اولیکو وار صدر اسحاق خان، ارٹ میکو وار پرویز مشرف و مسٹ میکو وار عدلیہ نا کمک اٹ کنے اُراغا گدریفنگا، دا الس نا وونٹ انا توہین ئِ، ای وزیراعظم افٹ ولدا ہم ہچ ئُ فکر انا ہیت اس اف، شونداری نا دا سفر برجاسلک
گجرات۔ 11 اگست (اے پی پی) مسکوہی وزیراعظم محمد نواز شریف پارینے کہ اولیکو وار صدر اسحاق خان، ارٹ میکو وار پرویز مشرف و مسٹ میکو وار عدلیہ نا کمک اٹ کنے اُراغا گدریفنگا، دا الس نا وونٹ انا توہین ئِ، ای وزیراعظم افٹ ، ولدا ہم ہچ ئُ فکر انا ہیت اس اف، شونداری نا سفر برجاسلک، کنا خواہش اف کہ کنے دُوارہ وزیراعظم جوڑ کننگے ولے داحق الس نا ئِ ، داسہ ہرانا لٹ ہمونا میئی والا کانود چلینگپک ، اگہ کنے کاریم کننگ کن ہلنگاکہ تو بروک آ اِرا مسہ سال اٹی اسٹ اس ہم بے روزگار متوکہ، غٹ ئِ روزگار ملاکہ، مچ آ پاکستان ہراٹی گلگت بلتستان ، آزاد کشمیر، بلوچستان ، سندھ ، کے پی کے و پنجاپ نا الس نا ہندا توارئِ کہ نواز شریف نا برخلاف فیصلہ اسٹ اسہ ہم منظور اف۔ او گجرات اٹی السی مچی آن تران کریکہ ۔ اوپارے کہ ننا مخالف آک پارہ کہ نن کرایہ ٹی بندغ آتے اتینہ، الس دوتے بڑزاکرسا پار کہ او تینٹ بسنو یا کسس اوفتے ایسونے۔ اوپارے کہ اللہ خننگ ئِ انتس کہ نواز شریف تون مننگ ئِ۔ اوپارے کہ نواز شریف ہمودے ہرادے نم 2013ءٹی وونٹ تسوسرے، اینو ای کمٹمنٹ کننگ کن بسونٹ، اوپارے کہ 2013ءآن مست نئے پنکھہ اس چلینگاکہ و نئے چولھااس لگاکہ، اینو 2017ٹی بجلی ہم ارے و گیس ہم ارے، انشاءاللہ 2018 ءٹی لوڈشیڈنگ ہمیشہ کن چٹک۔ اوپارے کہ اگہ کنے کاریم کننگ کن ہلنگاکہ تو بروک آ اِرا مسہ سال اٹی اسٹ اس ہم بے روزگارمتوکہ، غٹ ئِ روزگار ملاکہ، کنے کاریم کننگ کن ہلنگ تو، اخس ترندی اٹ ای ملک انا شونداری کن کاریم کریٹہ ہموخہ ترندی اٹ کنے کشنگا۔ اوپارے کہ کنے پاننگے کہ ای ہرا کرپشن ئِ کرینٹ، ، کنا زی آ کرپشن نا ہچ ئُ داغ اس اف، حکومت ئِ امانت سمجھاٹ و وخت اس ہم خیانت کتوٹ، ہموجج صاحب آک ہم پاننگ ئُ ہرافک کنے کشار۔ قوم سوج کیک کہ نواز شریف ئِ انت اکن کشنگا ۔ اوپارے کہ الس نا وونٹ ئِ نت تاکیرغ آن لتاڑنگا، دادے الس نا وونٹ انا شرف۔ اوپارے کہ الس ہراسٹ ئِ گچین کیک ، اودے بایدے خذمت نا موقع ہم تننگے۔ اوپارے کہ اینو پاکستان اٹی امن و کراچی نا امن بحال مسنے، داہیت ئِ المی جوڑ کروئی مریک کہ وونٹ انا تقدس نا بایدے شرف مرے، نن غٹ دانا برخلاف بش مرینہ، اوپارے کہ اگہ ای وزیراعظم افٹ تو ہچ ئُ فکر انا ہیت اس اف۔ شونداری نا سفر برجاسلک۔ اوپارے کہ ای پاپرہ کہ کنے دُوارہ وزیراعظم جوڑ کیر ولے داحق بیرہ الس نا ئِ و اسٹ اس ہم داحق ئِ الس آن پُلنگ کپک۔
