اقوام متحدہ ءِ جنرل اسمبلی ءِ 80می دیوان ءَ مزن وزیر شہباز شریف کشمیر ءُ فلسطین ءِ جیڈھ آنی سر ءَ چمشانک دنت، دری کارانی کارگس ءِ جارکش

اسلام آباد۔21ستمبر  (اے پی پی):مزن وزیر محمد شہباز شریف اقوام متحدہ ءِ جنرل اسمبلی ءِ 80می دیوان ءِ مزن تک ءِ بہر ءَ پاکستان ءِ ڈل ءِ سروکی ءَ کنت کہ 22 ءَ بگر داں 26 ستمبر 2025ءَ نیویارک ءَ برجم دارگ بیت۔ دری کارانی کارگس ءِ نیمگ ءَ چہ جاڑی بوتگیں بیان ءِ رد ءَ مزن وزیر وتی گشتانک ءِ تہ ءَ میاں اوستمانی براتی ءَ را زور پر دنت کہ آ جموں ءُ کشمیر ءُ فلسطین ءِ سر ءَ بھارت ءِ ناجائزیں قبضہ ءِ جیڈھ آناں ترندیں گیواری ءِ شوھاز ءَ بہ کن اَنت ءُ راج ءَ را وت واجہی ءِ ھک ءُ دراجیں قبضہ ءَ چہ زبھر بہ کن اَنت۔ آئی ءَ ھاسیں رنگ ءَ غزہ ءِ سنگینیں بحران ءِ نیمگ ءَ دگنیا ءِ دلگوشی کش ایت ءُ فلسطینی راج ءِ رنج ءُ گم آنی ھلاسی ءِ واستہ فیصلہ کنوکیں گامگیج زورگ ءِ ضلورت ءِ سر ءَ زور پر دنت۔ ایشی ءَ ابید مزن وزیر شہباز شریف دمگی ایمنی، موسمیاتی مٹ ءُ بدلی، ناشرکاری، اسلاموفوبیا ءُ پائیدار دیمروئی ءِ وڑیں ھاسیں جھان ءِ جیڈھ آنی سر ءَ پاکستان ءِ موقف ھم پیش کنت۔ مزن وزیر جنرل اسمبلی ءِ دیوان ءِ موہ ءَ بازیں مزن تک ءِ مراگش آنی تہ ءَ ھم بھر زوری کنت، ایشی ءِ تہ ءَ اقوام متحدہ ءِ سلامتی کونسل ءِ دیوان، گلوبل ڈویلپمنٹ انیشیٹیو ءِ مزن تک ءِ دیوان ءُ چاگردی گامگیج آنی ھوالگ ءَ ھاسیں دیوان ھوار اَنت۔ آ امریکی صدر ڈونلڈ ٹرمپ ءِ گوما اسلامی ملک آنی گچینی سروک آنی گوما ھم گند ءُ نند کنت ءُ دمگی ءُ جھان ءِ امن ءُ ایمنی ءِ ھوالگ ءَ جیڈھ آنی سر ءَ گپ ءُ تران کنت۔ گند ءُ نند ءِ ساھت ءَ مزن وزیر ءَ دگنیا ءِ جتا جتائیں سروک ءُ اقوام متحدہ ءِ مزنیں کارندہ آنی گوما وت مہ وتی گند ءُ نند ھم کنت، ایشی ءِ تہ ءَ وت مہ وتی دلپوشی ءِ جیڈھ آنی سر ءَ ھیال ریچی کنگ بیت۔ آئی ءَ سلامتی کونسل ءِ باسک ءِ بستار ءَ جیڈھ آنی گر ءُ دار، امن ءِ دیمروئی ءُ جھان ءِ وشھالی ءِ واستہ اقوام متحدہ ءِ منشور ءِ سر ءَ عمل کنگ ءِ پاکستان ءِ عزم ءِ سر ءَ ھم پدر کنت۔ مزن وزیر ءِ دگنیا ءِ سروک آنی مزنیں سالانہ دیوان ءَ بھر زوری ءَ چہ پاکستان ءِ کثیر جہتی نظام ءِ گوں وتی عزم ءُ اقوام متحدہ ءِ گوں آئی ءِ مھکمیں عزم ءِ سر ءَ چمشانک دیگ بیت ءُ امن ءُ دیمروئی ءِ یکجائی مول ءُ مراد آنی تہ ءَ پاکستان ءِ دیریں کرد ءِ سر ءَ چمشانک دیگ بیت۔