وزارت آبی وسیلہ نا غٹ جاری شونداری ڈٹ آتا بروخت پوروی ئِ المی جوڑ کننگے، کچھی کینال ڈٹ آن ڈیرہ بگٹی و بلوچستان نا ایلو علاقہ غاتے فائدہ مریک و خشک انگا ڈغارک آباد مریرہ
کچھی کینال نا ڈٹ ہنداتُواٹی بناءکن تیار ئِ، نیلم جہلم ہائیڈرو پاور پروجیکٹ نا اولیکو یونٹ بروک آ سال فروری، ارٹ میکو مارچ اٹی کاریم نا بنائِ کیک، چیئرمین واپڈ انا دیوان ئِ بریفنگ
اسلام آباد۔ 11 اگست (اے پی پی) وزیراعظم شاہد خاقان عباسی وزارت آبی وسیلہ ئِ پارت کرینے کہ غٹ جاری شونداری ڈٹ آتیا چکار تخنگے و اوفتا بروخت پورو ی ئِ المی جوڑ کننگے۔ واپڈاآن تعلقدار معاملہ غاتیا وزیراعظم آفس اٹی دیوان اسے نا کماشی ئِ کرسا اوپارے کہ معاملہ غاتا گچین ایسری کن آبی وسیلہ نا پوسکن ئُ وزارت اس اڈتننگانے۔ اوپارے کہ مستین اٹی آبی سلامتی نا معاملہ ئِ گوجالنگا و مچ آ چکار ئِ بجلی نا پیداوار آ تخنگا۔ اوپارے کہ ساڑی حکومت دیر انا بھلو ڈٹ آتا بنائِ کرے انتئے کہ دیر ننا معیشت اٹی مخ انا ملی نا حیثیت تخک۔ اوپارے کہ ننے آبی وسیلہ غاتا وزارت ئِ جوڑ جاڑ جوڑ کروئی ئِ و دا چرجوئی ٹی کوشست آتے ترند کننگے۔ چیئرمین واپڈا لیفٹیننٹ جنرل (ر) مزمل حسین داوخت آ وزیراعظم ئِ دیر و بجلی نا جاری ڈٹ آتا بارواٹی معلومدار کرے ہراکہ چاہندار آتا چاروکی ٹی ساڑی حکومت ہرافتا بنائِ کرینے۔ اووزیراعظم ئِ آبی وسیلہ غاتا بست و بند نا بابت آخبت نا ڈٹ آتا بارواٹی معلومدار کرے۔ دیوان اٹی پیدواری کننگا کہ ساڑی حکومت نا کنڈآن بناءکروک آ غٹ اسٹریٹجک ڈٹ آک تخوک آ وخت انا تہٹی پورو مریرہ۔ دیوان اٹی پاننگاکہ جاری ڈٹ آتیٹی کچھی کینال نا ڈٹ ہندا تُو اٹی افتتاح کن تیار ئِ۔ داجوآن ڈیرہ بگٹی ٹی 72 ہزارایکڑڈغار آبادمریرہ۔ چیئرمین واپڈا پارے کہ داڈٹ 15سال آن پدسلوک ئس ساڑی حکومت داڑآکاریم نا بنائِ کرے و داڈٹ انا پوروی ٹی بروک آاڑاند آتے مر کرے۔ وزیراعظم ڈٹ آ است جمی نا درشانی ئِ کرسا پارے کہ داڈٹ آن ڈیرہ بگٹی و بلوچستان نا ایلو علاقہ غاتے فائدہ مریک و خشک انگاڈغار ک آبادمریرہ۔ چیئرمین واپڈا وزیراعظم ئِ 969 میگاواٹ نا نیلم جہلم ہائیڈرو پاور پروجیکٹ نا بارواٹی ہم پارے و پارے کہ فروری 2018 ءٹی داڈٹ انا اولیکو و مارچ 2018 ءٹی ارٹ میکو یونٹ کاریم نا بنائِ کیک و اپریل 2018 ءٹی مسٹ میکو و چارمیکو یونٹ ہم بناءکن تیارمریرہ۔ 1410 میگاواٹ نا تربیلا فور ودیکی ڈٹ انا بابت چیئرمین واپڈا پارے کہ فروری 2018 ءاسکان دانا اولیکو یونٹ، اپریل 2018 ءاسکان ارٹ میکو یونٹ و مئی 2018 ءاسکان مسٹ میکو یونٹ تیار مریک۔ دیوان اٹی داسو ہائیڈرو پاور پروجیکٹ و دیامیر بھاشاڈیم انا بنائی کاریم تون اوار منہ وخت مست بناءکروک آ ڈٹ آتا بارواٹی ہم بریفنگ تننگا۔ وزیراعظم کاریم نا معیار آ سمجھوتہ کننگ آن بیدس ڈٹ آتا خڑچ آتا ودنگ آ کنٹرول کننگ نا پارت کرے۔ اوداڈٹ آتا قومی اہمیت ئِ مون آ تخسا آخبتی چاروکی نا ہم پارت کرے و پارے کہ غٹ کڑدہ غاتا نیام اٹ امنائی کن مشترکہ مفادات کونسل نا بروک آ دیوان اٹی داڈٹ آتے ایجنڈا غا اتنگے۔ وزیراعظم پارے کہ ننا چکار دیامیر بھاشابایدے مرے و داچرجوئی ٹی غٹ اڑاند آتے مر کننگے۔ اوپارے کہ ننے فیصلہ ہلوئی مریک۔ داسہ فیصلہ غاتے ٹی پین ہرے کننگ نا ہچ ئُ گنجائش اس اف۔ وزیراعظم آبی وسیلہ گاتا مینجمنٹ نا بابت تسلسل تون جاچ دیوان تا اڈتننگ نا پارت کرے وپارے کہ کڑدہ غاتے دا چرجوئی ٹی پت اٹی ہلنگے۔ سیکرٹری دیر و ایلو بڑزکو حکومتی کمامدارآک ہم دیوان اٹی ساڑی ئسر۔
