موسمیاتی بدلی ءِ وفاقی وزیر ڈاکٹر مصدق ملک ءُ اقوام متحدہ ءِ رہائشی کوآرڈینیٹر محمد یحییٰ ءَ گند ءُ نند کت، پاکستان ءَ جاری پروگرام آنی بابت ءَ گپ ءُ تران

اسلام آباد۔23ستمبر  (اے پی پی): موسمیاتی مٹ ءُ بدلی ءِ وفاقی وزیر ڈاکٹر مصدق ملک ءَ پاکستان ءَ اقوام متحدہ ءِ ریزیڈنٹ کوآرڈینیٹر ءُ انسانی کمک ءِ کوآرڈینیٹر محمد یحییٰ ءَ گوں گند ءُ نند کت۔ سئے شمبے ءِ روچ ءَ موسمیاتی بدلی ءُ چاگردی رابطہ ءِ وزارت ءِ نیمگ ءَ چہ جاڑی بوتگیں بیان ءِ رد ءَ گند ءُ نند ءِ ساھت ءَ محمد یحییٰ ءَ اے گپ ءِ سر ءَ زور پر دات کہ اے وھد ءَ پاکستان ءَ اقوام متحدہ ءِ 24 ادارگ کار کنگ ءَ اَنت ایشانی اولی ترجی پاکستان ءِ دیمروئی ءُ استحکام ءِ گوما موسمیاتی بدلی ءِ چیلنج آناں گیواری ءِ تہ ءَ کمک پجارینگ اِنت۔ وفاقی وزیر ءُ اقوام متحدہ ءِ ریزیڈنٹ کوآرڈینیٹر ءِ نیام ءَ پاکستان ءَ اقوام متحدہ ءِ مزنیں کساس ءَ پروگرام آنی بابت ءَ سرجمیں رنگ ءَ گپ ءُ تران بوتگ۔ گند ءُ نند ءِ ساھت ءَ اے پروگرام آنی دائرہ کار، عملدرآمد ءِ حکمت عملی، اثر ءُ آیوکیں اولویت آنی سر ءَ گپ ءُ تران کنگ بوت تانکہ موسمیاتی ردوم، آفت ءِ ھترہ ءِ کمی ءُ پائیدار دیمروئی ءِ پڑ آنی تہ ءَ کمک ءَ را گیش موثر جوڑ کنگ بہ بیت۔ محمد یحییٰ ءَ وتی جزم ءِ پدا زور دات کہ اقوام متحدہ پاکستان ءِ موسمیاتی ایجنڈا ءِ مھکمیں کمک ءَ برجاہ دار ایت ءُ پاکستان ءِ حکومت ءِ گوما نزیکیں کمک ءِ وسیلگ ءَ چاگردی پائیداری ءِ یکجائی مول ءُ مراد آناں دیم ءَ برگ ءَ انت۔ وفاقی وزیر ڈاکٹر مصدق ملک ءَ اقوام متحدہ ءِ برجاھیں شریکداری ءِ توسیپ کت ءُ اے گپ ءِ سر ءَ زور پر دات کہ حکومت اے وڑیں شریکداری ءِ ڈھانچہ آناں گیش مھکم کنگ ءِ واستہ جزم اِنت کہ ایشی ءَ چہ موسمی بدلی ءِ اثرات ءَ چہ گیش آماچیں کمیونٹیز ءِ واستہ ٹھوس ءُ ٹھوس آسراتی رس ایت۔