اوورسیز پاکستانی ملک ءِ سفارتکار انت، اسحاق ڈار

لندن۔۔21ستمبر  (اے پی پی):نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ اوورسیز پاکستانی ملک ءِ سفارتکار اَنت کہ آ دو ملک آنی نیام ءَ پُل ءِ کرد ءَ پیلو کن اَنت۔ لندن ءَ اوورسیز پاکستانی آنی واستہ یک مراگشے ءَ گوں گشتانک دیان ءَ آئی ءَ مہنگائی ءُ سود ءِ شرح ءِ تہ ءَ کمی ءِ حوالہ دات ءُ گوشت کہ حکومت اقتصادی آجوئی ءِ واستہ کوشست کنگ ءَ انت۔ بھارتی زوراکی ءِ حوالہ ءَ آئی ءَ گوشت کہ پاکستان ءَ دژمن ءَ را شکست داتگ کہ آ وتی فوجی طاقت ءِ دعویٰ کنگ ءَ ات ءُ دمگ ءَ ایمنی ءِ پھجارینگ ءَ ات، اے تاثر 10 مئی ءَ دفن کنگ بوتگ۔ پاکستان ءَ سوبمندی ءَ گوں جھان ءِ مراگش برجم داشتگ ءُ اقوام متحدہ ءِ سلامتی کونسل ءِ تہ ءَ غیر دائمی سیٹ ءِ واستہ 182 ووٹ زرتگ۔ آئی ءَ برطانیہ ءَ پاکستانی کمیونٹی ءِ سر ءَ را شگر ءُ منت گپت کہ آئی ءَ دوئیں ملک آنی نیام ءَ سیادی مہکم کتگ ءُ ملک ءِ معیشت ءِ تہ ءَ کرد پیلو کتگ۔ آئی ءَ گوشت کہ پاکستان موسمی مٹ ءُ بدلی ءَ چہ آماچیں ملک انت ءُ اے رنگیں منصوبگ جوڑ کنگ بوھگ ءَ انت تانکہ آیوکیں سال آنی تہ ءَ اے چیلنج ءَ را گر ءُ دار کنگ بہ بیت۔ اسحاق ڈار ءَ گوشت کہ پاکستان برابری ءُ انصاف ءِ واستہ توار چست کنگ ءَ انت پرچا کہ موسمی بدلی ایوک ءَ پاکستان ءِ جیڈھ نہ انت بلکینگ ءَ جھان ءِ آلودگی ءَ چہ آماچیں درستیں ملک آنی جیڈھ انت۔ آئی ءَ گوشت کہ وھدے استیں حکومت 2022ءَ سرکار ءَ اتک گڈا ملک ڈیفالٹ ءِ کش ءُ گور ءَ ات ءُ اے درگت ءَ گلوبل ریٹنگ ایجنسی ءُ ادارگ تاریخ دیگ ءَ اتنت۔ اے موہ ءِ سر ءَ راج مزن وزیر ءَ را سلام پیش کنت آئی ءِ متحرکیں سروکی ءَ معیشت ءَ را بحران ءَ چہ در کتگ۔