اقتصادی سرجزآتا روڈ میپ اٹی نجی بشخ انا اواری ءِ پک کننگک، وزیراعظم شہباز شریف نا زوم آ دیوان آن تران

لندن۔ 22 ستمبر (اے پی پی) وزیراعظم محمد شہباز شریف قابل ءِ عمل ڈٹ آتا پیدواری ءِ کرسا اوفتے عملی دروشم اس تننگ کن دمدستی گام گیج آتا پارت کرساپارینے کہ کشت وکشار، آئی ٹی ، معدنیات ، سیل و سوات و قابل تجدید توانائی اہم بشخ ءُ ہرافتے ٹی پیشن نا ملک آتیان زرکاری بننگ کیک، اقتصادی سرجز آتاروڈ میپ اٹی نجی بشخ انا اہم کڑد اس مریک، اوفتا اواری ءِ پک کننگک۔ داخیال آتا درشانی ءِ او دوشنبے نادےآ پاکستان اٹی زرکاری نا کچ ، اقتصادی و واپاری سرجزآتا مون آ دننگ کن بڑزکو کہول انا دیوان نا کماشی ءِ کرساکرے۔ لندن آن زوم آ مروک آ دیوان اٹی بنجائی وزیر چاگڑد مصدق ملک، بنجائی وزیر پیٹرولیم علی پرویز ملک ، بنجائی وزیرخزانہ محمد اورنگزیب، بنجائی وزیر واپار جام کمال، وزیرحوالکاری وشینکاری عطاء اللہ تارڑ و بنجائی وزیر اقتصادی امور احدخان چیمہ ئسک بشخ ہلکر۔ وزیراعظم پارے کہ غٹ اہم بشخ آتیٹی زرکاری و واپار ءِ مون آ دننگ کن عمل نا قابل ڈٹ آتیاکاریم کننگے، کشت وکشار، آئی ٹی ، معدنیات، ٹورازم و قابل تجدید توانائی اہم بشخ ءُ ہرافتے ٹی پیشن نا ملک آتیان زرکاری بننگ کیک۔ اوپارے کہ زرکاری تون اوار اوار واپار ءِ ہم مون آدننگ نناپالیسی نا بشخ ءِ، تانکہ ننا درآمد آتیٹی خاطرخواہ ودکی مننگ کے۔ وزیراعظم پارے کہ وزارت آتے ٹارگٹ تسونن و غٹ زیر تکمیل ڈٹ آتے وخت آپورو کننگ کن غٹ وسیلہ غاتے کاریم اٹ اتنگ نا پارت کرینن۔ اوپارے کہ دامسخت کن آخبت ءِ مون آ تخسا اسہ روڈ میپ و بدلی اسے نا ایجنڈا اس جوڑ کننگے تانکہ تینا ہدف آتا دوئی کننگ کن اسہ منظم وڑاٹ مون آ ہِننگ مرے، اقتصادی سرجزآتا روڈ میپ اٹی نجی بشخ انا اہم کڑد اس مریک و اونا اواری ءِ پک کننگک، ننا برجازرگزرانی و اقتصادی اصلاحات نا پالیسی زرگزران ءِ اسہ پوسکن ءُ سمت اس تسنے و داجدت و شفافیت نا سوب ملک شونداری نا کنڈآہِننگ ءِ۔ وزیراعظم وزیرآتے پارت کرے کہ عمل نا قابل ڈٹ آتا پیدواری ءِ کرسا اوفتے عملی دروشم اس تننگ کن دمدستی گام گیج کننگے۔