پاکستان نا معیشت گچینی نا کنڈآ روان ئِ، پاکستان دنیا ٹی امن ، سوگوی و شونہالی کن غٹ ملک آتون دوستانہ و برادرانہ تعلقداری تے مون آ دننگ نا خواہندارئِ، پاکستان دہشت گردی و انتہاءپسندی ئِ چٹفنگ کن پرعزم ئِ و دہشت گردی نا برخلاف کارروائی آخریکو دہشت گرد انا چٹفنگ اسکان برجاسلک، صدر مملکت ممنون حسین
اسلام آباد۔ 10 اگست (اے پی پی) میانمار، جرمنی، سعودی عرب، روانڈ، سیرالیون ، عوامی جمہوریہ لاﺅ، پیراگوئے و میکسیکو نا پندار سفیرآک پنچ شنبے نا دے صدر ممنون حسین ئِ ایوان صدر اٹی اڈ ہلوک آ اسہ باوقار ئُ دود اسے ٹی تینا سفارتی سند آتے پیش کریر۔اوکان پد داسفیر و ہائی کمشنر صدر مملکت تون جتا جتا اوڑدہی کریر۔ داوخت آ ہیت وگپ کرسا صدر مملکت پارے کہ پاکستان دنیا ٹی امن ، سوگوی و شونہالی کن غٹ ملک آتون دوستانہ و برادرانہ تعلقداری تے مون آ دننگ نا خواہندار ئِ۔ سفیر آتون جتا جتا اوڑدہی ٹی اوہڑتوم آ کنڈآتا تعلقداری و تین پہ تینی است خواہی نا معاملہ غاتیا خیال آتا درشانی ئِ کرے۔ صدر ممنون حسین پارے کہ پاکستان نا معیشت گچینی نا کنڈآ روان ئِ و ملک زرکاری و کاروبار نا عظیم وارخواہی پیش کیک۔
