وفاقی وزیر اھوالکاری عطا اللہ تارڑ ءَ خیبر پختونخوا ءِ سر وزیر ءِ نیمگ ءَ اھوالکار عبداللہ مومند  ءَ را دیم داتگیں نوٹس ءِ سر ءَ سک باز جیڈھ ءُ اپسوز ءِ درشانی کتگ

اسلام آباد۔19ستمبر  (اے پی پی): وفاقی وزیر ءِ اھوالکاری عطا اللہ تارڑ ءَ خیبر پختونخوا ءِ سر وزیر ءِ نیمگ ءَ ”ڈان نیوز“ ءَ گوں سیادی داروکیں اھوالکار عبداللہ مومند ءَ را روان داتگیں نوٹس ءِ سر ءَ سک باز جیڈھ ءُ اپسوز ءِ درشانی کتگ۔ آئی ءَ گوشت کہ ایوک ءَ جست کنگ ءِ سر ءَ عبداللہ مومند ءَ را یک ارب کلدار ءِ نوٹس روان دیگ رسانکدر ءِ آجوئی ءِ سر ءَ اُرش اِنت، جمہوری قدر آنی لگتمالی ءُ کانود ءَ چہ  دلپروشی  اِنت۔ اھوالکار ءِ زمہ واری جست کنگ اِنت ءُ جستانی سر ءَ نوٹس دیم دیگ ایوک ءَ ناجائز ءُ غیر آئینی نہ اِنت بلکیں ناجائزیں پندل اِنت۔ اے وڑیں گامگیجانی مول ءُ مراد اھوالکارانی سر ءَ زور دیگ ءُ آھاں بے توار کنگ ءُ جمہوری دودمان ءِ سر ءَ مزنیں دھکے دیگ اِنت۔ جمعہ ءِ روچ ءَ وفاقی وزیر ءِ اھوالکاری ءَ وتی گشتانک ءِ تہ ءَ گوشت کہ جمہوری قدر آنی لوٹ اِنت کہ جست آنی پسو ءَ را ھاسیں ءُ ھاسیں رنگ ءَ دیگ بہ بیت ءُ نہ کہ اھوالکار آناں آزار ءُ ترسینگ ءِ وسیلگ ءَ۔ آئی ءَ گوشت کہ اھوالکار آناں بدنامی ءِ نوٹس ءُ سائبر کرائم ءِ کارروائی آنی دھمکی ءِ جاری کنگ ھچ رنگ ءَ منگ نہ بیت۔ عطا اللہ تارڑ ءَ گوشت کہ خیبر پختونخوا ءِ سر وزیر ءِ اے رویہ ریاستی اگدہ ءُ اختیارات آنی نا شر کارمرد کنگ ءِ برابر انت، اے وڑیں کار نہ ایوک ءَ ملکی بلکینگ ءَ میاں اوستمانی تک ءَ پاکستان ءِ نام ءَ را تاوان دنت۔ میاں اوستمانی تک ءَ رسانکدر ءِ آجوئی ءُ اھوالکار آنی رکھینگ ءَ را انسانی ھک لیکگ بنت، پمیشکا اے رنگ ءِ وئیل پاکستان ءِ جوانیں امیج ءَ را رنگ کن اَنت۔ آئی ءَ گوشت کہ اے انتہائی افسوس ءِ گپ انت کہ تحریک انصاف ءِ ہر گامگیج وتی مفاد ءِ بدل ءَ ملک ءِ مفاد ءِ ھلاپ انت۔ رسانکدر ءِ آجوئی ءِ سر ءَ بندش، ادارہانی سر ءَ ھبر ءُ ھبر ءُ راج ءِ نمائندہانی بدنام کنگ ءِ کوشست اے پارٹی ءِ نشان جوڑ بوتگ اَنت۔ آئی ءَ گوشت کہ حکومت صحافی کمیونٹی ءِ گوما اوشتاتگ ءُ ھرچ گامگیج ءِ ھلاپ ءَ مھکم اوشتات کنت کہ میڈیا ءِ سرکوب کنگ ءِ کوشست کنت یا جمہوری قدر ءُ قیمت آنی ھلاپ ورزی ءِ کوشست ءَ کنت۔