مرےدکے۔12 اگست (اے پی پی ) مسکوہی وزیر اعظم محمد نواز شریف پارینے کہ پاکستان نا 20 کروڑ الس اونااصل مالک آک ئُ ، گڑاس بندغ پاکستان نا مالک مننگ کپسہ، کنا برخلاف اسہ ٹکاسے نا کرپشن ، نغڑد و ہیرا پھیری نا ہچ ئُ ثبوت اس اف ۔ الس نواز شریف ئِ وزیر اعظم جوڑ کرسا اسلام آباد آ گدریفیرتو کشا پین اسٹ اس۔ اگہ نواز شریف کرپشن اس کروسس تو خف تیٹی ہلسا اودے پیشن کشوسر وکنا خنک ہم شرم آن بڑزا متوسہ ، او ہفتہ نا دے کہ مرید کے آ سرمننگ آ بیا بخیر کروک آ کارندہ غا تیا تران کریکہ۔ دا وخت آبنجائی وزیر خواجہ آصف ، رانا تنویر ، رانا افضال تون اوار ایلو لیگی راہشون آک ہم ساڑی ئسرہ ۔محمد نواز شریف پارے کہ انت باوہ ہم مار آن تنخواہ ہلیک ، دا ہیت آوزیر اعظم ئِ کشنگک ، دا نظام ئِ بدلینگوئی مریک، او پارے کہ نن و دے نماخذمت ئِ کریٹہ ،بجلی مست آ ن گچین مسنے ، سڑک آک جوڑ مننگ اٹی ئسرہ ، بلوچستان شون ہلککہ ،، سی پیک پاکستان اٹی جوڑ مننگ ئس، ورنا تے روزگار ملنگ بناءکریسس ، بروک آ ارا مسہ سال اٹی پاکستان آن بیروزگاری چٹاکہ ، غٹ ئِ عزت نا ارغ اس ملاکہ ، نواز شریف پارے کہ ملک اٹی انقلاب مرے یا مفئے ؟ انت نم انقلاب کن تیار اورے ،اوپارے کہ ملک ئِ شونداری نا بڑزی تیا درینہ و کنا وعدہ ئِ پاکستان شونداری نا بڑزی تاکاہک ولے داڑکن انقلاب اس اتوئی ئِ۔تینا تران اٹی مسکوہی وزیر اعظم کارندہ غاتے تینا وفاداری نا ہم پبی باوری ترفے و پارے کہ نواز شریف نما قدم تون قدم ئِ تخساکاہک ،نواز شریف وخت اس ہم دروتفک ،مدام وفا کیک ، مرید کے والاک ، دا جوزہ واقعی انقلاب و بدلی اس اتیک ، دا متوتو دنیا ٹی ہچ کس ننا شرف ئِ کپروئے ،نواز شریف پارے کہ کنے اومیت ئِ مرید کے نا الس حق و سچائی تون تفرہ۔
