پاکستان نا شونداری نا کسر بلوچستان و خیبرپختونخوا نا شونداری تون گنڈوک ءِ، قائم مقام چیئرمین سینیٹ سیدال خان ناصر

کوئٹہ۔ 19 ستمبر (اے پی پی) قائم مقام چیئرمین سینیٹ سیدال خان ناصر پارینے کہ مسلم لیگ (ن) ملک و بلوچستان نا غٹ آن بھلا پارلیمانی جماعت ءِ پارٹی سرکڑدہ غاتا پکایقین ءِ کہ پاکستان نا شونداری نا کسر بلوچستان و خیبرپختونخوا نا شونداری تون گنڈوک ءِ، میاں محمد نواز شریف ، وزیراعظم شہباز شریف و مریم نواز تون اوار پارٹی نا مرکزی سرکڑدہ غاک بلوچستان نا کارندہ غاتا مایوسی ءِ چٹفنگ نا بناءِ کرینو ، بلوچستان ءِ دہشت گردی، بے روزگاری، سیمی علاقہ غاتا بندش کون آ ویل آتیان نجات ترفرہ، بلوچستان نا ویل آتا ایسری کن سیاسی گپ وتران المی ءِ جذباتی نعرہ غاتیان بلوچستان نا ویل ایسر مفک۔ داہیت ءِ او کوئٹہ ٹی مسلم لیگ (ن) نا راہشون و کارندہ غاتا ڈل اتون اوڑدہی ٹی گپ وتران کرساپارے۔ قائم مقام چیئرمین سینیٹ پارے کہ پارٹی سرکڑدہ میاں محمد نواز شریف، میاں محمد شہباز شریف و مریم نواز تون اوار غٹ راہشونک داہیت آ امنا کرینو کہ مسلم لیگ (ن) ءِ بلوچستان تون اوار مچ آملک اٹی فعال کننگک۔ اوپارے کہ اینو پارٹی ءِ بلوچستان ، بنجاوپنجاب اٹی ہرا ہند ملانے او مخلص کارندہ، راہشون تا جہد نا بھرم ءِ پارٹی سرکڑدہ غاک داہیت انا عزم کرینو کہ کارندہ غاتا ویل آتا ایسری ءِ تینا زمواری تکسا کننگک۔ اوپارے کہ پارٹی ٹی گلہ شکوہ مریک ولے پارٹی نا ہر کارندہ پارٹی نا ادارہ غاتے جوابدہ ءِ ہر گچین مروک آ بندغ تینا حلقہ غان ہلیس یونین کونسل اسکان الس تون اوار ہِننگ نا زموارءِ۔ اوپارے کہ ملک اٹی نوکاپ قدرتی آفت کم و دشمن نا جلہو زیات ءِ دُن انگا وخت آ مسلم لیگ (ن) نا کارندہ غاتے نوکاپ آن زہمی تا زیات آن زیات کمک ءِ کروئی مرے۔ سید ال خان پارے کہ مسلم لیگ (ن) نا سیاست پاکستان نا شونداری، شونہالی و وژن آ تالان ءِ مسلم لیگ پاکستان ءِ جوڑ کرے و ہراتم کہ سخت وخت بس مسلم لیگ (ن) نا سرکڑدہ غاک ملک ءِ سیبو تسر ہرانا پیدوار درور 2022ء ٹی تینا سیاست ءِ ایڑترتخسا ملک ءِ بچفنگ نا مہم نا رداٹ حکومت نا قیام ئس۔ اوپارے کہ 2018ء نا حکومت ملک ءِ ہرا جاگہ غا سرکرے (ن) لیگ دا بیڑہ ءِ ہرفے کہ نن ملک ءِ خواتہ مننگ آن بچفنہ و نن دا کرسا نشان تسن ساڑی حکومت ہم ملک ءِ زرگزرانی، راجی و سفارتی وڑاٹ ہرفینے تدوک آ دے سعودی عرب تون تاریخی معاہدہ کننگا ہراڑآ صدر مملکت آصف علی زرداری ، وزیراعظم میاں محمد نواز شریف ، فیلڈ مارشل سید عاصم منیر دادانا حقدار ءُ۔ اوپارے کہ بلوچستان اٹی دہشت گردی نا ریسہ ءِ ورناک بے روزگاری آن فریشان ءُ سیمی علاقہ غاتیٹی ہم واپار بند ءِ نن صوبہ ءِ دا ویل آتیان کشنہ۔ سیدال خان ناصر پارے کہ پارٹی نا کارندہ غاک خواری کیر و پارٹی کلہو ءِ ہراُرااسکان سرکیر ننا است خواہی ءِ کہ پارٹی تالان مرے و کارندہ غاتا کچ ودے۔ اوپارے کہ میاں نواز شریف زوت ملک گیر سیاسی سرجزآتا بناءِ کیک۔ قائم مقام چیئرمین سینیٹ پارے کہ بلوچستان بے کچ اہمیت تخوک ءُ صوبہ اسے ، مسلم لیگ (ن) نا سرکڑدہ غاتا دا پکا یقین ءِ کہ بلوچستان و خیبرپختونخوا ملکی شونداری نا ضامن ءُ بلوچستان نا بلوچ و بشتون ورناک پاکستان نا اولیکو دے آن حصہ ءُ نن اوفتا ویل آتے بایدے خف تورن و ورناتے است جم کننگ نا گرج ءِ ۔ اوپارے کہ پاکستان نا بیرک ءِ ہرفسا سیاست کننگ اُن بے گناہ شہید آتا خاہوت آتا غم اٹی بریبر نا شریک اُن ، بلوچستان نا ویل آتا ایسری کن سیاسی گپ وتران المی ءِ جذباتی نعرہ غاتیان بلوچستان نا ویل ایسر مفک۔