دگنیا ءَ ایمنی ءُ یکوئی  ءِ دود ءُ ربیدگ ءِ دیمروئی ءِ واستہ او آئی سی ءُ اقوام متحدہ ءِ نیام ءَ شریکداری ءَ را مھکم کنگ ءِ ضلورت اِنت، نائب مزن وزیر سینیٹر محمد اسحاق ڈار نیویارک ءَ او آئی سی ءِ مزنیں تک ءِ مراگش ءَ گوں تران

نیویارک۔23ستمبر  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ جتا جتائیں جیڈھ آنی آماچیں دگنیا ءَ ایمنی ءُ یکوئی ءِ دود ءُ ربیدگ ءِ دیمروئی ءِ واستہ او آئی سی ءُ اقوام متحدہ ءِ نیام ءَ شریکداری ءَ را مھکم کنگ ءِ ضلورت ءِ سر ءَ زور پر دات۔ اے ھیالانی درشانی آئی ءَ اقوام متحدہ ءِ جنرل اسمبلی ءِ ھشتادمی دیوان ءِ ساھت ءَ ایمنی ءُ یکوئی ءِ ھوالگ ءَ اسلامی کمک ءِ گل ءِ مزن تک ءِ مراگش ءَ گوں تران کنان ءَ کت۔ سئے شمبے ءِ روچ ءَ درئی کارانی کارگس ءِ نیمگ ءَ جاڑی بوتگیں بیان ءِ رد ءَ نائب مزن وزیر ءَ وتی گشتانک ءِ تہ ءَ رسول اللہ صلی اللہ علیہ وسلم ءِ فلسفہ  مٹ بوھگ” ءِ ھوالگ ءَ اثر آنی سر ءَ چمشانک دات ءُ اے گپ ءَ را سہرا کت کہ چتور نبی کریم ﷺ ءِ انصاف، یکوئی  ءُ ایمنی ءِ رد ءَ زانت ءُ زانشت  یونائیٹڈ نیشن ءِ چارٹر ءِ رھبند  ءُ مول ءُ مراد  آنی تہ ءَ گندگ  بنت۔  آئی ءَ  گوشت کہ رسول اللہ صلی اللہ علیہ وسلم ءِ تعلیمات ءُ کردار ءِ جہانی تعلقداری ءِ حوالہ دات ءُ مدینہ ءِ منشور ءَ را کثرت پسندی، گپ ءُ تران، یکے دومی ءِ شرپ  نیک راھ آنی وت مہ وتی تعلقات ءِ یک مھکمیں مثالے لیک ات۔ آئی ءَ اے ھم لوٹ کت کہ او آئی سی ءُ اقوام متحدہ ءِ نیام ءَ شریکداری ءَ را مھکم کنگ بہ بیت تانکہ جتا جتائیں جیڈھ آنی آماچیں دگنیا ءَ ایمنی ءُ یکوئی ءِ دود ءُ ربیدگ ءَ را دیم ءَ برگ بہ بیت۔