صدر آصف علی زرداری ءَ کاشغر یونیورسٹی ءِ تر ءُ تاب

کاشغر۔20ستمبر  (اے پی پی):صدر آصف علی زرداری ءَ کاشغر یونیورسٹی ءِ تر ءُ تاب کتگ ءُ سائنس، انجینئرنگ، ٹیکنالوجی، کشت ءُ کشاری، سوشل سائنسز، آرٹس، موسیقی ءُ دود ءُ ربیدگ ءَ ھوار جتا جتائیں شوبگ آنی تہ ءَ یونیورسٹی ءِ کرد ءَ را ساڑاتگ۔ آئی ءَ گوشت کہ اے ادارگ پاکستان ءَ گوں نزیکیں چینی یونیورسٹی بوھگ ءِ سوب ءَ دوئیں ملک آنی نیام ءَ اکیڈمک ءُ دود ءُ ربیدگی تبادلہ ءِ دیمروئی ءَ پل ءِ کرد ءَ پیلو کنگ ءَ انت۔ شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر آصف علی زرداری ءَ را کاشغر یونیورسٹی ءَ سر بوھگ ءِ سر ءَ یونیورسٹی ءِ سیکرٹری ڈنگ بنگوین، کمیونسٹ پارٹی آف چین ءِ سیکرٹری یاؤ نینگ ءَ کاشغر ءَ فیکلٹی ءُ نودربر آنی نیمگ ءَ چہ وش آتک کنگ بوتگ۔ صدر ءِ مملکت ءَ را یونیورسٹی ءِ راجدپتر ءُ کارانی بابت ءَ سرپدی دیگ ءِ وھد ءَ اے گپ ءِ سرپدی دیگ بوت کہ اے ادارگ 1962 ءَ جوڑ کنگ بوتگ ءُ 2015 ءَ یونیورسٹی ءِ درجہ زرتگ۔سے کیمپس ءِ ادارگ ءَ اے وھد ءَ 40 ہزار ءَ چہ گیش نودربر وانگ ءَ انت ءُ آیوکیں وھد ءَ اے کساس 50 ہزار ءَ سر بوھگ ءِ گمان انت۔ صدر زرداری ءَ سائنس، انجینئرنگ، ٹیکنالوجی، کشت ءُ کشار، سوشل سائنسز، آرٹس، موسیقی ءُ دود ءُ ربیدگ ءَ ھوار جتا جتائیں شوبگ آنی تہ ءَ یونیورسٹی ءِ کرد ءَ را ساڑات۔ آئی ءَ گوشت کہ ادارگ پاکستان ءَ گوں نزیکیں چینی یونیورسٹی بوھگ ءِ سوب ءَ دوئیں ملک آنی نیام ءَ اکیڈمک ءُ دود ءُ ربیدگی تبادلہ ءِ دیمروئی ءَ پل ءِ کرد ءَ پیلو کنگ ءَ انت۔ پاک چین اسٹریٹجک کوآپریٹو پارٹنر شپ ءِ ارزشت ءِ سر ءَ زور پر دیان ءَ آئی ءَ گوشت کہ ورنا ءُ وانگ ءُ زانگ ءِ پڑ ءَ سرمایہ کاری ءَ چہ دوئیں ملک آنی نیام ءَ دراجیں مدت ءِ سیادی گیش مھکم بنت۔ آئی ءَ یونیورسٹی ءَ جوڑ بوتگیں سی پیک سینٹر ءِ ھم گپ جتگ کہ آ بیلٹ اینڈ روڈ انیشیٹیو ءِ چیر دستی ءَ پٹ ءُ پول ءُ کمک ءَ را دیم ءَ برگ ءَ اِنت۔ صدر آصف علی زرداری ءَ گلگت، ہنزہ، دیر ءُ چترال ءِ پاکستانی نودربراں گوں ہم گند ءُ نند کتگ۔ نودربراں گشتگ کہ آہانی وانگ ءُ نندگ ءِ ھرچ ءُ درچ چینی سرکار ءِ سرا انت ءُ آہاں اسکالرشپ ہم دیگ بیت۔ صدر ءِ مملکت ءَ نودربر آناں زور پر دات کہ آ دلبڈی ءَ گوں وانگ ءَ بہ کن اَنت ءُ پاکستان ءُ چین ءِ دوستی ءَ را گیش مھکم بہ کن اَنت۔ صدر ءِ مملکت ءِ ہمراہی ءَ سینیٹر سلیم مانڈوی  والا، سندھ ءِ وزیر سید ناصر حسین شاہ، چین ءَ پاکستان ءِ سفیر ءُ پاکستان ءَ چین ءِ سفیر ہم ھوار ات۔