اسلام آباد۔ 10 اگست (اے پی پی) مسکوہی وزیراعظم نواز شریف نا قافلہ پنچ شنبے نادے ارٹ میکو دے پنجاپ ہاﺅس راولپنڈی آن لاہور کن رادہ مس۔ احوال آتارداٹ اوتدوک آ نن پنجاپ ہاﺅس راولپنڈی ٹی گدریفے۔ مسکوہی وزیراعظم نا سروکی ٹی مسلم لیگ (ن) نا داقافلہ دے انا کم و ود دُوانزدہ ئُ نیم بجہ غا کچہری چوک آ براستہ جی ٹی روڈ لاہور نا کنڈآ راہی روان مس۔ نواز شریف تدوک آ نن کمیٹی چوک آ کارندہ غاتیان تران کریسس۔ داکان مست او بھلو کچ اسے ٹی گاڈی و کارندہ غاتا جم غفیر تون اوار قافلہ نا دروشم اٹ اسلام آباد پنجاپ ہاﺅس آن تینا باوہ پیرہ ئی شار لاہور کن رادہ مسوسس۔ اونا قافلہ بلیو ایریا، زیروپوائنٹ، فیض آباد آن مرسا مری روڈ آن گدرینگا۔ جی ٹی روڈ نا کسر اٹی بروک آ شار و خلق آتیٹی مسکوہی وزیراعظم نا بخیر کن بیابخیری کیمپ خلنگا ہراڑے پارٹی کارندہ غاک پرجوش وڑاٹ تینا قائد نا بخیر کننگ کن ساڑی ئُ وخت اس کہ جاگہ جاگہ غا بیابخیری بینرو پوسٹر لگوک ئِ۔
