نائب مزن وزیر ءُ درئی کارانی وزیر سینیٹر محمد اسحاق ڈار ءَ نیویارک ءَ تنظیم ءِ ھاسیں مراگش ءَ  گشتانک دات  کہ او آئی سی ءَ را مسلمان آنی المی ایں  ھک آنی رکھینگ ءُ امت ءِ تہ ءَ فرقہ وارانہ تپاوت ءِ ھلاسی ءِ واستہ کوشست آناں گیش کنگ لوٹ ایت

نیویارک۔23ستمبر  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ اقوام متحدہ ءَ حضرت محمد صلى الله عليه وسلم ءِ 1500می سالروچ ءِ درگت ءَ امن ءُ رواداری ءِ دود ءُ ربیدگ ءِ دیمروئی ءِ ھوالگ ءَ او آئی سی ءِ مزن تک ءِ ھاسیں مراگش ءَ بھر زوری کت۔ سئے شمبے ءِ روچ ءَ درئی کارانی کارگس ءِ نیمگ ءَ چہ جاڑی بوتگیں بیان ءِ رد ءَ نائب مزن وزیر ءَ اے موہ ءِ سر ءَ وتی گشتانک ءِ تہ ءَ گوشت کہ اے امن، انصاف، شفقت ءُ رواداری ءِ بے وھدیں قدر آنی سر ءَ ھیال ءُ لیکہ کنگ ءِ موہ اِنت، ایشی ءَ را رسول اللہ صلى الله عليه وسلم ءَ وتی تعلیمات ءِ رنگ ءُ کردار ءِ تہ ءَ مثال داتگ۔ پیغمبر ءِ فلسفہ ءِ بدلی ءِ اثر ءِ سر ءَ چمشانک دیان ءَ نائب مزن وزیر ءَ اے گپ ءِ سر ءَ زور پر دات کہ اقوام متحدہ ءِ منشور ءِ تہ ءَ ھواریں اصول آنی تہ ءَ انصاف، مشاورت، رواداری ءُ جیڈھ آناں پرامن گیواری ءِ ھوالگ ءَ پیغمبر ءِ تعلیمات چون گونجگ بنت۔ سینیٹر محمد اسحاق ڈار ءَ مدینہ ءِ عہد، حدیبیہ ءِ معاہدہ ءُ مکہ ءِ پرامن فتح ءِ حوالہ داتگ ءُ پیغمبر ءِ تعلیمات ءُ کردار ءِ جہانی تعلقداری ءِ حوالہ داتگ کہ ایشی ءَ چہ کثرت پسندی، گپ ءُ تران، بخشش ءُ میان استمانی قانون ءِ نوکیں رھبندانی بُن ھشت ایر کتگ۔ آئی ءَ مسلم امت ءِ دیم ءَ اوشتاتگیں انوگیں چیلنج آنی نیمگ ءَ ھم دلگوش گور کت ءُ گوشت کہ فلسطین ءُ کشمیر ءِ تہ ءَ جیڈھ ءُ گیش بوھوکیں اسلاموفوبیا ءِ وڑیں ناانصافی ءَ چہ جھان ءِ امن ءَ را ھراب کتگ۔ آئی ءَ او آئی سی ءَ را زور پر دات کہ آ مسلمان آنی المی ایں  ھک آنی رکھینگ ءُ امت ءِ تہ ءَ فرقہ وارانہ تپاوت ءِ ھلاسی ءِ واستہ کوشست آناں گیش بہ کنت۔ نائب مزن وزیر سینیٹر محمد اسحاق ڈار ءَ امن ءُ رواداری ءِ دود ءُ ربیدگ ءِ دیمروئی ءِ واستہ او آئی سی ءُ اقوام متحدہ ءِ نیام ءَ مھکمیں شریکداری ءِ لوٹ کتگ۔ آئی ءَ گوشت کہ رسول اللہ صلى الله عليه وسلم ءِ پیدائش ءِ روچ ءِ موہ ءَ مئے ھما کار آنی واستہ یک محرک ءِ بستار ءَ کار کنگ لوٹ ایت کہ رسول اللہ صلى الله عليه وسلم ءِ بے وھدیں رحمت، انصاف ءُ شفقت ءِ پیغام ءَ را نوکیں دور ءِ پالیشی آنی تہ ءَ رجانک کنت کہ آ شرپ، برابری ءُ یکے دومی ءِ شرپ ءَ را برجاہ دار ایت۔ آئی ءَ اے مول ءُ مراد آنی سر ءَ پاکستان ءِ مھکمیں جزم ءُ اے یکجاھیں کوشست ءِ تہ ءَ او آئی سی ءِ باسک ءُ گیشیں میاں اوستمانی براتی ءِ گوما کمک کنگ ءِ جزم ءِ ھم پدر کت۔