چیئرمین سینیٹ سید یوسف رضاگیلانی تون آسٹریلوی ہائی کمشنر نیل ہاکنز نا اوڑدہی

اسلام آباد۔ 22 ستمبر (اے پی پی) چیئرمین سینیٹ سید یوسف رضاگیلانی پارینے کہ پاکستان آسٹریلیا تون تینا تعلقداری تے قدر انا نظر اٹ ہرک، پارلیمانی سنگتی گروپس ءِ پین فعال کننگے، پارلیمانی ڈل آتا باقاعدہ ہن و برآن ہڑتوم آملک آتا نیام اٹ ہم گرنچی و خیرخواہی ءِ مون آدننگک۔ دوشنبے نادے آ سینیٹ سیکرٹریٹ آن جاری بیان نا رداٹ داخیال آتا درشانی ءِ او آسٹریلیا نا ہائی کمشنر نیل ہاکنز تون اوڑدہی ٹی کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آکنڈآتا تعلقداری تے پین ودفنگ و چندی بشخ آتیٹی پوسکن وارخواہی پٹنگ آ سرجمی اٹ گپ وتران کننگا۔ داوخت آ واپار، تعلیم، دفاع ، پارلیمانی کمکاری، دودوربیدہ ئی تبادلہ، موسمیاتی بدلی و السی کہول آ رابطہ کون آ اہم سرحال آتیا سجفیر۔ چیئرمین سینیٹ پارے کہ پاکستان آسٹریلیا تون تینا تعلقداری تے قدر انا نظر اٹ ہرک۔ اوپاکستان و آسٹریلیا نا تاریخی تعلقداری تے تالان کرساپارے کہ ہڑتوم آملک آتا نیام اٹ 1948ء ٹی سفارتی تعلقداری جوڑ مسوسس ہرا وخت اتون اوار اوار پین سوگو مسنے۔ اوپارے کہ پاکستان و آسٹریلیا جمہوری قدر و دوایوانی پارلیمانی نظام نا اسیجائی روایت آتا حامل ءُ ہرا پین خڑکی کمکاری نا بنداو فراوان کیرہ۔ یوسف رضاگیلانی دزکش مروک آ آسٹریلوی ہائی کمشنر نا خذمت آتا ستاءِ کرے خاص وڑاٹ تعلیم، دودوربیدہ ئی رابطہ و شونداری پروگرام تا مون آ دننگ اٹ اونا کوشست آتے خراج تحسین پیش کرے۔ اوزور شاغا کہ پارلیمانی سنگتی گروپ ءِ پین فعال کننگے، پارلیمانی ڈل آتا باقاعدہ ہن وبرآن ہڑتوم آملک آتا نیام اٹ تین پہ تینی ہم گرنچی و خیرخواہی ءِ مون آدننگک۔ واپاری و زرگزرانی کمکاری آ ہیت کرسا چیئرمین سینیٹ پارے کہ پاکستان و آسٹریلیا نا نیام اٹ ساڑی آ ہڑتوم آ کنڈآتا واپاری کچ 2.5 ارب ڈالر ءِ ہراٹی نمان ودکی  نا گنجائشت ساڑی ءِ۔ اوکشت وکشار، قابل تجدید توانائی، معدنی وسیلہ و انفارمیشن ٹیکنالوجی نا بشخ آتیٹی کمکاری ءِ ودفنگ نا سلاہ تس۔ یوسف رضاگیلانی پارے کہ پاکستان تینا برآمدات خاص کر ٹیکسٹائل ، سرجیکل ازباب، آئی ٹی سروس و فوڈ پراڈکٹ آتا بشخ آتیٹی برآمد آتے ودفنگ نا خواہندار ءِ۔