آرایل این جی، ایل پی جی نا مقابلہ ٹی کم وود 30 درسد اڑزان ءِ،صارف آک کنکشن کن آن لائن درخواست تننگ کیرہ، بنجائی وزیر پیٹرولیم

اسلام آباد ۔ 19 ستمبر (اے پی پی) بنجائی وزیر پیٹرولیم علی پرویز ملک پارینے کہ صاف و اڑزان توانائی نا ودوک آ السی خواست ءِ پورو کننگ  وزیراعظم محمد شہباز شریف نا حکومت نا اولیت ءِ، آرایل این جی، ایل پی جی نا مقابلہ ٹی کم وود 30 درسد اڑزان ءِ و اُرائی کاریم اٹ اتنگ کن ایندھن نا اسہ رکھوک ءُ آپشن اس ہم ارے ، آرایل این جی آ گدریفنگ نئے بیرہ توانائی نا کارکڑد نا کنڈآ اسہ گام اسے بلکن اُراتے اہم زرگزرانی ریلیف ہم فراوان کیک، دا گام پوسکن آ اُرائی گیس کنکشن نا فراوانی نا الس نا متکن آ خواست ءِ پورو کننگ کن ہرفنگ انگ ءِ۔ داخیال آتا درشانی ءِ بنجائی وزیر جمعہ نادے آ مچ آملک اٹی اُرائی صارف آتے آرایل این جی (ریگیسیفائیڈ لیکویفائیڈ نیچرل گیس) انا کنکشن فراوان کننگ نا جوان رول آؤٹ پلان نا بابت اڈ ہلوک دیوان نا کماشی ءِ کرساکرے۔ دیوان اٹی سیکرٹری پیٹرولیم، ایڈیشنل سیکرٹری، ڈائریکٹر جنرل گیس، آئل اینڈ گیس ریگولیٹری اتھارٹی (اوگرا) نا نمائندہ، سوئی ناردرن گیس پیپ لین لمیٹڈ و سوئی سدرن گیس کمپنی لمیٹڈ نا منیجنگ ڈائریکٹرز آک بشخ ہلکر۔ داوخت آ ہڑتوم آ گیس کمپنی تا منیجنگ ڈائریکٹرآک حکومت نا پارت آ گچین عملدرآمد کن اسہ سرجم ءُ حکمت عملی اس پیش کریر۔ اوپاریر کہ اولیکو سال انا تہہ ٹی پوسکن آ آرایل این جی زیات آن زیات اُرائی کنکشن فراوان کننگ نا ہدف مقرر کننگانے۔ شفافیت ءِ پک کننگ کن، درخواست تروک آک داسہ کنکشن کن آن لائن درخواست تننگ کیرہ، صار ف آک روایتی وڑوڈول نا برعکس سوئی گیس کمپنی تا سرکاری ویب سائٹ و موبائل ایپلی کیشن تا کمک اٹ ہم درخواست آتے جمع کرفنگ کیرہ۔