مزن وزیر محمد شہباز شریف اقوام متحدہ ءِ جنرل اسمبلی ءِ ہشتادمی دیوان ءَ پاکستان ءِ نمائندگی کنگ ءِ واستہ نیویارک ءَ سر بوتگ

نیویارک۔23ستمبر  (اے پی پی): مزن وزیر محمد شہباز شریف اقوام متحدہ ءِ جنرل اسمبلی ءِ ہشتادمی دیوان ءَ پاکستان ءِ نمائندگی کنگ ءِ واستہ نیویارک ءَ سر بوتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر اقوام متحدہ ءِ جنرل اسمبلی ءَ گوں تران کنت ءُ کشمیر ءُ فلسطین ءِ جیڈھ آنی سر ءَ پاکستان ءِ موقف ءَ را پدر کنت ءُ ھاسیں جھان ءِ جیڈھ آنی سر ءَ پاکستان ءِ لیکہ ءَ را پیش کنت۔ مزن وزیر اقوام متحدہ ءِ جنرل اسمبلی ءِ ساھت ءَ برجم داشتگیں بازیں مزن تک ءِ مراگش آنی تہ ءَ بھر زوری کنت، ایشی ءِ تہ ءَ اقوام متحدہ ءِ سلامتی کونسل ءِ کلیتی دیوان، گلوبل ڈویلپمنٹ انیشیٹیو ءِ مزن تک ءِ دیوان ءُ موسمیاتی کارروائی ءِ ھوالگ ءَ ھاسیں مزن تک ءِ مراگش ھوار اِنت۔ مزن وزیر امریکی صدر ٹرمپ ءِ گوما گچین بوتگیں اسلامی رہشون آنی گند ءُ نند ءَ ھم بھر زوری کنت ایشی ءِ تہ دمگی ءُ میاں اوستمانی امن ءُ ایمنی ءِ ھوالگ ءَ جیڈھ آنی سر ءَ ھیال ءُ لیکہ آنی درشان کنگ ءِ واستہ ھوار بیت۔ مزن وزیر ءَ بہر زوروکیں دگنیا ءِ سروک ءُ اقوام متحدہ ءِ مزنیں کارندہ آنی گوما دو نیمگی گند ءُ نند کنت ءُ وت مہ وتی دلچسپی ءِ جیڈھ آنی سر ءَ ھیال ءُ لیکہ درشان کنت۔ دگنیا ءِ سروک آنی اے مزنیں سالانہ دیوان ءَ مزن وزیر ءِ بھر زوری ءَ چہ پاکستان ءِ کثیر جہتی ءُ اقوام متحدہ ءِ ھوالگ ءَ مھکمیں جزم ءِ درشان کنگ بیت ءُ امن ءُ دیمروئی ءِ یکجائی مول ءُ مراد آنی واستہ پاکستان ءِ دیریں کمک ءِ سر ءَ چمشانک دیگ بیت۔