وزیراعظم یوتھ پروگرام و پاکستان آئی ٹی انڈسٹری ایسوسی ایشن نا نیام اٹ معاہدہ

اسلام آباد۔ 22 ستمبر (اے پی پی) پاکستان نا ورناو کاروباری بندغ آتے واکدار کننگ کن اسہ اہم ءُ گام اس ہرفسا وزیراعظم یوتھ پروگرام و پاکستان آئی ٹی انڈسٹری ایسوسی ایشن (پاشا) مفاہمت نا اسہ یات داشت اسے آ وزیراعظم آفس اٹی دستخط کرینو۔ دوشنبے نادے آوزیراعظم یوتھ پروگرام آن جاری بیان نا رداٹ چیئرمین وزیراعظم یوتھ پروگرام رانا مشہود احمد خان پارے کہ دا شریداری نا رداٹ پاکستان نا ورناتے کسب نا پوسکن ءُ وارخواہی فراوان کننگک، ٹیکنالوجی نا بشخ انا گرج آتا رداٹ نصاب تیار کننگک۔ اوپارے کہ ورناتیکن سرٹیفکیشن پروگرام درستی راستی کرفنگک، ورناکاروباری بندغ آتیکن مینٹور شب نیٹ ورک جوڑ کننگک۔ رانا مشہود احمد خان پارے کہ انکیوبیشن پروگرام تا بناءِ کننگک تانکہ پوسکن آکاروباری ادارہ غاتے مون آدننگ مرے، زالبول آتا کماشی ٹی کاروباری ادارہ غاتے خاص اہمیت تننگک، ہڑتوم آ تنظیمک ورناتا سرسہبی کن اسیجائی پالیسی نا وکالت ءِ کرسا اواری اٹ روزگار نا وارخواہی تے ودفرہ، اوپارے کہ وزیراعظم یوتھ پروگرام و پاشا نا کمک اٹ پاکستان نا ڈیجیٹل زرگزران ءِ سوگو کننگک، ٹیکنالوجی نا بشخ اٹی کاروباری وارخواہی تے مون آدننگک۔ اوپارے کہ دا شریداری آن پاکستان نا ورناتیکن روشنا و پائیدار آخبت نا کسر آک آوار مریرہ۔