اسلام آباد۔ 11 اگست (اے پی پی) پاک چین صنعتی کمکاری پاکستان ئِ ڈیہہ ٹی پیداواری بنجااس جوڑ کیک، صنعتی زون تا اڈتننگ آن ہندی صنعت کار آتے کن زرکاری نا بے شمار وارخواہی ودی مریک۔ چین نا صنعت پاکستانی صنعت کن خلیس اس اف بلکن آزموندہ مہارت و ہیل کننگ نا وارخواہی اتیک، چینی صنعت آتا پاکستان اٹی گدریفنگ آن پاکستان نا صنعتی بشخ سوگو مریک، چینی صنعت آتا پاکستان اٹی گدریفنگ آن بے روزگاری چٹک، چندی بشخ آتیٹی اسہ ایلو نامعلومداری و مہارت اٹی ودکی مریک۔ جمعہ نا دے وزارت ڈٹ بندی و شونداری نا کمامدارآک ”اے پی پی“ تون خصوصی ہیت کرسا پارینو کہ ملک انا ہر چار انگا صوبہ، گلگت بلتستان ، فاٹا و آزاد کشمیر اٹی 9 صنعتی زون جوڑ کننگک۔ اوپاریر کہ ششمیکو جے سی سی دیوان اٹی پاک چین صنعتی کمکاری نا بشخ اٹی کاریم ئِ پین ترند کننگ نا فیصلہ مسنے۔ پاک چین صنعتی کمکاری نا رداٹ صوبہ غاتا کنڈآن گچین 9 زون آتا اوار مننگ نا فیصلہ مس، دامسخت کن صوبہ غاک چندی ہند آتا پیدواری ئِ کریسر ہرافتے ٹی خیبر پختونخواہ نا کنڈآن رشکئی اکنامک زون و سندھ انا کنڈآن چائنہ اکنامک زون ، داریجی، بلوچستان نا کنڈآن بوستان اکنامک زون وپنجاب نا کنڈآن چائنہ اکنامک زون شیخوپورہ ، گلگت بلتستان نا کنڈآن مقپون داس گلگت وخت اس کہ کشمیر نا کنڈآن بھمبر صنعتی زون ئِ اوار کننگ نا سلاہ تننگاسس، دارالحکومت اسلام آباد اٹی آئی سی ٹی ماڈل انڈسٹریل زون وپورٹ قاسم اٹی پاکستان اسٹیل میل انا ڈغار آ انڈسٹریل پارک جوڑ کننگ وخت اس کہ فاٹا نا کنڈآن مومند ماربل انڈسٹریل زون جوڑ کننگک۔ سی پیک نا ارٹ میکو مرحلہ ٹی چین نا کمک اٹ پاکستان اٹی صنعتی زون اڈ تننگک۔
