انتہاپسندی و دہشت گردی نا چٹفنگ کن سیاسی و عسکری سروک آک اسہ پنہ غاٹی ئُ، ننا ملک سیاسی انتشار نا گواچی مننگ کپک، السی مینڈیٹ نا شرف ئِ کروئی مریک
کوئٹہ۔ 14اگست (اے پی پی) صوبائی دارالحکومت کوئٹہ تون اوار مچ آ بلوچستان اٹی 70 می آجوئی دے ئِ جوش و جوزہ اتون اڈتننگا، دے انا بنائ21توپ آتا سلامی آن مس مسیت آتیٹی کوئٹہ خود کش دھماکہ غاتیٹی شہید مروک آتے کن خصوصی دعاو قرآن خوانی آن مس غٹ ضلعی ہیڈکوارٹر آتیٹی بیرک ئِ چست کننگ نا دود اڈ ہلک، کوئٹہ ٹی بیرک ئِ چست کننگ نا بھلو دود اس بلوچستان اسمبلی نا سبزوار آ اڈ ہلک۔ دود اٹی وزیراعلیٰ بلوچستان نواب ثناءاللہ خان زہری ، کمانڈرسدرن کمانڈ لیفٹیننٹ جنرل عامر ریاض ، اسپیکر بلوچستان اسمبلی راحیلہ حمید خان درانی، صوبائی وزیرآک، قومی و صوبائی اسمبلی نا باسک آک، آئی جی ایف سی میجر جنرل ندیم انجم، آئی جی پولیس بلوچستان احسن محبوب تون اوار بڑزکو کمامدارآک ساڑی ئسر۔ وزیراعلیٰ بلوچستان نواب ثناءاللہ خان زہری بلوچستان اسمبلی نا سبزوار آ قومی بیرک ئِ چست کرے و داوخت آ اسکول آتا طالب علم آک قومی ترانہ ئِ پیش کریر۔ دود آن تران کرسا وزیراعلیٰ بلوچستان نواب ثناءاللہ خان زہری پارے کہ ننا عزم ئِ کہ مملکت خداداد نا دفاع و آجوئی آ ہچ ئُ آنچ اس بننگ کن ہلیپنہ۔ اوپارے کہ انتہاءپسندی و دہشت گردی نا چٹفنگ کن سیاسی و عسکری سروک آک اسہ پنہ غاٹی ئُ، شونداری نا عمل اٹی غٹ ئِ اوار درسا ہنوئی ئِ، وزیراعلیٰ بلوچستان نا پاننگ ئس کہ مسکوہی وزیراعظم محمد نواز شریف بلوچستان نا شونداری ٹی خصوصی است خواہی ہلک۔ اوپارے کہ نن ہراوخت آن اقتدار ئِ سنبھالان اُن ، صوبہ ٹی بھاز انگا شونداری کاریم تا بنائِ کرینن، بلوچستان ئِ شونداری نا کسرآ روان کینہ۔ اوپارے کہ کوئٹہ ٹی سفاک دشمن اسہ وار ولدا کاری جلہو کرسا جشن آجوئی نا خوشی تے لتاڑنگ نا کوشست کرینے، زندہ انگا قومک جشن آجوئی ئِ اڈ تننگ تون اوار اوار خود احتسابی ئِ ہم قائم تخرہ۔ اوپارے کہ ننا ملک ہچ ئُ سیاسی انتشار اسے نا گواچی مننگ کپک السی مینڈیٹ نا شرف ئِ کروئی مریک، ملک ئِ مون تروک ویل آتا ایسری جمہوریت نا کمک اٹی ہی ئِ۔ اوپارے کہ سی پیک و ایلو بھلا ڈٹ آتیان الس نا زند اٹی شونہالی بریک، داکان بیدس بلوچستان ہائی کورٹ اٹی ہم بیرک ئِ چست کننگ نا اسہ پروقار ئُ دود اس اڈ ہلک چیف جسٹس بلوچستان ہائی کورٹ محمد نور مسکانزئی قومی بیرک ئِ چست کرے۔ بیرک ئِ چست کننگ نا دود اٹی ہائی کورٹ نا جج آک و سینئر وکیل آک ہم ساڑی ئسر۔ کوئٹہ آن بیدس نوشکی، لسبیلہ، حب، پشین، ژوب، سیبی، ڈھاڈر، خضدار، قلات ، مستونگ ، دالبندین ، پنجگور ، گوادر ، ڈیرہ بگٹی، ڈیرہ مراد جمالی، پنجپائی تون اوار چنکا بھلا شارتیٹی بیرک ئِ چست کننگ نا دود اڈ ہلک۔ وزیراعلیٰ بلوچستان نواب ثناءاللہ خان زہری اسکول آتا طالب علم آتے کن 5لکھ روپئی نغد ی تننگ نا پڑو ئِ کرے ہراک بیرک ئِ چست کننگ نا دود اٹی خصوصی وڑاٹ شرکت کرسا قومی ترانہ و ملی نغمہ پیش کریر۔
