آجوئی دے انا دود آتا چرجوئی ٹی پارلیمنٹ ہاﺅس اٹی پروقار دود اس اڈتننگا
چیئرمین سینیٹ میاں رضاربانی و اسپیکر قومی اسمبلی سردارایاز صادق یات گارِ جمہوریت آ پھل شاغار
اسلام آباد۔ 14اگست (اے پی پی) آجوئی دے انا دود آتا چرجوئی ٹی دوشنبے نادے پارلیمنٹ ہاﺅس اٹی اسہ پروقار ئُ دود اس اڈتننگا ہراٹی چیئرمین سینیٹ میاں رضاربانی و اسپیکر قومی اسمبلی سردار ایاز صادق یات گارِ جمہوریت آ پھل شاغار۔ داوخت آ سیکرٹری سینیٹ امجد پرویز ملک آن بیدس قومی اسمبلی و سینیٹ نا بڑزکو کمامدارآک ہم ساڑی ئسر۔ چیئرمین سینیٹ میاں رضاربانی پارے کہ آئین نا رکھ و پاسداری کن قوم ئِ یکجا مروئی تمک۔ پارلیمان السی است خواہی تا ترجمان ئِ و جمہوریت نا سوگوی ٹی پارلیمان نا کلیدی ئُ کڑد اسے۔ 70 می آجوئی دے انا دود آتا چرجوئی ٹی یات گارِ جمہوریت آ پھل شاغنگ آن پد صحافی تتون ہیت وگپ کرسا چیئرمین سینیٹ پارے کہ اینو تجدید عہد نا دے ئِ و بنجائِ سوگو جوڑ کرسا ملک ئِ عظیم جوڑ کروئی ئِ۔ اوپارے کہ ننے دا عہد نا تجدید ئِ ہم کروئی مریک کہ آئینی ادارہ غاتے اوفتا سہی حق تننگے و جھیڑہ نا کسر ئِ اختیار کننگ آن بیدس ملک ئِ شونداری و شونہالی آ روان کروئی مریک۔ اوپارے کہ نن تاریخ نا داموڑآسلوک اُن۔ ہراٹی ننے ادارہ غاتا نیام اٹ جھیڑہ غان بچوئی ئِ اگہ اینو ہم نن دانشمندانہ فیصلہ کتون تو تاریخ ننے وخت اس ہم معاف کپک۔ ننے قائد اعظم نا پاکستان نا شونداری و شونہالی کن اواری اٹ کاریم کروئی مریک ہرانا تصور ئِ قائد اعظم محمد علی جناح اگست 1947 ءنا تقریر اٹی صفاوڑات تسوسس۔
