشیا ءِ دیمروئی کنوکیں چپ مینوفیکچرنگ ءِ صنعت ءَ بھر زوری ءِ موہ رستگ وھدے کہ ایندگر تر ءُ تاب آنی تہ ءَ آسیان ءِ جوڑیشت ءُ بجلی ءِ شوبگ آنی تہ ءَ استیں سرمایہ کاری ءِ سر ءَ چمشانک دیگ بوتگ۔ دراہیں ڈل آں پاکستان ءِ مہمان داری ساڑات ءُ دو نیمگی تجارت، سرمایہ کاری، مذہبی تبادلہ، ہنر ءِ تبادلہ ءُ سپلائی چین ءِ شریکداری ءَ را مھکم کنگ ءِ ضلورت ءِ سر ءَ زور پر دات۔ آسیان 1967 ءَ جوڑ کنگ بوتگ ءُ مرچی دنیا ءِ تیزی ءَ گوں دیمروئی کنوکیں مارکیٹ آنی تہ ءَ یکے ۔ پاکستان 1993 ءَ آسیان ءِ سیکٹرل ڈائیلاگ پارٹنر جوڑ بوتگ ءُ نوں سرجمیں ڈائیلاگ پارٹنر ءِ درجہ ءَ سر بوھگ ءِ کوشست ءَ انت۔