کروڑآ خلقت 2013ءٹی کنے وونٹ ترسا اسلام آباد آ گدریفیر و پنچ جج اسہ منٹ اٹی کنے کشسا اُراغا گدریفیر ، انت کنا داقصور اس کہ کنا دور اٹی پاکستان نا شونداری ئِ عروج ، سی پیک اٹی زرکاری ، تہاری و لوڈشیڈنگ ناچٹفنگ، امن و روزگارملاکہ 70 سال اٹی پاکستان اٹی اسہ وزیراعظم اسے ہم مد ئِ پورو کننگ کن ہلنگ تنے
جہلم ۔ 10 اگست (اے پی پی) مسکوہی وزیراعظم محمد نواز شریف پارینے کہ کروڑ آ خلقت 2013ءٹی کنے وونٹ ترسا اسلام آباد آ گدریفیر و پنچ جج اسہ منٹ اٹی کنے کشسا اُرا غا گدریفیر، کسس کنے پائے کہ کنے اُراغا انت اکن گدریفنگا، کناداقصور اس کہ کنا دور اٹی پاکستان نا شونداری ئِ عروج، سی پیک اٹی زرکاری، تہاری و لوڈشیڈنگ نا چٹفنگ، امن و روزگار ملاکہ، اگہ پاکستان نا شونداری نا داعمل برجاسلیسکہ تو اسہ اسہ بے روزگار ئِ عزتی ئُ روزگار اس ملاکہ، 70 سال اٹی پاکستان اٹی اسہ وزیراعظم اسے ہم مد ئِ پورو کننگ کن ہلنگ تنے و آمر 10، 10 سال حکمرانی کرسا کریر، اسہ آمر اس مخ انا خل کننگ نا بہانہ ئِ جوڑ کرساپیشن ہناسس، انت پاکستان اٹی ہچ ئُ دُن ئُ عدالت اس اف ہرا آمر و پاکستان نا شونداری نا برخلاف کاریم کروک آتے سزا تننگ کے، سپریم کورٹ نا شرفمند آجج آک تینے ہم پاریر کہ نواز شریف ہچ ئُ کرپشن، کک بیکس ، کمیشن اس ہلتنے، وخت اس نواز شریف کرپشن کتنے تو انت اکن نابود کرین تے، داقوم ئِ بایدے ہریفوئی مرے ، بیرہ ہنداخاطران نابود کننگا کہ ای تینا مار انا کمپنی آن تنخواہ ہلتوٹ۔ او پنچ شنبے ناد ے جہلم اٹی السی مچی آن تران کریکہ۔ مسکوہی وزیراعظم محمد نواز شریف جہلم اٹی السی مچی آن تران کرسا پارے کہ جہلم نا الس ہراوالہانہ وڑاٹ بخیراٹ پارینو اوفتا شکریہ ئِ ادا کننگ کن کنتون ہچ ئُ لوز اف۔ اوپارے کہ 2013ءٹی، ای داجاگہ نا الس نا کنڈآ بسوسٹ و ای الس تون پاریسٹ کہ ملک بھلو مشکل اسے ٹی ئِ، ملک انا ڈیفالٹ مننگ نا خلیس ئِ، معیشت بھس کاری نا کنڈآ ہناکہ و ملک تہاری تیٹی ڈبنگاسس وپاکستان نا معیشت بھس کاری نا رہی آ سرمسوسس۔ نیزگار نا ہچ گہس ہلوکہ، کشارگر آتا ٹیوب ویل و صنعت کار آتا کارخانہ غاک بند مسوسر انتئے کہ بجلی ہلوکہ، داڑآن کاروبار ختم و ملک بدحالی نا مثال اس پیش کریکہ و سی این جی اسٹیشن تیا گیس اکن لینک لگوک ئسر، پاکستان نا نیزگار بندغ آک فریشان ئسر، مزورآک بے روزگار مسرہ، ای الس تون وعدہ کریسٹ کہ ای جان ایتیوہ ولے دا ملک ئِ شونداری نا کنڈآ درسا کیوہ۔ اوپارے کہ اینو ملک انا تہٹی تہاری تے ختم و روشنائی تے پدی ایسونٹ، ہرانگ اِنار 2013والا لوڈشیڈنگ، ہموتہاریک ہمیشہ کن غرق مسنو، روشنائیک مون آ بننگ ئُ ، دے و نن ئِ اسٹ کرسا بجلی نا کارخانہ خلکون، ارب آ روپئی تے بچت کرین، 20 تُو کارخانہ غاتے چلیفین، داسہ لوڈشیڈنگ مفننگ نا بریبرئِ، 2018 ءٹی لوڈ شیڈنگ ئِ ہمیشہ کن اللہ نگہبان پاننگک۔ اوپارے کہ پاکستان اٹی الحمداللہ امن پدی بسنے، کراچی نا روشنائی تے پدی ایسونن، بلوچستان اٹی امن، بلوچستان نا تہٹی غٹ پارٹیک پین اسہ کنڈاسے آ ہنارہ اوفتے پدی اتسا یکجا کرین، ہموڑے مخلوط حکومت اس جوڑ کرین و بلوچستان ئِ پاکستان نا شونداری ٹی اوار کرین۔ اوپارے کہ موٹرویز نا کاریم نا بنائِ کرین، اینو کراچی آن پشاوراسکان موٹرویز جوڑ مننگ ئِ ۔ اوپارے کہ کنے اسہ منٹ اٹی پنچ جج کشار، دا کروڑآ الس نا وونٹ آتا توہین ئِ۔ کروڑآ الس وونٹ ترسا گچین کیرہ و جج آک اسہ پلو کیرہ۔
